ساندوتش بالتوست خفيف ولذيذ للفطور او للعشاء من تطبيقي ومع صورةمن مطبخي

اهلا بأحلى فراشات..
اليوم العشاء سويت ساندوتشات خفيفة مرة .. وتجنن ماشاء الله.. وتنفع للفطور.. واكثر شئ اسويها للفطور...
وهذي صورتها.. لحقت ع اخر قطعه كانت مع اختي ,,وسحبتها وصورتها لعيونكم...
ماشاء الله,, لاقوة الا بالله ..
المقادير
خبز توست
وجبن شرائح>حقت الهامبورجر
وجبن بوك سائل او مايونيز لدهن الاطراف
وبيضة
وزعتر
وسماق
وملح وفلفل اسود
الطريقة:
جيبي شريحة خبز توست وحدة وحطي فوقها شريحة جبن السلايس وادهني اطراف خبزة التوست بالجبن السائل او المايونيز ثم اغلقيها بشريحة خبز التوست واضغطيها زين...
وفي زبدية اخلطي البيضة مع شوي زعتر وشوية سماق وشوي ملح وشوي فلفل اسود واخلطيهم زين...
ثم جيبي التوست واغمسيها بحذر في خلطة البيض من الجهتين ..ثم ع طول حطيها في مقلاة حارة ممسوحة بزيت زيتون.. وقلبيها لحد مايجمد البيض من كل الجهتين.. وتتحمر قليلا..
اذا استوت قطعي خبزة التوست ع شكل مثلث ,,, عشان يبان شكل الجبن.. وقدميها وهي حارة..
والله لذيذة وخفيفة جربوها وبتدعولي