3 أيام ببيت واحد لا أحاكيه ولا يحاكيني

السلام عليكم
اخواتي العزيزات ..
انا متزوجه من 4 سنوات وزياده ..
بداية زواجنا كانت المشاكل ماتفارقنا يوميا او اقل شي اسبوعيا
توصل مواصيل كبيره لكن بيننا
ومشكله وحده هي اللي اهالينا عرفوا فيها
زوجي انسان عصبي وحار وانا حساسه ما اتحمل الكلام الجارح
المهم عندي طفله وحده الان وعمرها 3 سنوات
وزوجي مافكر اساسا بالحمل يعني جبت الطفله هذي برغبتي انا .. وهو كان دايما يأجل
سبحان الله ماحسيت انه فرح فيها لكن الان طبعا بعد ما كبرات اكيد يحبها ويخاف عليها
كل العالم .. بعد مايتم الطفل سنه او سنتين يفكرون بالحمل
هو ولا يبي ولا عنده ادنى استعداد ... يقول ليش مستعجلين..؟؟؟
هو عمره فوق ال30 وانا بال26 وعندنا بس واحد
عادي لما يكمل 3 سنوات .. خلاص يفكر بالبيبي الثاني يمكن مايجي بعد على طول
لانه تخيلوا سنتين وانا اخذ حبوب منع الحمل....
ولما اقول يضرون يقول لالالا عادي كل الحريم ياخذونهم
بس انا سنتين متواصل؟؟؟
مايبي انو يسوي عزل ولا يبي برا ولايبي عازل
يبي ينبسط وانا اكلل حبوب
قبل 3 شهور قلتله انا بترك الحبوب .. انا اخاف يجيني عقم منهم ..
قال : انتي تسمعين كلام الناس... وماتسمعين كلام زوجك.... الناس ماينفعونك
قلت اي ناس اي زوجي ... انا اسمع كلام نفسي وكلام الدكتورة اللي انهبلت لما قلتلها
قال الدكتورة غبيه وماتدري وش السالفه
قلت عاد انا قلتلك ما راح اخذهم وانت كيفك
استمر هو على وضعه ... يعني بدون عزل ولا برا وانا ما اخذ حبوب
بس اني اول ما ينزل اروح ركض للحمام
المهم نجي لمشكلتنا اللي صايره من 3 ايام
اولا ... انا ما انكر انه هو يحب يبسطني ومتساهل بطلعاتي ومع اهلي اروح وين ما ابي
بس حار نار
المهم
قبل 3 ايام... كان جاي من الشغل ونام ودوامه صعب شوي ويجي متاخر
قام العصر ... وراح يقضي اشغاله اللي بعد العصر
لما جا فالليل .. كلمني قال .. ودك نطلع نتمشى؟؟
قلت اوكي ... وهو ما يحب طفلتنا تروح معنا ... يحب نكون لوحدنا ... مع انو مو لهالدرجه رومنسي
بس الظاهر مايحب الازعاج
والطفله صارت تفهم يعني تحتاج تطلع تنبسط مع ماما وبابا
ماعلينا ... تهاوشنا كثير عند هالموضوع...
ركبت السياره وطبعا مشاويره اللي ذلني فيهاا مو سوق والا مطاعم
لالا
يلفلف فيني بالسياره وناخذ كوفي ونرجع
المطاعم والسوق من زمان عنهم
ركبت معه وسواليفه تجيب الهم ...
يتكلم عن اهله ... وضعه بالشغل
يشتم بفلان لانه ما يتسامح معه بالدوام ...
ودي يتكلم عن حياتنا مستقبلنا ..
بالعكس بهالامور .... عكس تفكيري
بالصدفه شفنا صاحبه واقف عند سوبر ماركت ... ومعه 3 اطفال اكبرهم 5 سنوات
وماسك هذا ويشيل هذا ....
قعد هو يتريق فيه قال .. تصدقين فلان هذا كان برستيج ... وشوله يجيب اطفال كثير
توه عالمشاكل ووجع الراس
قلت انا بالعكس ماشالله عليه وسيع بال .. يحب الاطفال
قال انا ما أأيد هالفكره ,,, وشوله !!!!
(( انا متاخر علي الدورة كم يوم ... قسم بالله يابنات اخاف اطلع حامل... بتقولون وشدعوه؟؟؟))
(( والله خايفه لاني ماعندي زوج احس متحمس للفكره ))
انا ما ابي اجيب اطفال وانا فوق ال35 ... وخصوصا ان حملي وولادتي متعبه ... لكن مافيه احساس
المهم اخذت وعطيت معه وحاولت اوصل له انو الاطفال اهم شي بالدنيا
قال انا ما استمتع بالاطفال <=== هو قالها بالغلط وحاول يضبطها بس ماقدر
المهم سولفنا شوي
لما جينا بنوصل البيت قال ... انتي متغيره مره ماصرت احس ب لذة السوالف معك...
اول كنت اي شي اقوله تقولين صح... والحين تناقشين وتخالفين
انا : خنقتني العبره ... قلت شدعوا يافلان ... انا ماتحس باللذه وانت تسولف معي
كذا تختم هالطلعه
قال: حاول يضبطها ماقدر وقلبها على راسي ..
قال انتي ماتستاهلين طلعات ولا روحات... انتي لازم تنطقين بالبيت ... وانتي وانتي .................الخ
طبعا هواش
وانا ابكي من ورا العبايه...
رحنا للغرفه و البنت لسا مانامت .. ومعصب وحالته حاله وانا دموعي تنزل زي المطر
وانا نفسيتي هاليومين صايره محطمه مره ... واحس بس ودي اصيح... وكأني ماودي اشوف وجهه
تهاوشنا وقال اسكتي لاتصيحين قدام البنت عساكي للموت <== لاحظوا شلون الدعوه
سكت ورحت للحمام وابكي
راح بينام ... جيت عنده قلت انا ودي ننام مرتاحين الله يخليك..
ماعطاني وجه وتضايقت ... وقال انتي ماعندك احساس ويرفع صوته ويدعي علي ويسبني
والبنت تصيح ويقول لاتبكين عندها بكرا تقول للناس <== اللي همه الناس مو البنت اللي تقطع قلبها
انا هنا انفجرت وقلت حرام عليك انا وش سويت؟؟؟
قال انتي شر ... انتي بليس
قلت ارجوك لاتتكلم معي بهالطريقه انا تعبت واحس اني بموت منك
قال عساك للسرطان ...
واذا ما انقلعتي غسلتي وضبطتي الوضع عند بنتك انتي طالق ..
تخيلوا يحلف بالطلاق وش عشانه؟؟؟
انا هنا كرهته وكرهت نفسي وحسيت نفسي ولا شي لاني متحملته
دخلت الحمام وقفلت على نفسي
لما شافني تاخرت طق علي الباب وانا ساكته 5 دقايق
قال تعوذي من ابليس هذا ابليس دخل بيننا
مارديت عليه
بعد مامليت طلعت
وحاول يخليني انام بس انا ماكان لي نفس
تخيلوا كانت الساعه 3 الفجر
(حسبي الله ونعم الوكيل)
نام وانا نمت وماقدرت اقوم معه للدوام
واسمعه وانا نايمه يبرطم ... يقول والله هالحريم مايحسون ...... حسبي الله ...
المهم جا من الدوام وانا في اشد حالات الكره له ...
تخيلو دخل ماسلم بعدين قال سلام بدون مايناظرني
جا حط راسه عالمخده ..
قلت انا بروح لاهلي احس نفسي مخنوقه
قال لا
قلت لو سمحت قال قلت لا
تركته ورحت لغرفه الثانيه وجلست فيها
ولما قام العصر ناداني مرتين وانا نايمه عالكنب ... بدون مايقرب لي
لما مارديت طلع من البيت وسكر الباب بقوه وهو يبرطم
والحين يجي ويروح وانا بمكان وهو بمكان
احس كارهته
سب وشتم ولعان ويدعي علي بالموت ... وسرطان اعوذ بالله ... ويحلف بالطلاق
عشان ايش؟؟؟؟
والحين يقول انا اوريك والله لو تموتين ما اوديك مشوار ... ماتستاهلين
اقسم بالله لسانه زفر ... وجواته فيه حقد
بنات ورب البيت انا محترمته ومقدرته ... وماينقصني شي بالشكل والكل يشهد لي
وهو زمان كان داما يمدحني
الحين لا ... بالعكس يدور اي شي يعيبه فيني ... ولما اقول فلانه تقول عني كذا ... يقول تجاملك.... ويضحك وهو عارف
المهم ... انا لي 3 ايام ما اتكلم معه
وهو ماجا يكلمني من بعد ماناداني امس .. بس لما شافني نايمه عالكنب بوضع متعب
ارسلتله امس رساله
وقلتله انا ناقشت بموضوع الحمل لان انا متاخر علي الدورة كم يوم وخفت اكون حامل وودي تغير نظرتك
ومن حقي اناقش بهالموضوع بدون ما ابرر
ولا رد علي
قسم بالله ودي اروح لاهلي ولا ارجع ...
انا مازرتهم وكل يوم يكلموني ولا ودي اقولهم فيه مشكله بس قلتلهم ان زوجي تعبان شوي
من جد بنات احس مليت
يكفي اني ماعندي استقلاليه .. وساكنه ببيت اهله ..
غرفتين وحمام
وهو كان قايل لي بيصير لك استقلاليه
من جد مليت
تصدقون اني دخلت باخذ شي من الغرفه اللي هو نايم فيها
احس كارهه حتى اشوف وجهه والا احس بريحته
لاتقولون لي كلميه بدلع
لالالالا اهان كرامتي وسبني ودعا علي .... يكفي ماجاني