يا اخواتي المتزوجات شورو علي بموت من اسلوب زوجي

السلام عليكم ورحمة الله وبركاته
بصراحة راسي انشل من كثر التفكير
ومو طايقه نفسي ولا حتى ولدي ولا حتى زوجي
وقلت ماللي من بعد اللة الا انتم اشكي لكم حالي يمكن القى حل معكم
الموضوه ياطويلات الاعمار
انا متزوجة من سنة ونص
وعندي ولد عمرة 5 شهور
المشكلة يابنات الاحظ ان زوجي متغير علي من شهرين تقريبا
لاتقولون عادي يتغير بعد الولادة او يمكن انه لقى مني شي خلاة يصد او اني انشغلت بالبيبي
لان كل الاشياء انا متفاديتها والحمدللة
واللي ياكدلي هالشي
انه لسى راغب فيني ويبي ينام معي ويشتاق لي حتى وانه جنبة
حتى صاير لة شهر يصحيني من عز النوم فالفجر مع انه نايم من 11
وعندة دوام بس على قولتة مشتاق لي والشوق ماله مواعيد
المهم يابنات انا الاحظ انه متغير في اسلوبه طريقة كلامه معي
دايم ساكت واذا فتحت معة موضوع قال راسي مشغول خلية بعدين
واذا فاتحته فيه قبل مانروح ننام
قال عليك اوقات مدري وش تبي هذا مو وقته هذا وقت نوم ولا ابي اوجع راسي
واذا صحيته لدوام مع انه متعود هو يصحى بنفسه بس انا صرت اصحية ابي اتقرب منه
قال مالةداعي لي 7 سنين وانا اصحى هالوقت ؟؟؟
وهو في الدوام ارسله مسجات ومرة يابنات ارسلت له مسج اه بس ياليتني ما ارسلته
ارسلت له(حبيبي صباح الخير لاتتاخر على الغدا مسويه لك غدوة تجنن وجب معك ياقلبي حليب لولدنا ابيض زي قلبك)
يقال لي اتميلح
بعدين ارسل لي
انا مغتث من الفطور لاتكثرين وشوفي اذا في الثلاجة حبوب بطن ردي لي؟؟
بالله وش اسوي فيه
الا وش اسوي بعمري
المهم من اسبوعين سويت جلسه حلوة في البيت وصرفت ولدي
ولما جاء جلسنا وقلت له انا متضايقة وانت متغير واسلوبك متغير
قال لي انتي تعرفين اني احبك
وقلت له ايه اعرف بس وش فايدتها اذا مقلتها لي الا وقت النوم وبصراحه ارتبطت هالكلمه بعلاقتنا الخاصه
تعودت اني ما اسمعها الا اذا كنت تبيني
وحسيت اني بديت انفر من هالشي
لازم نلاقي لنا حل ومن دون ما ادري بكيت
قام مسح دموعي وقال انا ما اتحمل دموعك بس انا مشغول هاليومين بقضية المعلمين (لانه معلم وعندة مشكلة مستويات ويبون يحسنون مستوياتهم)
المهم.....وانتهى الموضوع ولا عاد فتحة معي
بس هالاسبوع يا بنات بجد صاير ما يطاق اياساكت
او اذا فتحت معة موضوع وطبعا ردوده معروفه وهي ثلاثه وهي(هذا مو وقته:هذا وفت نوم:لا تسبقين الامور انتي تبيني اعطيك خبر وش بسوي بكرة وبعدة ما ادري كل شي بوقته)والى الان حبوبات وانا ما ادري متى يجي وقته
واخرتها اليوم رحت لهلي ودزيت له مسج قلت بنام عند اهلي الليله
قام دق علي وقال لا انا ما اتحمل وبعدين وين اتغدا بكرة؟
جاء اخذني وفي السيارة ساكت مدري وش اقول قلت حبيبي مافية بطاطسعشان الغداء
لان ودي اسوي لك غدا عمرك ماذقته
قال ماتلاحظين لنا فترة وانتي ماتسولفين انا وش نتغدا وش تبي عشاء قلت السوالف ما نسولف الا في الاكل؟؟
انا في هاللحظة بغيت افح الباب واحذف نفسي في الشارع
بجد مدري وش اسوي
قلت له لانه الموضوع الوحيد اللي تعطيني وجة فية وتاخذ وتعطي معي
وسكت ولاكني قلت شي حتى ماتعب نفسة انه يبرر لي او يسالني ليه قلت هالكلام؟؟
والله يابنات تعبت وانا احاول
سويت لة تغير جو وغيرت جو البيت
غيرت لبسي
ما ادري وش اسوي
ادري انة يحبني ويموت فيني
ونا اموت فية وما اقدر استغنى عنة بس بعد انا ابيه يحسسني انة يحبني
ولاتقولون لي يمكن مايعرف يعبر
لا بعرف قبل ما اولد قد سوالي وجاب لي
ومعلومة اخيرة حبيت اضيفها
الى الان ما عطاني طلاعة
واذا قلت له الناس يسالوني وش طلعك زوجك
يقولي بكل برود(الناس مو قدوتنا يعني لو كلن تزوج على حرمته ترضين اقلدهم بعدين انتي تدرين اني احبك)...بصراحة اقنعني
وهذي سالفتي
اتمنى ما تبخلون علي بمشورتكم لاني مالي الا احضانكم الدافئه تدفيني وتسمع شكواي