ooصينية رز مع فيليه سمكoo

Riyadh's beauty

28-10-2022 - 10:44 pm

السلام عليكم ورحمة الله وبركاته
صينية رز مع فيليه سمك
طبخة جدا رائعة وسريعة وهي من اختراع بنت عمتي وأخت زوجي
بسم الله نبدأ
المقادير
سمك فيليه يكون خفيف ومافيه ريحة / رز / زيت / زيت زيتون / صوص الصويا / نص فنجان خل
زنجبيل مبشور تقريبا ملعقتين / بصل حول 3 حبات / بصلة صغيرة مقطعة نص حلقات
ثوم مطحون / 2 طماطم مسلوقة ومقشرة أنا حطيت 3 بس طلع كثير / كزبرة مقطعة
الرز
نكشن البصل ونضيف له الثوم لين يصفر ثم نضيف ملعقة كبيرة زنجبيل
نضيف حبتين ماجي والبهارات (ملح-فلفل أسود-عصفر-كمون- كزبرة ناشفة)
أضفت شوي موية عشان تتسبك وماتلصق بالقدر
وهذا بعد ماتسبكت
نضيف الرز والموية ونخليه لين يستوي الرز >>معليش ماصورت خلصت بطارية الكامرا
الصوص
نكشن البصل والثوم مع فنجان زيت زيتون
نطحن بالخلاط الطماطم المبشورة - الخل - ملح - عصفر - شوي موية - فلفل قرون أو مطحون
وبعدين نضيفها للبصل ونتركها تتسبك زين وبكذا يكون جهز الصوص
السمك
نكشن البصل والثوم ثم نضيف الزنجبيل المتبقي ونضيف السمك وانقلبه عشان ياخذ النكهة
>>مثل ماقلت لكم خلصت بطارية الكامرا فما صورت هالخطوة
نضيف البهارات (كمون - كزبرة مطحونة - ملح - فلفل أسود)
>>لاحظوا الكزبرة تكون كثيرة شوي والكمون أقل لأن الكزبرة تسوي نكهة مره حلوة عاد بكيفكم
نضيف صوص الصويا ونقلبها ثم نضيف الكزبرة الخضرا
نغطيها مدة دقيقتين لا تطول وبكذا يكون جهز السمك >>>انتبهوا ترى كل مدة الطبخ حول 12 دقيقة لاتطولون أكثر عشان ماينشف السمك ويصير دجاج
للتزيين
نحمر حلقات البصل
أخيرا
نجهز صينية ونحط فيها الرز وبعدين نضيف عليه السمك ونوزعها فوق الرز
نضيف شرايح البصل المحمرة وكزبرة خضرا مقطعة>>حطيت بقدونس عشان خلصت الكزبرة
نغطيها بقصدير وندخلها الفرن بس شوي عشان ياخذ الرز طعم السمك
وهذا شكلها
Zoom
وهذا صحني
وهذا صحن زوجي
يالله بسم الله نبدأ
لا تحرموني ردودكم والله تعبت بالصور والتعديل والتحميل أكثر من الطبخة

التعليقات (8)