وجهي يلمع

عزيزتي فراشه
انا اواجه نفس مشكلتك
انا بشرتي دهنيه خصوصا منطقة T
وما فيه حل نهائي بس فيه عوامل مساعده تخلي المكياج اثبت وما يدهن بسرعه بس لا تزعلين لأنه راح يدهن بس مو بعد 5 دقايق
طولي بالك معي لني راح اطول بالكلام شوي
المهم اول شي قبل المكياج لازم تنظفين وجهك دائما بمنتجات خاصه للبشره الدهنيه بس لازم تعرفين انتي بشره دهنيه او دهني بمناطق وجافه بمناطق ثانيه زي التركيز يكون بمنطقة T
بعط التنظيف لازم تستخدمين التونك القابض للمسام ويساعد في تقليل الدهون وبعده لازم الترطيب لأن ترطيب البشره يقلل من انها تدهن لن ليش البشره تدهن بسرعه اذا كانة جافه بدهن(وهذا شي انا مجربته)
بعد كذا ريحي وجهك شوي قبل المكياج ظروري كذا 10 دقايق
طيب فبل المكياج استخدمي كريم يكون عادتا شفاف ملمسه مخملي انا استخدم من سماش بوكس رائع
وبعد كذا حطي المكياج ومهم جدا انا يكون اساسك مائي مو دهني
والبودره تساعد في تقليل لمعان البشره بس لا تكثرين كنك حاطه طحين على وجهك كل ما احتجتي حطي شوي على المناطق الي تلمع
وبعد ما تخلصين بخي على وجهك بختين او ثلاث مثبت مكياج اتا استخدم الي من ماك حلو مره
وفيه سر حلو يكون معي دائما خصوصا بالمناسبات هي اوراق صغيره تجي زي الدفتر تلقينها في البودي شوب من جد رهيبه وتنقذ الواحد من جد بس تضغطين ضغطات خفيفه( ابدا لا تمسحن) على المناطق الي بدت تلمع
ان شاء الله تستفيدين بس صدقيني ما فيه حل نهائي وترا على فكره الموضه الحين الوجه الي يلمع وش رايس

هلا حبوبة..
عندج كذا خيار..وبس عشان أكون صادقة وياج ...اهي حلول مؤقته وتأخر الفترة اللي ممكن تحسين أن ويهج بدا فيها يفرز دهون ..
طبعاً البيس والفكسر لازم..عشان يثبتون المكياج لاطول فترة ممكنه..انا حالياً قاعده أستخدم من كانيبو
( sensaisilk (10 seconds ..ومع المجموعه الكاملة اللي وياه..من صابون ومقشر ولوشن ومرطب..صراحة وايد ساعدوني من هالناحية..اول شي ترطب الويه وتحافظ على الرطوبة اللي فيه وتعطيج ملمس حريري لبشرتج..والمنتجات هذي أنا أستخدمها قبل ماأحط المكياج بربع ساعه..والخطوة الأخيرة تكون ال awakening essence....هذ من مميزاته أن يكون طبقه قبل المكياج ويحميها من الأشعه ويقلل من أفراز الزيوت..مب يمنع..بس يخفف..
هم عندج من كانيو أو أذا حبيتي من بودي شوب مناديل مخصصة لامتصاص الزيوت اللي تبين بعد ماتحطين المكياج..يعني أذا حسيتي أن ويهج بدا يزيت أستخدمي هالمناديل على شكل طبطبة سواء على الأنف أو الجبين أو الذقن على أساس أنها تمتص الزيوت..
حاولي أنج تجربينهم وان شاءالله أنج تستفيدين..
موفقه.

مشكورين والله يسعدكم
من ناحية النتظيف انا انظف بشرتي قبل المكياج واحط فيها مرطب وامسحها بثلج بعد لانه يساعد انه يقبض المسامات
وان شاءالله تنفعني نصايحكم راح اجربها

هلا حبوبة..
مب زين تمسحين ويهج بثلج..أصلاً هالطريقه تدمر المكياج,,,,,,,,,,,,,,!!!
الثلج صج يضيق المسامات بس مب على طول..اهو من برودة الثلج المسامات تتسكر..بس بعدها بتتوسع وتفرز دهون ويخرب لج المكياج..والدليل انج أول ماتحطين المكياج يطلع شكله رهيب..بس مايكمل ساعه ألا واهو سايح..صح ولا لأ..............!!
حبيبتي أستغني عن الثلج بقطنة مبللة بماي ورد بارد نوعاً ما..وشوفي بشرتج شلون تصير..
موفقه.

كلام البنا ت كله صحيح///
و الثلج يشد البشرة وقتيا بس مع جونا الحار على طول يقطع معاك ,,
و لا ترطبين بشرتك... و نصيحتي لك سوي تنظيف بشرة مع ماسكاته و تنظيف الرؤؤس السوداء ...
و اذا قللت أكل الماكولات المقليه طبيعي بيفل الافرازات..

البنات ماشالله ما قصرو
...بس نصيحة اضافية لا تستخدمي مرطب كثيف استخدمي لوشن خفيف و اقعدي بعده عشر دقايق و بعدها حطي المكياج و البودرة المثبته للمكياج و تلقينها عند ماك ..
و خلي هالبودرة بشنطتك و استخدميها كل ساعتين..و تراها شفافه و ما تثقل و ماتبهت المكياج موفقة

مشكورين
عساني ما انحرم منكم