مين ربي ابتلاها بزوج مثل زوجي

1. السلام عليكم ورحمه الله وبركاته

السلام عليكم ورحمه الله وبركاته

بالبدايه يمكن كثير منكم مايحسون انها بلوا او مشكله بس انا وربي خلاص تعبت وما عرفت اوصل لحل
انا متزوجه من ست سنوات عندي بنت عمرها 4 وولد سنه الله يحفظهم المشكله بدت من اول شهر بزواجنا مرينا بضروف ماديه صعبه شوي فقمت انا اراعي واحرم نفسي من اشياء كثيره بسبب اني ما اضغط عليه او احرجه مع انو كل اللي كنت اطلبه يحاول يوفره مررت الايام واحنا كذا لا طلعات ولا تماشي زي الخلق ملابسي من ابو 60 و70 عشان ماثقل عليه مناسبات كثير اعتذر منها بسسب انو ماعندي شئ يجمل تعدلت حالتنا والحمد لله بس هو برضو خلاص تعود انو هذي هي الاسواق اللي اوديك هي احيان كثير استحي من لبسي قدام اهلي واهله وخواته مع انهم اقل من ماديا بس لبسهم كله ماركات واشياء تهبل ماشاء الله كلمته بذا الموضوع قال كلها كماليات انتي احلى منها واكشخ حتى لو ملابسك رخيصه .. الطلعات والسفريات والله بالحسره مثلا لوخطط لطلعه 3 ايام مثلا مستحييل تكمل من ثاني يوم نرجع بحكم الماده مع انو حالتنا تعدلت وصارت زينه الحمد لله هو مايبخل على نفسه بشئ لا لبس ولا طلعات مع اصحابه ولا جوال ولاشئ لبسه من افخم الماركات ومع كذا يستكثر على ال100 وال200 بتنوره يشوف اني سويت جريمه !!
مايعطيني مصروف ابدا ينزلني السوق ويحدد لي مبلغ من قبل 300 او 400 ريال بالشهرين مره .
كنت صابره وساكته وكل ماقول له عن هالموضوع يقول لاتقارنين بين حياتك وحيات غيرك وانا وربي ماقارنت بس الناس عندهم عيون ويشوفون .
الحين البنت كبرت وصارت تشوف انو حياتنا مو مثل عماتها وعمامها دايم بالبيت لاطلعات ولا تماشي ولا مطاعم صح بكل شهر يوديها للالعاب مره ويجيب لها اللي خاطرها فيه بس برضو تقول ليه مانروح الشرقيه زي عمو فلان؟؟ ليه هم دايم يروحو ويتمشو وبابا مايودينا .
انا جد ما الاقي اجوبه مع انو الحمد لله حالتنا احسن من حالهم بس مدري ليه كدا هل الغلط فيني من البدايه اني عودته اني ساكته وما اطالب بحقي لدرجه اني اكثر من مره اشوف اشياء تعجبني بس يوم اشوف سعرها 180 و200 مقدر اشريها احسها غاليه تعودت خلاص
كل مره اقول خلاص ذي اخر مره اسوي كذا ومارح ابخل على نفسي بس برضو ارجع اشري الرخيص وللاسف مع كل ذا هو مش مقدر.
اسفه تكلمت كثير بس وربي من اللي بقلبي
ابي منكم تنصحوني كبف اغير من نفسي ومن تفكيره كيف اعوده على المصرووف وكيف اطلبه ؟؟
واعتذر للاطاله