و اني احبك قصة مغربية روعة

1. سلامي


2. كانت هاذي دنيا اللي جات عند البنات و وقفات معاهم


3. امين- ما عرفت اش غندير معاها


4. محمد- هضر معاها و هني قلبك

السلام عليكم و رحمة الله و بركاته
هاذا جزء اول من القصة عجباتني ونقلتها ليكم و اذا عجباتكم و لقيت منكم تشجيع نكملها لكم

سلامي

• ليلى : ايمان و يا قطيب اللوز خليوها تدوز.ا ايمان و يا الوردة و عليك يطيح الندى
• ايمان و خدودها موردة: ههه سكتينا يا الهبلة فضحتينا...
• عزيزة : ههه ويلي ويلي على الدرية تزنجات (الجيم مصرية و المعنى خدودها احمرت) ههه
• ايمان : صافي صافي راه تيشوف فينا
• ليلى : واخا ا لالا خوذي ليا راحتك مع الزين الصافي ديالك
• ايمان : ههه الله يستر ما كتسكتيش بلاتي حتى يبان الزين الصافي ديالك حتى انتي
• ليلى: انا الدنيا هانية عندي..هاذاك غ خضرة من فوق الطعام اما الزين الصافي ديال بصح راه بعيد على هنا

ايمان و عزيزة و ليلى ثلاث بنات جمعتهن الدراسة في مجموعة حلوة اضافة لدنيا, سعيدة و حنان.
ايمان بنت زوينة, ملامحها هادية و جذابة.. قامة صغيرة و عامرة شوية (مكتنزة)..بشرتها بيضا و شعرها احمر طويل..شخصيتها هادية و طيبة.. رومانسية و حساسة..و ذكية.
عزيزة بنت حلوة و ناعمة, طولها متوسط ,حتى هي مكتنزة ههه, ملامحها حلوة: صغيرة و مريحة و هذا نابع من شخصيتها الجميلة من ذكائها و لباقتها و حنانها على الغير.
ليلى فرفوشة الكليك(الشلة) ,شخصية اجتماعية بزاف ,مرحة, عفوية و رومانسية... سمرة و جميلة .

• عزيزة: الجرس صونا (دق) يالا ندخلو و لا حلات ليك الوقفة? و غمزت لايمان
• نقزات ليلى باستنكار: فين هي هاذ الوقفة و هي ملي وقف و هي عاطياه بالظهر..غير قولي ليا عمرك شفتي بحال هاذي?! السيد غادي يولي يقشعها من بينن مليون بنت غير من ظهرها ههه
• ايمان: ههه لعن حسك ..نقصي من الفولوم (الصوت) فضحتينا..شبغيتي ندير ليك, انا تنحشم ماشي بحالك نتي مقزدرة و عينيك غتيدوروا
• ليلى: ياكي وا عقلي على هاذ الشي اللي قلتي..اذا ما زال قلت ليك و اش تيشوف فيك او لا راني ماشي ليلى
• ايمان: ههه علاه انتي تقدري ما تقوليش..انتي الا ماعطيتيش تقريرك باللي طاري (حاصل) فالسيكتور (فالمجال المحيط) غ تمرضي و لا تحماقي خ
• ليلى : زيدي زيدي نستاهل
• ايمان: انتي اللي زيدي قدامي ندخلو نقراو شي حاجة تنفعنا
• عزيزة : ايمان عرفتي السيد ما تيرمش تقريبا..عينيه غيخرجوا من تحنزيزو (بحلقتو) فيك

ابتسمات ايمان بخجل و التفتات ناحية امين بحذر و دخلت للمدرسة بعد ما زلزلاتها نظرتو القوية و الدافئة.

• اه زفر امين بقوة بلا ما يحس براسو و ضحك عليه محمد
• محمد: ههه مالك ا صاحبي سالات معاك (انتهت معاك او قضت عليك)
• امين و هو حشمان: جمع راسك ا صاحبي
• محمد: غا قول ا صاحبي و حتى اذا ما قلتيش باين عليك كلشي
• امين: ما عرفتش مالي..كل ما شفتها ما تنقدرش نحيد منها عينيا و ملي تكون بعيدة كنظل نفكر امتى غنشوفها ثاني
• محمد: الله الله مشيتي فيها ا خويا..غلباتك ههه
• امين: زيد زيد قدامي, راه غيسدوا الباب و بركة من الهضرة الخاوية
• محمد: زعما باغي تقرا ههه قول باغي تتبعها وهي داخلة مع صحاباتها و بلا تفلسيف

ضحك امين باستعلاء و جرو يمشي معاه.
امين شاب وسيم بزاف طويل القامة و ذو هيبة..ابيض البشرة و قسمات ملامحه متناسقة و جذابة
محمد بنفس طول امين انما امتن بزيادة طيب و مرح و اهم شيئ موضع ثقة
ابطالنا على مشرف بداية العشرينات ..كيقراو فثانوية وحدة فالدار البيضاء و بالضبط فالسنة الاخيرة من الباكالوريا...البنات كلهم شعبة ادبي و الشباب علمي.
كل كليك ايمان عارفين ان امين معجب بزاف بايمان و باينة من تواجده الدائم حداها و نظراته الجميلة ليها.
طول السنة الدراسية و هو على هاذ الحال .و.ايمان كانت دائما كتتسائل علاش عمرو ما حاول يتكلم معاها خصوصا و ان السنة الدراسية قربت تسالي (تنتهي) و كل واحد يمشي فطريقو..كانت عاجزة تفهم او حتى تتصور ان اللي كانت عينيه تنطق بيه كذوب (اكاذيب) او لعب بمشاعرها او اوهام من تخيلاتها..

• ليلى: ماشي اوهام و لا تخيلات ..امين تيبغيك و باينة حتى للعمى
• ايمان: و من بعد? العام قرب يسالي و هو عمرو ما جرب يهضر معايا من غير ذيك المرة
• ليلى: ناري(يا ويلي), سمحي ليا انا اللي خربتها عليكم
• ايمان: لا لا ما تديري فراسك والو..اصلا انا كنت خايفة و مرعوبة و هو اكثر مني ..ما كانش غ يزعم, واخا كون ما خرجتيش لينا من الجنب و غمزات ليها
• ليلى: ما تعرفي
• ايمان: لا نساي ذاك النهار ما كانش مكتاب (مقدر)...دابا (الان) انا اللي محمقني هو" و من بعد? شنو مورا (ورا) هاذ الشي?..انا كنت تنقول يمكن بغى يتسنى اخر السنة باش يهضر معايا و لكن دابا اشنو تيتسنى?
• ليلى: و انا شنقول اللي 4 سنين هاذي
• ايمان: انتي حالتك مختلفة ا ليلى, ماشي بحالي..انتي يوسف كبير و خدام و اذا كان مازال ما هضر معاك فغير حيت لانك ما زال ما خذيتي الباك (الباكالوريا), نهار تاخذيه غادي يخطبك..

اما انا و امين قدامنا طريق و ما يمكنش ليا نستحمل هاذ الطريق كلها هكذا.. و انا حتى كلمة منو تتبث افعالو و نيتو ما عنديش.

• عزيزة: السلام عليكم
• ايمان و ليلى: و عليكم السلام و رحمة الله
• عزيزة: لاباس عليكم
• ايمان بحزن: الحمد لله
• عزيزة: مالك?
• ايمان: راكي عارفة مالي
• عزيزة: ايمان عييت ما نقول ليك ما تتشائميش و ما تتعجلييش الامور..و ما تبقايش تشوفي غير الحاجات الخايبة ..تفكري الحاجات الزوينة و كلشي غادي يكون كيف بغيتيه ان شاء الله
• ليلى: بصح الانسان ديما خاصو يبقى متفائل
• السلام عليكم

كانت هاذي دنيا اللي جات عند البنات و وقفات معاهم

• دنيا: البنات السبت العشية دايرة حفلة فالدار نتجمعو نفوجو على ريوسنا شوية و حتى وحدة فيكم ما تقول ليا ماما ما بغاتش..بابا ما بغاش ..طارت معزة..السبت كلكم تكونوا عندي
• ايمان: انا راكي عارفة ما نقدرش
• دنيا بعصبية: وا عيقتي (زودتيها) ا ايمان.بزاف هاذ الشي..قولي لماماك تجيبك و لا جيبي معاك اختك ..ما نعرف ..بزاف هاذ الشي على الزيار (شد الاهل على الابناء فالخرجات)
• ايمان: عييت معاها و والو..انا راه حتى دار خوالي ما تتخليناش نباتو فيها
• عزيزة: شلحة(امازيغية) حرة ههه
• دنيا دايما بعصبية: حتى حنا شلوح و لكن والدينا ما دايرينش لينا هاذ الحالة كلها و انتي معايا و لا ضدي
• عزيزة: واخا نكون معاك..انا اللي صاحبتها ثلث سنسن هاذي عمرها ما عتبت داري و ليلى حتى هيا
• دنيا: وا بزااف ..الحبس هاذا
• ايمان: ههه ماشي مشكل انا ولفت (تعودت)
• دنيا: المهم انا علمتك..حاولي مع ماماك و اذا بغيتي ماما تتصل بيها و تحاول معاها باش تخليك قوليها ليا..قولي ليها كلشي جاي عزيزة..ليلى ..حنان كلشي
• ايمان: دابا نحاول و الله حيت محتاجة نبدل جو
• دنيا: اوكي ايوا مشات على السبت اذا..ها كل وحدة تجيب معاها شي حاجة..ما غنوجد ليكم غ الكواسط (جمع كاسيط) و التدرديك(الشطح بنشاط خ)
• ليلى: ارا برع (هات الفرجة)ههه ما ترفديش الهم ..القص (مفردة شبابية معناها الاكل) علينا و النشاط عليك
• دنيا: ههه غير كنتفلا معاك..انتي درتيها بصح..ما تجيبوا والو
• عزيزة: حنا ما عندناش مشكلة عادي المهم نتجمعوا بوحدنا و على راحتنا (لوحدنا)

دنيا- ان شاء الله
محمد و قرعة الكوكا فايدو- ايه فين مشيتي

• امين: معاك
• محمد: منين معايا...هاذي نص ساعة و انا تنهضر معاك و انت حال فمك و مغيب
• امين بزفرة: مخنوق و طالع ليا الدم و ماحاملش راسي (ما طايق نفسو)

محمد- علاش مالك? اه ايمان

امين- ما عرفت اش غندير معاها

محمد- هضر معاها و هني قلبك

امين- نهضر معاها? اش نقول ليها? الهضرة د المسلسلات ديال والو? صبري عليا نقرا و نكون راسي و وو.... متاكد غادية ترفض و اذا ما رفضاتش.. اصلا انا ما يمكنش ليا نقبلها ليها و انا ما عارفش امتى نقدر نكون راسي
لا ما يمكنش ..ايمان مستواها اكبر من هاذ التخربيق (الخرابيط) ما يمكنش ليا نربطها بيا و انا ممتاكدش واش نقدر نوفي بعهدي او لا ...ايمان
..قاطعو محمد- و انت علاش تقرر بوحدك..هضر معاها ,صارحها و خليها هي تقرر

• امين: ولكن فهم ا صاحبي فهم
• قاطعوا محمد: ما عندي ما نفهم.. ملي انت عارف هاذ الشي علاش خليتي راسك تبغيها من الاول و علاش جريتيها معاك حتى هي..دابا هي غتقول عليك اناني و كذاب و عندها الحق لانك ناوي تتهرب منها
• امين بغضب: محمد جمع راسك..انا ماشي بحال هكذاك و انت اكثر واحد عارف شحال تنبغيها و عارف بلي تنموت عليها و انا ملي بغيتها, ما تقصدتهاش بغيتها هكداك من قلبي و بلا ما نشعر
• محمد: سمح ليا و لكن بقات فيا, حرام عليك البنت محترمة و ما تلقاش احسن منها و ..ما عرفت..ما عرفت حياتك و انت حر فيها
• امين: خليها على الله

دخل امين لبيتو (غرفتو) و من بعد ما صلى العشا..اتكى على ناموسيتو (سريرو) و عينييه فالسقف و مشا بالو لعندها..تفكرها كيف شافها هاذ الصباح..كانت قمة في الجمال و النعومة كيف ديما..لابسة شوميز شيبي (قميص ازرق فاتح) و سروال رمادي غامق و هازة شعرها الاحمر المتموج لفوق و حاطة فشعرها بروش ازرق ..الازرق تيهبل على بشرتها البيضا الصافية ..لكن ماشي غير زينها اللي قاتلني..كلها تتسالي معايا..برائتها..اخلاقها..تعاملها مع صحاباتها..ابتسامتها اللي تتحمقني و صوتها اه من صوتها كيزلزلني
يا ربي شنو ندير معاها مستحيل ننساها..عمر شي وحدة ما قدرات تحرك فيا الشعرة كيف ما بغات تكون..شفت ازين منها و لصقوا فيا ازين منها و حتى وحدة فيهم ما قدرات تشغلني و جات هيا فدقيقة غلباتني
يا ربي تجمعني بيها برحمتك يا ربي و تجعلها من نصيبي..يا ربي