وداعك يال غ لا ما تشفيه الق ص ايد ل زوبعة في فنجان

الفصل الأول
البارت الأول :
مقرن توه خاش البيت و ينادي : حصة حصوصة , يا بنات
حصة تجي مسرعه : هلا يا بوسعود عيدك مبارك و جعلك من عواده على صحة وطاعة إن شاء الله
مقرن : وياك يا رب و أنتي بألف خير , وين البنات مالهم نيه يعايدون ؟؟
حصة : بيجون , إلا وين سعود ما أشوفه معك
مقرن : صلى العيد مع عمه فيصل في جامع ثا ني و أشوفهم تأخروا
حصة : يوصلون بالسلامة إن شاء الله
إلا منيره ماشية مليون وطبت على راس ابوها و مطقت مخه ثمن يده وعايدت به , واللسان حال مقرن متى بتركد هالبنت ؟؟
وبعدها جات شريفة و نوره و عايدوا بأبوهم و نشدهم عن موضي وينها ؟؟ ردوا :راقده .
هالبنت يا راقده ياتشخبط في دفاتر اليوميات والمذكرات
منيره : مويضي هالفتاه الحالمة تحسب عمرها عايشه بروحها
نوره : ليت عندك من هدوءها ولو نتيفة كود نعرف ليلنا من نهارنا في هالبيت
مناير : أها بس , فكينا محصل لكم من يسوي لكم أكشن غيري .
مقرن وحصة يتقهوون و يضحكون على نجرة البنات اليومية يحسون لها نكهة خاصة تحلي اليوم .
شريفةعايدت بابوها من غير ما تحط عينها بعينه أصلا صار لها فتره تتجنب تواجهه تحس بحياء ,خصوصا الأيام الأخيره
موب عارفة تضبط نفسها وكل سرحانه وتطلق لخيالها العنان . ما تنلام زواجها بعد كم يوم
فيصل وسعود وصلوا وعيدوا بالجميع و خشوا في جو مع السوالف , فيصل يموت في
شي أسمه يجنن منيره و موضي مسميهم رقية وسبيكة
موضي على فراغتها : السلام عليكم ياجماعه . ردوا عليها السلام
ثمن عايدت فيهم كلهم
مقرن : عساكم ولمتوا الأغراض نبي شي يبيض الوجه .
حصة : إن شاء الله ما تشوف إلا إلي يسرك
فيصل : كل إلي قلتي عليه إنجزته بالملي ويارب أعجبك
مقرن : ما تقصر و عز الله إنك قول وفعل
نوره : يعني ضبطتوا امور الغداء و شريتوا الذبايح ووديتوهم المطبخ وأكدت عليهم مايتأخرون
مقرن : لا كل شي ضبطنا اموره إن شاء الله مايجي وقت الغداء إلى كل شي جاهز
نوره : الله يجملنا
العايلة عندهم عادة من سنين إن كل عيد يكون الأستقبال في استراحة العايلة على واحد من العيال بحيث تكون عليه الضيافة و الأستعدادت
وهالعيد دور مقرن .
(في غرفة شريفة و نوره )
نوره مقابلة المرآيا : يووه من زمان عن الميك اب
شريفة وهي تضحك : هذا إلي يرزون عمرهم في الطب
نوره : أنطمي و هونت موب حاطه إلا قلوس و قضينا , إلا اشريفه روحي معنا الأستراحه بلا بياخه ودلع بنات
شريفة : يابنت الحلال أبي انخش هاليومين عشان في العرس أطلع طلعه
نوره : لا ياشيخه أطلع طلعه نعنبو جنيه
شريفة : لا والله منحرجه اروح وبعدين أحتمال يجون أهله يعايدون بأمي وضحى فشيله يشوفون خشتي
نوره : اها يالله زين و بتفتكين بعد من ذبات بعض العربان .
صوت مسج من جوال شريفة أفتحته بلهفة وقرته بينها وبين نفسها
يقولون :جده غير/ الدمام غير / كل ديره غير
وأنا أقول : أنا و أنتي غير / حبنا غير /عيدنا غير
بقى 4 أيام و عرسنا غير / كل عام وحنا سوا بألف خير ( أح ب ك)
ترى صار لي أسبوع ما سمعت صوتك يعني ملزمه ما تردين ؟؟ يكفي إني شهر ماشفتك
شريفة : يا عمري عليك يا محمد مدري اتهور و أرد عليك
نوره : أقول لا تصيرين رهيفه وش ذا الرخامة اركدي ومابقى إلا كم يوم وتذلفين معه وياعزتيلي على ذلفتك يا شريفوه
شريفة والهاشميه دنت : نوره والله أنا إلي شايله هم طلعتي من بينكم الله يصبر قلبي بس
نوره : نصبي علينا بس يالله أنا بروح أشوف منير و مويضي قضوا ولا بعد
شريفة تطقطق في جوالها
أحلى التهانى والورود لك يا سيدى
الناس عيدها يومين وانت طول العمر عيدى ( أ ح ب ك )
صوتي ممنوع لأشعار آخر/ بعد أربعة أيام
00000000000000000
في الأستراحة
الأستعدادات من إلى القهوه الحلى والمعجنات أشكال وأنواع شي جاهر وشي شغل بيت من يدين شريفة الفنانة في الطبخ
وتنسيق وأضافة لمسات مناير التشكيلية كل شي كان على أتم وجه .
البنات كاشخين نوره لابسة تنوره بيضة قصيره تحت الركبة و بلوزه بنفسجية بياقا مقفلة
ببروش فضي حلزوني فيه فصوص بنفسجيه وخرزة بيضه في وسط الحلزونه, ومسوية شعرها الأسود السايب ذيل حصان
مناير & موضي في البداية كانوا لابسين بنطلون بس أبوهم طلبهم بقوله : مدري هاليومين كاثره طلباتي بس لاتردوني
طلبتكم إن ايام العيد ما تلبسون بناطلين .فبدلوا ولبسوا فساتين قصيره ناعمة فيها نقشات بسيطة بألوان فنكي وخلوا شعرهم سايب بدون مايرفعونه .
جوال أم سعود يرن متعب يتصل بك
أم سعود : هلا ياخوي
متعب : حيا الله حصة هلا بك زود وعيدك مبارك
أم سعود : جعلك من عواده وصلت الأستراحة ولا بعد
متعب : أيه وصلت و أطلعي ولا أرسلي وحده من البنات تدخل أمي و بسلم عليكم وبمشي عندي زام
أم سعود : إن شاء الله بطلع مع مناير ووالله ودنا تعيد معنا حالك حال المسلمين مير الشكوى لله
أطلعت أم سعود ومنيره أستقبلوا أمهم وضحى وعيدوا بها عاد لزوم منير تستهبل على جدتها وخالها متعب
من الجهة الرياجيل وقفت آودي أي 8 نزل منها مشعل بن سعد وهو يكلم عمره اشوى جيت أول الناس عساني أشوف وحده من بنات العم مقرن أسمع عنده بنات ولا قط أحد شافهم . وتمشى في أرجاء الأستراحه إلا لمح متعب يسلم على فيصل و مقرن و منيره كانت واقفه معهم يعني عز الطلب إلي جاء عشانه .
مشعل بتصفيره : والله إنها قطعه بنت حصة شكلها وحده من التوأم إذا رحت البيت قردنت بشايروه و اخليها تغرد باي وحده منهم
بيني وبينكم مشعل إنسان لعاب مايعرف معنى الحب على طول قامته لكن هو طفل شقي يعتبر الأنثى
مثل اللعبه إذا ملّ منها رماها وشرى جديده . بس تتوقعون منيره بتمر حالها حال غيرها ؟؟
يتبع

بعد نص ساعه ماشاء الله العايلة تجمعت في الأستراحة وهاتك يا معايده وقهاوي وحلا وسوالف
مقرن : بو تركي , بو مشعل
هم : سمّ
مقرن وهو يناظر فيصل : سمّ الله عدوكم , طلبتكم قولوا تم
بو مشعل : الوكاد على عيال عمك مبارك ياخوي كم مره قلنا لك حنا طلعنا منهم لا هم منا ولا حنا منهم
بو تركي وعينيه تتطاير منهما الشرر : وراك أنت ما توحي نسيت وش سوا عمي مبارك بأبوي فكنا بس يارجال
مقرن : طال الزمن ولا قصر هم عيال عمنا و الظفر ما يطلع من اللحم و أنا وفيصل ومتعب ولد عمي سلطان ودنا نلم الشمل ونصلح إلي مضى يكفينا قطاعه
بو مشعل : يا بو سعود أن طولت في هالهرج بترك لك المجلس بلي فيه
فيصل : يا جماعه تعوذوا من ابليس و انتم للحين ما سمعتوا كلمة مقرن
هم بصوت واحد : وش نسمع هاللموال صار له شهر وهو يعيد ويزيد فيه
مقرن : ما راح أعيد و أزيد لأنهم جايين على الغداء و أنا ملزم على الصلح وما بأذني ماي
بو تركي : منت بصاحي الله لايجيبهم
تركي وهو ياكل تمره وبيده فنجان قهوه: يبه الله يحييك هدء أعصابك و إن جاووا إنت موب خسران شي ومن عفا و أصلح أجره على الله
بو مشعل : تركي خلك بلي أنت فيه
عبدالله : قال تعالى: "واتقوا الله الذي تساءلون به والأرحام " و حدثهم عن فوائد و أضرار صلة الرحم
بو تركي و كأنه رخى : أمرنا لله
بو مشعل متنرفز مهوب جايز له الوضع و قال طالما مافيه خسارة قروش نجلس و نشوف وش نهايتهم .
صوب الحريم
شيخة ( أم مشعل ) بنص عين : إلا يا حصة قضيتوا من تجهيز شريفة ولا ما جهزتوها بعد ؟؟
نوره تناظر خالتها و ماسكة نفسها , ردت حصة : الحمدالله جهزناها من كل شي يالله إنك تسعدها
شيخة : إيه عاد انتوا ما تعوقون تخمون و بس .
حصة تبي تصرفها : ميخالف ذوقي وذوقك معاد يعجب بنات هالسنين
أم متعب : ليكون شريفة بتظهر لناس في عرسها
نوره وهي تضحك : يا جعل عمرك طويل يا أمي وضحى إيه لزوم تظهر مو عروس ؟؟
أم متعب بشهقه : يا وجه الله عيب و شقة جيب لا بالله لا تظهر يالله حي زمان الأول البنت كانت تستحي ليلة عرسها ماتبي أحد يشوفها مو أبني هالسنين تظهر وبوجه وسيع بعد
نوره و خواتها وساره بنت فهد فطسوا ضحك على كلام جدتهم
العنود و سحر في سوالف جانبية و نوايا شيطانية
العنود : عجزت أهضم هالنوير أكرهها ولي يغبن زود لمن يقولن تشبه لك
سحر : ايه قطع يقطعها و هالشينة تلبس أشياء بسيطه وعاديه بس عليها يصير خيال
العنود : وع ما عندها ذوق ولا شي إذا هي عليها خيال أنا وشو
سحر وهي تناظر لبس العنود وفي نفسها تقول طول وجسم ملكان ولبس غالي بس لحجي
العنود بصوت عالي : نوره يا راعية الطب مدري الطبوب ورا شريفة ما جات ينقال مستحية ؟؟
ساره بغضب : العنود
نوره بسخرية سكتت العنود : حتى أنتي قبل عرسك زبنتي ما تبين يشوفك أحد ينقال مستحية
ساره علاقتها قوية مع بنات عمها مقرن و أبد ما ترضى عليهم خصوصاً نوره لأنها في نفس عمرها عكس العنود إلي ماتحب احد إلا نفسها
سحر نظرتها لناس والحياه قاصره لا تتعدى أرنبة انفها قوامها الماركات والبطره
حصة : يالله يا جماعه تفضلوا على الغداء و سامحونا على القصور , نوره تتصل على أبوها ما يرد : يالله مدري وش صار عندهم عسى عمامي
رضوا بالصلح ( مقرن قايل لنوره إن لزوم يصلح بين أخوانه و عيال عمه) ما في إلا أتصل بعمي فيصل
فيصل : هلا نوره أحد يتصل وقت الغداء
نوره وهي تضحك: شكل يدك أنواع اللغمطة خ إلا بشر وش الأمور صقر ولا بوحقب ؟
فيصل : تبين الصدق عقاب و يارب يغدي صقر
نوره : يالله إنك تصلح الحال حبيت أتطمن أحس تفكيري معكم أخليك اللحين تتغدى و إن شاء الله خير
مقرن و فيصل كانوا مرتبين كلام يقولونه بعد الغداء يصفون به النفوس لكنهم تعبوا على الفاضي لأن عيال مبارك
هم أبتدوا بالكلام و طلبوهم الوصل و إن طال الزمن ولا قصر الدم عمره ما يصير ماي و إنهم ما يبغون منهم شي إلا العفو عن إلي صار
و إن كان أبوهم مبارك خذ نصيب أخوانه بو فهد و بو متعب فهم مستعدين يعوضونهم
مقرن بسرعه تكلم قبل ما يرد أخوه سعد : لا يا عيال العم الله ما يحط ذنب أحد على أحد ثاني (( ولا تزر وازرة وزر أخرى ))
نجي حنا يالمخاليق نحمل الغير ذنب مهوب ذنبه, حنا ما نبي إلا وصلكم والله يحلل عمي و يبيح عنه
بو تركي بعد ما سمع كلام عيال عمه و مقرن : الله يرحمهم و يعينا على هالدنيا ولا الفلوس وصخ .
بو مشعل ما تكلم ولم ينبس ببنت شفة .
فيصل و تركي و مقرن و إبتسامة عريضة على محياهم قاموا و حبوا راس بو تركي
وقاموا عيال مبارك يسلمون سلام عيال العمومه و الرحم على الجميع بدون أستثناء . و آخيراً قرة عين بو سعود وحس إن الدنيا مهيب
شايلته من الفرحة و لقف تلفونه و أتصل على نوره وبشرها و قال لها خبري الحريم
أما مشعل طول الوقت كان شارد الذهن و ما تكلم إلا وهو ينادي سعود
مشعل وهو يطلع 500 من محفظته : سعود أمسك ذي عيديتك
سعود وهو يناظر الزرقاء و مهوب مصدق : بسأل أبوي أخذها ولا
مشعل : عادي تراها عيدية وكل إلي هنا عطوك و أخذتها ليه اللحين بتسأل . سعود أقتنع وأخذها
مشعل : إلا يا سعود بسألك ام في بنيه داخل لابسه كذا و كذا وشكلها كذا و كذا من هي ؟؟
سعود وهو يرمي ال 500 في حضن مشعل : عيب تناظر في البنات و ما ادري عن أحد . و عطاه ظهره و مشى
مشعل : أي يا نذل هين مصيري أعرفها
بعد صلاة العصر العايلة ودعت بعض و شكروا بو مقرن إن ما قصر ولسان حاله يقول الحمدالله إلي جملتنا
و الكل غادر المبسوط منهم و الحسود .
يتبع

البارت الثاني
-------------------------------------------
آآه وينك تسمع اللهفه 00 تشوفني أقرا و أمسح الدمعة
تحس فيني ولو مره 00 تغفر لي الزله و تغفر لي الزله 00
طلبتك لا تخليني أقرا القصيد كل كلمة بحرقة 00
فديتك ياهوى نفسي مع الشدات خاويني
فديتك لاقسى وقتي علي وناحت أشجاني
أبيك في لحظة الفزعه تحط يديك بيديني
وأبيك لياشكيت الياس تكون بساحة أوطاني
أبيك البلسم لجرحي وأبيك النوم في عيني
وأبيك اللي ليامني صحيت ألقاه بأحضاني
طلبتك يابعد ذاتي أمانه لاتخليني
تراني لو رحلت أبقى ضحية كيد عدواني
سألتك بالله الوالي سألتك لاتجافيني
لأني أموت بغيابك ياروحي وجثماني
معي واصل مشاويرك أواسيك وتواسيني
معي إبقى مثل ظلي حذاري لاتعداني
أبي منك الوعد إنك على غيري تبديني
وأنا هذا وعد مني ماأبيعك وأشري الثاني
إليك أهدي نغم شعري وكل عرق نبض فيني
وإليك أهدي شذى عطري وياسميني وريحاني
ومهما تقسي الدنيا علينا لاتعاديني
ولاتسعى أبد في يوم في عندي وعصياني
أبيك دكتور لآلامي من أحزاني تداويني
وأبي لاكفت أبصاري تكون النور لأعياني
وأبي لافاضت أنفاسي تكون أول معزيني
وأبيك بيدينك الثنتين تلف الجسم بأكفاني
وبعد ماأكون في قبري تذكرني وتبكيني
وأكون حزن على بالك ماتغفل وتنساني
أبي لاقالوا العذال وش اللي بينك وبيني؟
تبسم وتدمع عيونك من الحسره وفقداني
وتجاوبهم إني حي وبالأضلاع تخفيني
لأنك دمي اللي كان يضخه عرق شرياني
وأبي لازادت جراحك تخيلني وتناديني
وتفتش داخل شعورك وتهمسلي وتلقاني
وإذا طال السفر إقرا كتاباتي ودواويني
وقل ياكثر ماخلي كتب لي شعر وأهداني
ترى لو للقصيد عيون والله ماتقديني
لأني للقصيد عيون وإسمك رمز ديواني
وترى لو للحروف أهداب تعجز لاتغطيني
لأني للحروف إيحا ووحيك سر لإذعاني
تداركت الزمن يمك الا ياليت يمديني
أخاف أجيك متأخر وسيف الوقت ياطاني
نسيت من أجلك الصادق اللي الروح يعطيني
ونسيت الأول والآخر والقاصي مع الداني
وجاري المسح للباقي وأنت اللي تكفيني
حرام أحط معك غيرك وأحبك وأظلم الثاني
كفايه أنت في دنياي أمل باقي يسليني
أمل صوته إذا ضاع الأمل ألقاه بأركاني
تراك بعالمي شمعه تبدد ظلمة سنيني
وتراك بدنيتي دنيا لها لون وشكل ثاني
ودنيا" مابها حسك ماأبيها وعمرنا فاني:
أنا سميتك الدنيا وأنته وش تسميني؟
** منقول ومادري من قايلها
ريم : سآآآره وش تسوين ؟؟
ساره تمسح الدموعها بسرعه وبدون ماترفع راسها : ريموه كم مره قلت لك لا تخشين غرفتي بدون أستأذان
ريم بمياعه : إذا فاضيه أبيك تروحين معي للمصمم أطلع فستآآآني ما بقى إلا يومين على على عرس شريفة و للحين ماطلعته
ساره : أخذتي الأذن من أبوي
ريم : ايه وقلت له بعد ما نخلص بنروح السوق
ساره : على كيف كيفك تخططين ؟؟
ريم : يالله عآآد إينو مآآره طفش
ساره : طيب ضفي وجهك لبسي عباتك
----------------------------
أما بنات مقرن فعندهم حالة استنفار مع شناط شريفة و على كل غرفه من غرف البنات ملصقه أوراق
إلي مكتوب عليها لا تنسون الشنطه إلي بتاخذونها معكم القاعة حطوا فيها الصندل و0المناكير 00 و00 و 00
و إلي مكتوب فيها مسكة الورد جيبوها الساعه ثمان طبعاً نوره حاطه لها ورقة لها كاتبه فيها الشنطه الطبيه خذيها معك في العرس
ومنيره كاتبه تحتها أسهم ياليل القطاوه على هالشنطة خ , وشي مشطوب عليه وشي قيد التنفيذ ويا كثر دندرة البنات والمناسبات
حصة : ها شريفة خلاص متوكده إنك ما نسيتي شي تحطينه في الشناط إلي بنوديهم لبيت رجلك
شريفة : إن شاء الله ما نسيت شي ليتك تخلين نوره إذا رتبت الأغراض في الدواليب تكتب كل غرض وين حطته عشان ما ادور عليه وأتعومس
أمها : على خير إن شاء الله يالله قولي لنوره تعجل ترى عمها فيصل يحترينا من زمان
شريفة : الله يعطيكم العافية
حصة ضمت بنتها و هلت عبرتها : الله يوفقك يابنتي ويسعدك مدري وش البيت بعد طلعتك منه
و شريفة و أنواع الدموع ولعثمه : ياجعلني مابكيك يمه .
نوره أدخلت عليهم الغرفه : ياليل الليل من اللحين بدينا مناحه ههه و الله يا شريّفه رازينك ترى على الأقل بفتك من هالأغراض إلي
ماليه الغرفه أحس إني ماعاد إلا ارقد برا من كثر عفشك , أمي يالله سرينا ولا لك نية تكملين دموع ؟؟
أمهم وهي تبتسم : يالله يالله , شريفة ولمي الفطور لأبوك ترى عجنت اللقيمات قبل الآذان بساعة إلا ربع صبيه
شريفة : إن شاء اللة أبشري
في الطريق لبيت بو محمد ( شريفة بتسكن مع اهل زوجها
لأن محمد وحيدهم )
نوره : عمي , متى السفر إن شاء الله ؟؟
فيصل : إن شاء الله بعد زواج شريفة بأسبوعين على 7 أكتوبر
أم سعود : الله يوفقك و يسمح أمرك مير حنا ماودنا بسالفة سفر ما سفر لكن دام فيها مصلحتك الله يحفظك
نوره : آمين يارب يوفقك و يعرسك
فيصل وهو شاق الكشره : آآآآآآمين لا أرجع إلا مدورين لي على بنتن ضفره
أم سعود: أبشر وأنا اختك و يا بخت إلي بتاخذك
نوره حست إنهم قربوا : يمه اللحين كيف بندخل وش نقولهم بنحط أغراض بنتنا ؟؟ولا ندرعم وحنا ساكتين ؟؟
أم سعود : ههه لا يمه وش ندرعم أنا قبل ما اطلع كلمت ام محمد واستأذنت منها و المره عارفه الأصول بعد
نوره : أشوى
وقف فيصل قدام بيت بومحمد ماشاء الله فلة كبيره و فخمة و مبين فيها حديقة واسعة
فيصل : متى ما خلصتوا أتصلوا علي . حصة وبنتها : ما تقصر نخدمك بعرسك
نزلوا و دخلوا البيت و بتدوا يرتبون أغراض العروس
--------------------
مقرن و شريفة و موضي ومناير وسعود مقابلين السفره يحترون الآذان ( متعودين إن بعد عيد الفطر على طول يصومون الست من شوال )
مقرن : كأن المسجد إلي حذانا تأخر في الآذان
موضي : يبه أنت جويع ؟؟
مقرن يضحك : لا بس أقول , و أنتوا من يتكلم الواحد إلا طبيتوا في بلاعيمه
البنات وهم يضحكون : آذن سم بسم الله . أذكروا الدعاء وأفطروا
مقرن يهمس لشريفة : بعد ما أرجع من الصلاه أبيك بكلمة راس
شريفة بحياء : إن شاء الله
و كالعاده منيره تناظرهم و توزع أبتسامات و موضي مفهية .
مشعل عند باب غرفة بشاير متردد و الأفكار والهواجيس تلف في راسه ومافي إلا
صوت مساري مغني الشباب يصدح في أركان الغرفة و الممر
مشعل أتخذ القرار و طق الباب وصايح: بشاير بشاير
بشاير تفتح : هاه وش تبي ؟؟
مشعل بإبتسامة حيليه : أبغاك بسالفه ممكن أتفضل ؟
بشاير : خش ,اخلص علينا
مشعل لف ودار وتميلح عشان يستفسر
بشاير : أيه ذي منيره بنت مقرن , بس وش له هالأسئلة كلها
مشعل : بشوره حبيبتي اتشبكيني معها ؟؟
بشاير ومالها خلق : ناوي على عمرك انت؟ تبيها تتوطاني بعد لو قايل مويضي المفهيه بقول يمكن اجيب راسها لك , ترى ما بينهم فرق
مشعل : لا قلت منيره
بشاير : أقول ورا ما تدور ربعك
عيال سعد محد يحترم أحد الكل يذب على الثاني الحياه عندهم سايبه يحسبون كل شي يقدرون يملكونه بالفلوس
ما يدرون إن نقاء القلوب لا تنشرى ولا تقدر بثمن بالعكس هي تتجرد عن ملذات الدنيا وتفاهتها .
-------------------------
وبدأ العد التنازلي وبقوه شريفة تحس إن عقارب الساعة تهرول و بلمح البصر يتصاقعون ليعلنون إنتهاء ساعة و قرب ساعة خروجها من بيت أبوها و دخولها القفص الزوجة ساعة من لفظ فتاه إلى لفظ متزوجة 0000
أما ساعة محمد تتحرك ببطئ دايم ساعات الشوق تكون طويلة مدري هو العشق و الوله يأخر حركة العقارب ولا العقارب تتلذذ بتعذيب العشاق .
ليت الساعات تنطوي طوي
تريح قلب ٍٍ تولع بغزال ٍٍ يعربي
برمشة عيونه يدوي دوي
ياليل عجل طلبتك لا ترد اطلبي
- - - - - - -
وبعد ذلك 00 ولا أقول نخليها للبارت الجاي كأني كثرت عليكم >>هذا إذا ما نقشع خ
بس تتوقعون كيف بيكون زواج شريفة ؟؟ تهقون مشعل بيطول مناير بنت عمه ؟؟ ساره وش قصتها تقرا الطواريق وتبكي ؟؟
كل ذا وأكثر إن شاء الله في الجاي