إذا تحبيني قلبك شاريني لا لا تخليني ولا لحظه

أهداء إلى كل من سيقرأ حروفي
هذه الرساله اوجهها من قلب إلى قلب ..
إلى كل قلب ذاق حلو الحب ومره .. إلى كل المحبين .. إلى كل العشاق
إن الحب ليش مجرد كلمه تقال في احتفال .. او تكتب في سطور ..أو مجرد حروف تقال في شعر
إن الحب شيء عظيم .. إن الحب احساس رائع .. ولا يوجد من بعده احساس أروع ..
إن هذا الأحساس يجعلك إنساناً مختلفاً عما كنت عليه سابقاً
فتصور !! إنه عندما تكون قي أعلى درجات الغضب .. فإن مجرد كلمة بسيطة من المعشوق تجعل هذا الغضب يختفي وكأنه لم يكن أصلاً ...!!
إن الكثير منا .. يسهر لياليه .. ولا بغمض له جفن .. تقول لي لماذا ..؟؟ .. لأنه يحلم .. يحلم بذالك الشخص الذي سوف يعشقه ويهديه حياته
ويرسم ملامح لذلك العاشق المجهول .. ويتمنى أن يأتي اليوم الذي يجمعه بذلك الإنسان .. ويعيش معه أحلى اللحظات .. ف يعد الأيام والليالي منتظراً قدومه ...!!
فأيها العاشق الولهان .. عش حياتك .. لكن في حدود دينك .. واعلم ما علمتني إياه الحياة .. إن الحب يأتي في الوقت الذي لاتتوقعه .. يأسر القلب من دون أستأذان .. فهو أبداً لا يعرف كيف يطرق الباب .. واعلم .. إنك لا تختار من تحب .. إنما قلبك هو الذي يختار ...!
وأخيراً .. هل عرفت المعنى الحقيقي للحب..؟؟ إن الحب هو أن تعشقَ وتُعشق .. هو أن تهدي حياتك .. وتُهدى حياة .. هو أن تشتاق ويُشتاق إليك .. هو أن تشكي همومك لعاشقك
ويشتكي لك .. هو أن تقربه إلى قلبك كلما احتاج إليك .. وتعاتبه عندما يطيل الغياب .. إن الحب بكل اختصار .. هو أن تغمض عينيك وتسلم حياتك لمحبوبك .. وتخلص له مدى الحياة .. هذا هو الحب الحقيقي ....!
|| بقايا حب ||

شخصيات القصه مجرد اسماء ..
وراح تقدرون تعرفون شخصية كل شخص من خلال الأحداث ..
\
عائلة بو متعب /
ابو متعب : (( محمد )) كبير العائلة
ام متعب : (( جواهر ))
متعب : 34 سنه - متزوج بنت عمه روابي وعندهم (( نايف )) اربع سنوات و (( نوف )) سنه
فهد : 30 سنه
فيصل : 27 سنه
مرام : 24 سنه
ساره : 19 سنه
فارس : 13 سنه
ريم : 10 سنوات
\
عائلة بو وليد /
ابو وليد : (( ضاري )) اخو بو متعب
ام وليد : (( رغد ))
وليد : 29 سنه
خالد : 27 سنه
روابي : 24 سنه – متزوجه متعب
اسيل : 19 سنه
طارق : 15 سنه
\
عائلة بو حمد /
بو حمد (( احمد )) : اخو بو متعب وبو وليد
ام حمد (( وفاء )) : اخت ام متعب
حمد : 29 سنه
سطام : 27 سنه
مشاري : 25 سنه
حلا : 25 سنه – متزوجه ولد خالها ثامر وعندهم (( سعود )) خمس سنوات
ضي : 20 سنه
بيان : 18 سنه
\
عائلة بو ثامر /
بو ثامر (( صالح )) : اخو ام حمد وام متعب
ام ثامر (( ندى ))
ثامر : 32 سنه متزوج حلا
زياد : 28 سنه
تهاني : 20 سنه
غلا : 18 سنه
ريان : 15 سنه
ريهام : 11 سنه
وفيه شخصيات طبعاً بالقصه راح تظهر مع الأحادث ومااخفي ان لهم دور وبطوله بالقصه مره (( كبير ))
التقيكم الليله مع أول عشر بارتات ..,.

واو حبي القصة تبين مرة حلوة
تسلمين حبي ونزلي البارتات بسرعة
يسلمو

بليز نزلي البارت

تسلموون على هالطله
والحين بنزل اول عشر بارتات ^_^

: )( :" !!.. إذا تحبيني .. قلبك شاريني .. لا لا تخليني .. ولا لحظه ..!! ": )( :
للكاتبه (( بيان حبك ))
\
/
>> الجزء الأول <<
يوم الثلاثاء في بيت (( بو متعب )) /
كان صوت اغنية تنحط ع الجرح يبرى لراشد الماجد مرتفع لأعلى شيء في الأستريو ..
طلعت ام متعب من المطبخ وهي مفتحه عيونها لاخر شيء / وش فيكم بسم الله ..؟ ليه مطولين على الاغنيه كذا ..؟ الله يتوب علينا يارب
جاها ولدها يركض ووراه تركض اخته
فارس/ يمه يمه شوفي ساره ذبحتني كفوف من اليوم
ساره / يمه اتركيه عنك يكذب .. كل دقيقه احط السماعات في اذاني ويجي يشيلهم ويخلي الصوت يهز البيت هز
ام متعب / وطيب انتي ليه تطولين عليه كذا تبين تفجرين اذانك ..؟
ساره بدلع / يمه وش افجر اذاني عادي اقرا واسمع الأغنيه بس هذا فويرس جنني طلع الشيب براسي
فارس / روحي بس مين الي متسبب وبادي مو قبل شوي خربتي علي البلاي ستيشن جايه تركضين وقطعتي السلك وراح كل تعبي للتوصيل في اللعبه ..؟
الام / وبعدين ..؟ ليه ماتتذابحوا قدامي ..؟ مو احسن
ساره خافت على امها / يمه قلبي لاتعصبين خلاص ولايهمك ماراح اتهاوش معه .. فويرس خلاص لاتعصب بأمي يلا انقلع مناك
فارس / شفتي وش تقول انقلع هذا اسلوب ..؟
ام متعب / الله يهديكم يارب وخروا طيب
لفت ام متعب وراحت المطبخ وبس دخلت ..
مسكت ساره فارس من ثوبه / انت يالبزر تعلم كيف تحاكي الي اكبر منك مره ثانيه .. طيب ..؟
فارس يحاول يهرب / اتركيني وجع سوير روحي قصري على الاغنيه بس روحي
ساره ترتكته وهي معصبه / ايه وربي علشان امي ولاكان كفختك يلا مناك
راحت ساره تسكر الاستريو وفارس راح يركض على الدرج ويصاارخ / سوير الدوبه تحب المقلوبه
ساره وهي تصاارخ من تحت / فارس وربي اذا ماسكت بجيلك فوق وبسطرك
فارس التفت وهو يركض بالدرج / ياهو حاول ..
وماكمل جملته الا وهو صادم بشيء طويل وتوه بيطيح على ورا الا مسكه شخص
فارس وهو ماسك راسه / اي راسي فيصل الله يهديك ماتشوف
فيصل رافع حاجب / من الي مايشوف يلا مناك روح فوق
فارس / وش فيكم كلكم علي مناك مناك ..
فيصل وهو ينزل مو مهتم فيه / لانك دوب ترفع الضغط
وقف فارس يطالع بأخوه وهو ينزل لما اختفى ..
فارس يكلم نفسه / وش فيهم علي كل ذا علشاني احلى منهم جسم ..؟
نزل راسه يناظر جسمه الي زاد خمس كيلو بهالأسبوع بس .. حط يده على بطنه (( وجع جوعوني هالخبلان ))
مشى قدام يبي يروح غرفته علشان ياكل شوكليت ووقف قدام غرفه .. تردد يطق الباب ولا ..؟ تراجع بآخر لحظه لف بيروح ..
بس الغرفه انفتحت ..
(( فروسي ..؟ ))
فارس لف متفاجىء ووجهه احمر ..
(( فارس تعال تعال حبيبي ))
\
تحت كان فيصل يسولف مع ساره
ساره / يعني قررتوا وين تروحون بكره ..؟
فيصل / ان شاء الله راح نرووح دبي ..
ساره / طيب ودوني معكم تعرفون اني اموت بالامارات
فيصل / ادري انك تموتين فيها وان شاء الله تتزوجين وتروحين هناك وتفكينا من خشتك بس وش اسوي سطام بيروح معنا مايصلح ناخذك معنا
ساره / قال ايه يفتك من خشتي اساسا لو اغيب عنكم دقايق ساره ساره .. اجل وش تسون لو اروح الامارات
فيصل بنعومه / نموت
ساره تمسك المخده وترميها عليه / يعرف يرقعها المهم انا ماعلي من سطام وبعدين هو ولد عمي عادي مافيها شيء
فيصل / لا والله ..؟
ساره / أي والله .. يعني بس انت وفهد تروحون وانا انطق هنا ..؟
فيصل / لاتنطقي اجلسي مع امي وابوي وجدتي واخواني وكلها الأربعاء والخميس والجمعه وراجعين لك ..
ساره / امي وابوي وجدتي موفاضين لي وريم وفارس بزارين وش اسوي فيهم و .. و .. ا (( سكتت تناظره )) انت خابر الي بقت وش فيها ..
ناظرها فيصل بأبتسامه حزينه ولمس كتفها بحنان / ساره انسي كلها كم يوم وربي يهديها وترجع مثل قبل وأحسن بعد ..
ساره تجمعت الدموع بعيونها / كم يوم وترجع ..؟ لها الحين شهرين وهي كذا وانتوا كل مره تقولون كم يوم وترجع ..
فيصل / ساره ..!! خلاص ادعي ان ربي يهديها وبعدين كل شيء وله حدود ..
ساره ماقدرت تستحمل اكثر وحست ان دموعها تجمعت ..
انفتح باب الصاله ودخل منه بو متعب ..
بو متعب / السلام عليكم ..
ساره + فيصل / وعليكم السلام ياهلا والله ..
راحوا يحبوا راس الوالد وهو يناظرهم بحنان ..
بو متعب / وش اخباركم حبايبي اليوم ..؟
ساره / تمام بشوفتك يبه
فيصل / الحمدلله يبه انت وش مسوي من طلعت الصبح ماجيت
بو متعب وهو يجلس على الكنب ويتنهد / آآه والله ياولدي الشغل مايخلص وانا ابوك .. لازم احد يقابله وتعرف متعب تعبان من شغله هاليومين وماخذ اجازه عندنا ..
فيصل وهو يجلس جنب ابوه / افا يبه وين رحنا انا وفهد ..؟
بو متعبت يلتفت على فيصل ويبتسم / انتوا فيكم الخير والبركه .. بس تعرف فهد وشغله الي مايلخص .. وانت ياولدي مو مقصر بس ماراح تعرف بأمور شغلنا المعقده ..
فيصل يعني انه زعلان .. عقد يدينه على صدره وكشر / اجل انا مااعرف يبه .. فهيد وميتو اذكى مني
ساره وهي تستمع لهم بصمت جاتها الضحكه من حركة فيصل / ههه
بو متعب / ههه لا مو اذكى منك ياولدي بس انت ماتعلمت عليه لو تعلمت مثلهم كان عرفت قبلهم
فيصل يعدل جلسته ويبتسم / ايه زين الحين ارتحت
ابتسم بو متعب لولده ولف يناظر ساره الي وجهها حمر على طول بطبيعتها الحيويه ..
بو متعب / اقول فيصل مو كن ساره محلوه اليوم
فيصل بدفاشه / لامحلوه ولاان يحزنون
ساره عصبت وهي مستحيه / لاوالله احلف اجل انت الي محلو كل يوم تشين
فيصل يعدل شماغه بغرور / ايه حاصله لك حلاوتي ..
ساره حطت يدينها على خصرها / لاوالله خل حلاوتك لك
قام بو متعب وهو يضحك على عياله الي كل واحد اهبل من الثاني مع ان عمرهم كبير / الله يهديكم يارب .. على ماتتهاوشوا اروح اريح ..
فيصل / ههه استغل الوضع بو متعب
ساره بدلع / فديت البابا والله .. دوم مرتاح يارب ..
فيصل يناظرها بتكشيره / ترى مايناسب الدلع وبابا وماادري وش
ساره / ماراح ارد ان
بو متعب / ههه والله لو اجلس انتظركم تخلصون ماخلصتوا .. يالله مع السلامه ..
ساره وفيصل / الله معك
فيصل وهو يقوم من الكنب / يالله انا استأذن بعد وراي مشوار ..
ساره / يوه تو الساعه تسعه اجلس مابعد نكمل هوشتنا ..
فيصل يناظرها على جنب / خليها بعدين نكملها (( وقف لحظات .. بعدين كمل )) ولاقولك عندي اقترااح (( وبتطنز )) خلي فهد يتهاوش معك ولا ولد عمي وليد ..
ساره فتحت عيونها لحظات بعدين استوعبت الي قاله / ههه واله فله علشان يعطوني كفوف توديني في ستين داهيه .. ذولا ثقال دم مايعرفوا المزح
فيصل فيه الضحكه / ايه عرفي قدري يالله سلاام
ساره / الله معك خيو
ناظرته ساره وهو يطلع وتنهدت .. (( آآآآه فديت وليد والله وثقالة دمه )) ..
قامت وراحت فوق غرفتها ..
\
بنفس الوقت في بيت (( بو ثامر )) /
وقفت ام ثامر عند الدرج ونادت / يمه تهاني يمه تعالي ضي تبيك على التلفون ..
نزلت غلا بسررعه وهي تخطر درجتين درجتين ..
غلا / مازالت على الخط ..؟
ام ثامر تناظر لبسها / ايه بس هي تبي تهاني ماتبيك ..
ضحكت غلا على نظرات امها / ههه ادري بس تهاني تاخذ دُش الحين وانا بكلمها ..
ام ثامر / طيب وش ذا اللبس الي لابسه ..؟
غلا ببرائه تناظر لبسها / وش فيه ..؟
ام ثامر / وش فيه ..؟ وش يعني وش فيه لو مالبستي شيء احسن قصير ومشقق ..
غلا ماتت ضحك على امها / ههه الله يهديك ياأمي هذا يسمى برمودا ومشقق لأن هذا الموضه ..
ام ثامر عصبت / لا ؟ اجل هذه الموضه ؟ والله شكلهم بالنهايه بيسوون اوراق شجر ويقولون لكم البسوهم هذه الموضه وانتوا بتصدقون ..
غلا / ههه فديتك يمه .. (( حبت راسها تراضيها وكملت )) بروح اكلم ضي لا تعصب علينا ههه
ام ثامر / يوه نسينا البنت روحي ..
راحت غلا وخذت السماعه / هالو جيرل ..
ضي بصووت يبين انها معصبه / وعليكم السلام ورحمة الله وبركاته ..
غلا مسكت ضحكتها / هاو آر يو ..؟
ضي / والله يوم شفتك نوت فاين ثانكيو ..
غلا / ههه عربي مخلوط بأنجليزي .. انا الحمدلله تمام اسأل عنك ..
ضي / ماسألتك عن حالك وين تهاني ؟
غلا مسويه انها زعلت / افا طيب طيب مشكوره هذا جزاي جايه اركض من فوق يوم شفت تهاني تتروش يالله بااي بقولها انك اتصلتي فيها
ضي / لحظه لحظه يمه كلتني ههه ياعمري انتي كنت معصبه لأنكم خليتوني ساعه احسبكم تسولفون ..
غلا ببرائه / لا ماسولفنا ابدن ابدن
ضي / ابدن ابدن اجل خ وينكم يومين ماشفتكم لاتقولون دراسه وربي ماراح اصدقكم لو تجيبون نسبه كامله ..
غلا / ههه لاننا ماارح نجيب اساسا .. بس وربي هذا انا اذاكر 24 ساعه تهاني هي الي ولافتحت شيء دايم على النت ..
ضي عصبت / ايه اعرفها الدوبه القليلة الأدب ماتصلت علي يومين وبالنهايه صاكتني بلوك ..
غلا / ههه من صدقك ..؟ استحاله تسويها يمكن ماتدخل ماسنجر ..
ضي / لا اعرفها تدخل بس العله عله ..
غلا / خ تأثرتي ببيان يالأخت ..
ضي / ايه والله ياحبي لها اختي اسبوع ماشفتها مسكينه مع هالثانويه العامه ..
غلا / لا والله يعني انا مو ياحبي لك وماكني معها بالصف جنبا الى جنب ..
ضي / ههه الا بس انتي كسلانه هي ماشاء الله من فتحت المدرسه وهي تذاكر .. نادر نشوفها
غلا / تكفين تذاكر وربي انها دايم على ام بي سي تو .. تعلميني فيها
ضي / عاد هذا اكيد استحاله تعيش بدون هالتوو معروفه بيان .. بس عندها تلفزيون بغرفتها يعني مانشوفها حتى وهي بوقت الراحه
سمعت ضي صوت وراها ف لفت تناظر ..
شافت سعود داخل يركض وهو يضحك ومشاري وراه يركض يبي يمسكه ..
سعود / خالتو خالتو ساعديني
حطت ضي السماعه عشوائيا ونزلت بنفسها شوي وفتحت يديها وضمته بسرعه وهي تضحك ..
وقفت / ههه سعودي اشتقت لك كثير دلبو ..
سعود حاط صبعه بفمه وهو يضحك / ههه انا بعد بس خالوو مشاري يبي يعضني .. (( ويأشر على مشاري الي يبتسم ويعدل شماغه وهو يقترب منهم ))
مشاري / مساء الخير للحلوين جنني ولد اختك لما حسيت ان الشيب طلع فيني
ضي / مساء الورد ههه وربي انه يجنن بس مايطلع الشيب
سعوده يصفق / الشيب بجدو
مشاري / ههه اي جد تقصد ابو امك ولاابو ابوك ههه
سعود / لا جدوو بابا ماما
ضي / ليه ينتابني احساس انه هندي خ
مشاري مات ضحك على اخته / ههه حلو ينتابني شكلها متعوب عليها
ضي شهقت وحطت سعود بالأرض ولفت تاخذ السماعه
ضي / ا .. الو
غلا / لا تو الناس كملي سوالف وخلي الشعور ينتابك عدل
ضي حطت يدها على فمها / ههه يالبى قلبك وربي هالسعود ياخذ قلبي
مشاري من وراها / مين قريدة الحظ الي نسيتيها ههه
ضي تأشر بيدها يسكت / ههه هذا اخوي مشاري ههه
غلا تقلدها / ههه .. ههه .. ههه .. تذكريني بليلى اذا جات تضحك
ضي عصبت / وجعوه ماشبهتيني الا بالنسره الي معاكم بالفصل
غلا / ههه علمتك عنها بيان
ضي / اي وشفتها بعد يوم رحت مدرستكم بحفل التخرج ..
غلا / وربي ترفع الضغط مع غرورها
مشاري ياخذ السماعه / اقول بلا حش بالبنت استحوا على وجهكم
غلا استحت / ضي ؟
مشاري يستهبل / ياروح ضي ..
ضي تسحب التلفون وهي معصبه / مشاري استح على وجهك شوي .. هذه مو من بناتك .. بنت عمك
مشاري يبتسم بأستهزاء / لا من بناتي متى تزوجت انا الله يخلف
ضي / هجري ه هجري بايخ .. غلاا سوري حبيبتي .. الجرئه زادت بأخوي شوي ..
غلا ومازالت مستحيه / لا عادي اعرفه انا يالله اجل ضي بقول لتهاني تتصل عليك وراي مذاكره ياقلبي ..
ضي / اوكي مااعطلك ذاكري زين .. وقولي لتهاني اني بوريها شغلها لو شفتها ..
غلا / ههه ان شاء الله مع السلامه ..
ضي / مع السلامه ..
حطت ضي السماعه وناظرت اخوها الي ماسك سعود ويقلب بالريموت ..
ضي / ياسلام متونس بعد .. فشلتني مع البنت ..
مشاري مو مهتم / تكفين تراها بنت عمك يعني انتوا دايم تتهاوشن ماصار الا اليوم فشلتك ..
ضي / حتى لو بنت عمي انت تعرف ان الكل يعرف انك مغزلنجي واخاف تفهم المزح غلط
مشاري يلتفت وهو يحط الريموت وسعود / هجري ه هجري احلفي ياشيخه قال ايه مغزل نجي اقول خليني اروح فوق احسن ..
راح للمصعد وضغط عليه وقبل مايدخله التفت لضي / اتصلي على حلا وقولي لها ان سعود في بيتنا لأني خذته اوديه الملاهي وجبته هنا على الطريق ..
ضي ومازالت معصبه / ان شااء الله ..
التفت لسعود وجلست تلعب معه شوي .. بعدين خذت الجوال تتصل بحلا ..
حلا / هلا بقلبي هلا بحبي هلا بروحي هلا بكلي هلا بأهلي هلا بأختي
ضي / خلصتي ..؟ ممكن اتكلم
حلا / مالت عليك وعلى الي يدلعك بس طيري احسن لي ادلع زوجي وبس
ضي / وأحد قالك لاتدلعي زوجك دلعيه بس بعديني عن طريقك
حلا عارفه اختها ليه معصبه لأنها ماجاتهم من مده وضي ماعندها احد تسولف معه بيان كله تذاكر
/ يابعد روحي انتي وش ابعدك عن طريقي وانتي اختي الي مالي غنى عنها
ضي / ايه ايه وربي مصلحه علشان اسامحك ولا لااختك ولاان يحزنون
حلا / مالت عليك تبريتي مني يالعله
ضي ماتت ضحك / ههه ياحليلك يابيان مو بس أنا مأثرة فيني حتى انتي خ
حلا / ايه ياعمري بيان .... الا على طاريها وش اخبارها مع المذاكره
ضي / ههه تمام والله مسكره على نفسها .. بس لو تسمعك غلا تقولين ياعمري بتعصب بتقول انتوا بس تدلعونها وهي مسكينه دايم هوشه مع تهاني
حلا / ههه ياحليلها تهاني والله شفتها قبل امس بالراشد محمله السوق كله ..
ضي شهقت / ياقليلة الأدب انتي وياها ليه تروحون الراشد ولاتقولون لي ..؟ ولا مشكلتها غايبه لها يومين هالتهانوه
حلا / ههه رايحين انا وثامر نتمشى ذبحنا سعود من الصيااح .. بس تهاني تشتري ملابس حق الجامعه وبنفس الوقت حق عزيمة عموو ضاري ولانسيتي ان وليد بيجي من السفر وبيسون له عزيمه ..
ضي / ول تو الناس العزيمه اول العطله وباقي شهر تقريبا على العطله ..
حلا / ههه تعرفين انتي تهاني عاد تتجهز قبل اي شيء مع ان ماباقي الا اسبوع على اختبارات الجامعه بس ولاهمها ..
ضي / لاتذكريني على الأختبارات مو فاهمه شيء بهالعنقليزي ..
حلا / خ عنقليزي ياحلوك بس .. مااحد قالك تخصصي انجليزي ... (( التفت وشافت ثامر داخل البيت )) .. ضي حبي سلمي على الكل وحبي لي بيوني ثامر رجع ..
ضي / وجع بس رجع بتسكر ..
حلا عصبت / قولي ماشاء الله لاتصكينا بعين ..
ضي / ههه ماشاء الله يمه منك .. الا صح تذكرت ليه اتصلت فيك ..
حلا / تو الناس يوم جيت اسكر .. ليه ياحظي ..؟
ضي / سعوود ترى جابه مشاري بيتنا .. مروه اذا تبونه ولا ارتاحوا اليوم منه خلوه ينام معي ..
حلا / يوه الدبي مشاري قايله له يرجعه بس اعرفه كسوول .. خلااص خليه ينام عندك فكه منه اليوم
ضي بأبتسامه خبيثه / ايه فضى الجو لك ..
حلا وثامر يجلس جنبها ويبوسها على خدها / ياقليلة الأدب مع السلامه ثرثرتك ماتخلص
ضي حست ان ثامر جنبها / آآآه ياقلبي بس .. مع السلامه ياروح ثامر انتي
سكرت حلا بالقوه الجوال وحطته على الطاوله والتفت على ثامر تدفعه شوي بعيد عنها
/ هالبنت وربي افكارها غير طبيعيه ..
ثامر مبتسم / ليه ياروح ثامر انتي ..
حلا مستحيه / جالس تتجسس ..
ثامر / لا ياروحي بس صوت اختك يسمعه الجيران ههه .. ايه صح مسااء الحب والأحساس والطيبه (( وطلع من جيبه ورده طايحه نص اوراقها وقام يناظرها مكشر )) يوه وقته تطيح اورقك .. نسيت لااطلعها من جيبي وجلست عليها بالسياره (( وعطها حلا )) ورده للورد كله
خذت الورد وهي مبتسمه / مساء الحب حبي .. مشكور على الورده (( وشمتها وهي مغمضه عيونها ))
ثامر يخزها / يعني وقت اغرائات ..
حلا فتحت عيونها لآخر شيء ورمت الورده وهي معصبه / افكارك غلط ..
بس قبل ماتروح مسك يدها بأبتسامه حلوه / افكاري غلط وسعود مش موجود وش ابي اكثر ..؟
^_^
\
يوم الأربعاء الساعه 8 الصباح (( في مدرسه اهليه بالخبر )) /
في فصل ثالث ثانوي علمي (( أ )) استاذة الرياضيات المصريه كانت جالسه تتناقش مع الطالبات عن الأختبارات ..
الأستاذه / بائي يابنات على الاختبارات اسبوعين وانتوا حتغيبوا من يوم السبت .. بس عارفين اش معناه دا ؟
لينا الي كانت جالسه قدام / معناته ان مافيه وقت نذاكر الا بالرياضيات المواد الثانيه كيفها .. ولازم نبدأ من اليوم
الأستاذه / شطوره يالينا يابت .. وكمان معناتو ان الي زاكر كويس من اول مافتحت المدرسه هو الي حينام مرتاح .. لأن الرياضيات عايز اسبوعين كاملين وبالموت حتخلصوه ..
غلا الي حاطه يدينها على خدودها بوضعيه تدل انها بتنام ولابمهمته بشيء / والله استاذه الي ذاكر والي ماذاكر نفس الشيء كلنا ماراح ننام مرتاحين مدام السالفه فيها اسئلة وزاره ..
الأستاذه وهي تطالع الطالبه الي كانت وسط غلا ولينا وكانت تحل مسأله بالكتاب / لا يا غلا ياحبيبتي الي زاكر مش حيلائي حاجه صعبه وحينام مرتاح كمان .. لان الوزاره مابتخرجش اسئلتها عن الكتاب .. ولا ايه يابيان .. انتي بتحلي ايه ..؟
رفعت بيان وجهها الدائري بهدوء وكانت خدودها من الخجل صايره ورديه وسط بياض بشرتها بلون بلوزة مريولها الورديه والي فوقها قميص كحلي ..
بيان بحياء / سوري استاذه ماسمعتك .. جالسه احل مسأله بالكتاب ..
الأستاذه بنظرات حنونه وهي تشوف وجه بيان الطفولي الي مايدل انها بثالث ثانوي وكأن عمرها 12 سنه تقريبا ..
/ بس ليه ماتخليش المسأله ياحبيبتي في البيت وهنا ركزي معانا كويس ..
بيان / بس استاذه ابي اشوف كاني اعرف احل ولاسألتك ..
غلا تناظر بيان على جنب ومازالت على وضعيتها / يعني لو ماعرفتي ماعندك اخوانك ولاخواتك يحلون لك ..
خزتها بيان وضربتها لينا بكوعها ..
الأستاذه / يابت ياغلا انتي شكلك بأيام الاختبارات كل يوم حتروحي البيت تبكي ..
غلا تعدلت وكنها معصبه / لا استاذه لاتفاولي (( وبثقه )) انا ذكيه مره لاتخافي
الأستاذه حطت يدينها على خصرها بحركه مضحكه / لا ياشيخه ..
الكل مات ضحك من كلمة الأستاذه الي تأثرت بكلام السعوديين لان لها 22 سنه تدرس بالسعوديه ..
\
في ساحة المدرسه بالفسحه /
بيان وهي تجلس على الكرسي وتحط اكلها على الطاوله / ياربي جاني صدااع اول حصه فيزياء وثاني وثالث حصه رياضيات .. والرابعه كيمياء حراام عليهم وش ذا اليوم يرحمونا ..
مريم الي جلست وجلسوا معها كل البنات / والله والي مايدري وين ربي حاطه طول الوقت انا نايمه وشيخه يقالها مركزه وهي ماتدري وين ربي حاطها ..
شيخه تخز مريم / تكلمي عن نفسك لاتدخليني بكلامك ..
غلا تناظر شيخه / لا والله صدق شيخه حتى انتي ماسمعنا صوتك طول الحصص ..
شيخه / وش اسوي على الأقل اسكت ولااتفلسف وانا ماادري وين ربي حاطني ..
لينا بنظره لغلا / ايه على الأقل انتي عرفتي ان مافيه فايده لو تكلمتي مو مثل بعض الناس خ ..
غلا تخزها / وش قصدك هاه وش قصدك ..؟
البندري الي نطت من وراها وقالت / بوه
البنات / بسم الله الرحمن الرحيم ..
البندري وهي تجلس / خير شايفين وحش ..؟
غلا / لا جني هع هع هع
البندري / بايخه اي ماكملتي وش قصدها لينا ..
لينا / وجع لازم تذكرها .. برووح اشتري لي شيء آكله بس علشان اقدر اركز بالكيمياء
البندري / وع كيمياء ياعمري انتوا مساكين ..
بيان / تكفين من زين التاريخ والجغرافيا ..
البندري / ذكرتيني بيان ابلة التاريخ اليوم معصبه تعرفين معنى معصبه لدرجه قالت بالطقاق الي يطقكم عساكم ماتنجحون ..
غلا / خير ان شاء الله عسى رديتوا عليها ..
البندري / والله ولاهمتنا .. بس بيني وبينك حنا غلطانين هي تشرح وحنا وحده نايمه ووحده تسولف ووحده ترسم ووحده سرحانه ..
شيخه / ايه بس مالها حق تقولكم كذا ..
مريم / لو منكم عرفت كيف ارد عليها ..
بيان / لا وش ترد عليها لازم تحترمها ..
غلا تكش على بيان / مالت انطمي بس .. وحده تدعي عليهم يسكتون لها ..
البندري / عاد تكفون على غفله داعية زمانها على طول بيستجاب دُعائها ..
بيان / من يدري ؟؟
البنات / ههه
جات لينا وجلست تاكل وتناظر ب دفتر الكيمياء قدامها / وش فيكم تضحكون ..
شيخه / ولاشيء كذا مزاج ..
غلا / الا بنات بتجون يوم السبت المدرسه ..
البنات مع بعض / لا
غلا تروعت / بسم الله كلتوني اسأل بس ..
بيان / واضح الجواب وقت مذاكره ونجي المدرسه بعد .. (( وبتطنز )) الا اذا بتجين انتي ..؟
غلا / هجري ه نضحك يعني نضحك ..
البنات / ايه ضحكي ..
غلا / بسم الله .......
\
بنفس الوقت (( وبجامعة الملك فيصل بالدمام )) وقت البريك /
اسيل وهي تحط كتبها على الطاوله بحركه عصبيه / اوف اوف اوف زين ..
ساره / بسم الله عليك وش فيك ترى اليوم الأربعاء يعني عندك اجازه يومين ارتاحي فيهم ..
ضي وهي تجلس جنب ساره / وش ترتاح فيهم الله يخلف نسيتي الأختبارات ..؟
ساره / يوه سكتي احاول اهديها وانتي تزيدينها ..
اسيل مازالت معصبه / انا خلااص مليت وين ايام المدرسه ياحلوها بس ..
تهاني تضحك بسخريه / ههه الحين المدرسه ياحلوها والسنه الي فاتت ذابحينا انتي وساره ياحظكم بالجامعه ياحظكم ..
اسيل / وش درانا انها كذا قلنا سهله لا مذاكره ولاشرح نفس المدرسه ..
ساره اونها بتصيح / وبالنهايه طلعت الكلاسات تجيب الضغط والمراره .. تهىء تهىء
البنات / ههه حلوه المراره ..
عبير جاتهم هي وشيماء من وراهم / هاي صبايا ..
البنات / هايات هلا والله ..
شيماء وهي تجلس / كيفكم شو مسوين ..
ساره / وش مسوين الله

>> الجزء الثاني <<
يوم الخميس بعد صلاة العشاء (( في بيت بو حمد )) /
تجمعوا كل العايله ينتظروا العشاء كالعاده ..
بو حمد / اجل مشى سطام مع فهد وفيصل دبي ..؟
حمد / ايه يبه مشوا من امس الصباح ..
بو حمد / طيب وشغل فيصل وفهد ..؟ على الأقل سطام مدرس وهذه اجازته غاب يوم واحد بس مو مثلهم فيصل بالهاتف .. وفهد مدير شرطه ..!!
مشاري / اكيد يبه خذوا اجازه ..
ام حمد / ايه انا سمعت من ام متعب انهم ماخذين اجازه ..لمدة ثلاث ايام ..
ضي / على الأقل خذوا جو شوي مو مثلنا نفكر بالأختبارات ..
ام حمد / صلي على النبي ..
ضي / عليه الصلاة والسلام .. عيني مو حاره يمه ..
الكل / ههه
بيان نزلت من الدرج وطلت عليهم وهي مبتسمه من ديكور الصاله الي على شكل قوس / دوم الضحكه يارب بس كان انتظرتوني علشان تضحكوني معكم ..
بو حمد يرفع راسه يناظر بنته تناظر فيه / ههه هلا ب حبيبة ابوها تعالي يمه لو ادري انك بتتكرمين اليوم وتتعشين معنى انتظرنا ماتكلمنا ..
ضي كشرت / الله لنا جات الأميره ..
بيان جات تركض ومثل الطفل طاحت بحضن ابوها ..
مشاري / بل بل بل بشوي شوي يابنت لاتذبحين ابوي ..
ام حمد / من ثقلها معصقله الاختبارات خلت فيها شيء ..
حمد / ههه معصقله ههه وربي تجنن هالكلمه ..
التفتو عليه مستغربين من ضحكه وهو يمسح دموعه ..
بيان بدلع تناظر ابوها وهي مازالت جالسه بحضنه / يبه ليكون حمد اخوي انهبل ..
بو حمد يبتسم / شكله ياروحي ..
ام حمد / خلاص نزلي من عند ابوك بيان .. ولاتدلعها زياده ياروحي وياحبي ماهي ناقصه دلع البيت كله مدلعها ..
مشاري / الوالده غيرانه ههه
ضي / لا وربي صادقه الكل يدلعها (( وخزت بيان ))
بيان نزلت من حضن ابوها وجلست جنبه وحطت طرف صبعها بفمها كالعاده كنها بريئه / الحين ليه تخزيني وش ذنبي اني آخر العنقود ..؟
بو حمد / صدق وش ذنبها انها آخر العنقود .. ووش ذنبها انها طلعت تشبه امي ..؟
الكل / او
حمد / والله وجاء يوم تعترف انك تفضلها لسببين وليس لسبب واحد ههه
ضي / الله على العربيه ههه
ام حمد / اساسا من اول ماجبتها وشافها تشبه الوالده الله يخليها على طول صار مدلعها ماتصيح الا هو بوجهها ..
مشاري / ايوا والله مااذكر طلبت شيء مالقته عندها اليوم الثاني .. اذا بغيت شيء انا اقول لها خ
بو حمد / لا ليه ..؟ حتى انت واخوانك قصرت معكم ..؟
مشاري قام وحب راس ابوه / لا والله الشاهد عمرك ماقصرت معنا ب شيء لو طلبنا عيونك
الكل / او
بو حمد / متعلمين هالكلمه اشوفكم ههه ..
بيان / ههه الا اقول يبه ..
بو حمد طالعها بحنية الدنيا كلها / سمي يمه ..
تغامزوا الي جالسين ولااهتمت منهم بيان ابتسمت / لاتنسى ابوي الخميس الجاي تجيب جدتي من بيت عمي محمد جلست عندهم شهر بالضبط والحين دورنا ..
بو حمد / ههه حاسبتهم بيان ..؟
ام حمد / لو تشوف الجدول الي عندها بالغرفه كل يوم يمر تأشر عليه علشان تعرف متى يجي دورنا بالضبط ههه
حمد / والله والضحيه جدتي كل شهر في بيت واحد ..
مشاري / ليه عادي ..؟ في بيتنا وبيت عمي محمد وعمي ضاري عندها غرفه خاصه وملابس مختلفين .. يعني كل الي عليها تلبس عباتها وتجي وملابسها موجوده في كل بيت ..
ضي / صادق مشاري .. وبعدين كل العايله متعلقين فيها وش الحل يعني ..؟ تجلس بيت عمي محمد لأنه كبير .. وانت تعرف ان ابوي وعمي ضاري يموتون فيها ..
بو حمد / ايوا والله من يوم توفى ابوي قبل خمس سنوات .. وهي كل شهر ببيت احد علشان ترضي الجميع ..
ام حمد / بس انت تعرف انها تحبك انت اكثر لانك آخر العنقود ..
مشاري وهو يصفر / اكشخ ابوي من قدك ..
بو حمد / ههه تصدق مشاري الدنيا دواره .. امي حبتني لأني اشبه ابوها جدي الله يرحمه .. وحبتني لأني آخر العنقود بعد ماجابت عمك محمد وضاري وعمتك شجون الله يرحمها ماتت وعمرها 5 سنوات ..
الجميع / الله يرحمها ..
بو حمد يكمل وكنه يرجع للماضي ويعيشه بهاللحظات / مع انها حبت الكل الا اني مميز بالنسبه لها وبالنسبه لجدي الله يرحمه .. ويوم كبرنا حبيناها كلنا بس انا كنت احن عليها وهي مايله لي اكثر .. وصارت آخر العنقود لي بيان تشبه امي كثير .. ومع اني احبكم كلكم وانتوا تعرفون (( وابتسم لهم )) ..
ابتسموا له يشجعونه انه يكمل وكأنهم يقولون عارفين يا الوالد ..
بو حمد / بس بيان كعادة اي اهل .. ملت لها انا وامي اكثر شوي لأنها آخر العنقود وفي نفس الوقت لانها تشبه الوالده .. وكأن الدنيا دارت وقالت أكرر القصه مرتين ههه
الكل / ههه
بيان بثقه تناظر اخوانها / واكيد مثل ماابوي يحب جدتي اكثر انا بحب ابوي اكثر (( وطلعت لسانها لأخوانها )) ..
الكل مسك مخده ورموها عليها بنفس الوقت وهي اختبت ورا ابوها .. وبو حمد ميت من الضحك ..
بو حمد / لاتغارون احبكم كلكم مثل بعض .. بس تعرفون لوموا امكم لأنها ماجابتكم آخر شيء ههه
ام حمد / بعد وش ذنبي انا ههه
الكل / او
بيان / رجعنا على كلمتنا ههه
حمد / المفروض يبه قلت لنا هالكلام وبيان مش موجوده .. الحين وش يفكنا من دلعها ..
ضي بحماس / واله انك صادق مليون مره الحين كل دقيقه بتقول لنا هالقصه ..
بيان مدت بوزها شبر / وش قصدكم انا مغروره ..؟
مشاري / حشى ماقلنا كذا ..
الكل / ههه
ام حمد / يالله بقوم اخليهم يحطون العشاء سوالفكم ماتخلص الله يخليكم ..
مشاري يناظر فيها بخبث ويرفع حاجب / اقول يمه وش ذا الكشخه اليوم ..؟ محلوه
ام حمد تعرف حركات ولدها / وش محلوه ..؟ هذا انا مثل كل يوم ..
حمد / لا وربي محلوه اليوم صدق وش صاير ..
فتحت ام حمد عيونها مو عادة حمد يقول كذا / ليكون عاداك اخوك ..
الكل / ههه
ضي / اليوم ضحكنا ضحك الله يستر ..
بيان / لاتفااولين ..
بو حمد وعيونه مازالت على ام حمد / اقول ..
الكل / قول ..
بو حمد / صدق محلوه اليوم ام حمد ..
حمرت ام حمد ..
حمد / ههه شوفوا اقول من طالعه عليه بيان خدودها كله محمره .. ناظروا خدود الوالده ..
ضربت ام حمد .. حمد على كتفه بشوي شوي وهو يضحك ..
بيان / اساسا امي توها صغيره يوم تجيبك كان عمرها 13 سنه صح امي ..؟
ام حمد تبتسم وكانت فعلا الي يشوفها يقول بكرها ضي توها صغيره / لا يوم اتزوج عمري 13 وجبت حمد عمري 14سنه ..
بو حمد / ايوا اذكر كنت اذا ابي اراضيها اجيب لها حلاوه ومصاصه ..
هنا الكل ماستحمل وجلسوا يضحكون وعيونهم تدمع ..
ام حمد قامت وكنها معصبه وهي فيها الضحكة بس ماسكتها / اقول اروح اساعدهم وهم يحطون العشاء احسن ..
هالمره بو حمد قال مع عياله / او
\
في فندق في دبي الساعه 9 المساء /
سطام وهو ينسدح على السرير بقوته / آآآآآآآآآآآه جسمي احسه تكسر من هالمشي .. ياليتني ماطعتكم وجيت معكم بيتنا ابرك لي ..
فيصل / صدق يوم قاال فهد شايب بكل معنى الكلمه ..
فهد / علشان تعرف اني مااتكلم الا بعد ما أتأكد من الكلام الي اقوله ..
سطام وهو منسدح يناظر السقف / تكفى ما أقدر انا ..
فيصل انسدح بالسرير الي جنب سطام / آآه تصدق حتى انا تعباان ..؟
سطام / شيء طبيعي اساسا من الصبح وحنا بهالأسواق والمتنزهات ..
فيصل / ياحلو البحر بس ..
فهد / اقول يالشياب انا بطلع اتمشى تحت عند الفندق تبون شيء ..؟
فيصل وسطام رفعوا راسهم مع بعضهم وفتحوا عيونهم ..
فيصل / من صدقك ..؟
سطام / لا مانت صاحي ..!!
فهد / وش في الشياب مستغربين ..؟ عطوني جوالاتكم بس ..
فيصل / وش تبي فيهم ..؟
فهد / برقص معهم .. تعرفني احب ارقص ..... بشووف الرسايل اتسلى فيهم بدال ماأناظر الرايح والجاي ..
سطام / تعرف وش امنيتي فهد ..؟
فهد من غير اهتمام / وش هي ..؟
سطام بأبتسامه / انك تبتسم من قلبك ..
وقبل مايرد فهد كمل سطام / بس مو بأستهزاء كالعاده ..
فيصل / ههه هالأمنيه صعب تحقيقها ..
فهد / فيصل ..!!
فيصل / طيب سكتنا يا أخوي الكبير (( وسوا حركه بفمه انه سكره ))
فهد / وش هالأمنيه الغريبه سطام ..؟
سطام / ماادري احسك يااخي حتى لو مزحت مو من قلبك ..
فهد / والله وش اسوي اسلوبي .... ويالله عطوني جوالاتكم ياشطار ..
فيصل التفت لسطام / شوف الأخ فهد يحسبنا بزارين يلعب علينا مايدري اننا اصغر منه بثلاث سنوات بس ..
سطام / ههه
فهد راح يمشي / بتذلوني مع وجهكم يالله مع السلامه ..
سطام / لحظه لحظه خذ جوالي (( طلعه من جيبه )) بس ها .. الأرقام امانه لاتقربهم ..
خزه فهد / يعني برضى على بنات عمي ..
فيصل بصوت واطي / ماينضمنون المغازليه ..
سطام / ههه (( التفت على فهد )) مو قصدي بس يعني اعرفك فضوولي ..
خذ فهد من سطام الجوال / لا لاتخاف بس بشوف الرساايل والصور مثل ماقلت فضولي بهالأشياء مع انها حقت مراهقين بس وش نسوي نونس نفسنا على مايرتاحون الشياب ..
سطام + فيصل / ههه
\
نزل فهد تحت وخذ له كابتشينو وجلس يتمشى .. طلع جوال فيصل وراح الاستديو شاف الصور .. بعدين انتقل للرسايل ..
اول ثلاث رسايل كانت من مشاري .. والخمس الي بعدها من ربعه الشباب .. وبعدها من وحده اسمها (( ربي يخليها )) ..
فكر فهد معقوله من امه ..؟ لا يمكن من اخته بس اي اخت .. نزل تحت وبعد كم رساله شاف تقريبا عشر رسايل ورى بعض من (( قلب اخوها )) هذه تأكد انها من اخته .. بس عارف ان عنده ثلاث خوات .. يتمنى يعرف اي وحده فيهم بيان ..!!
وليه ..؟ وش ابي في بيان انا اقرا رسايلها ..؟ فتح الرساايل وقام يقرا وحده وحده ..
انتقل للرسائل المرسله .. ولاشعوريا راح ل رساله مرسوله ل حبيبة أخوها .. فتحها ..
(( ضي قولي لأمي تجهز الاغراض الي بوديهم بيت خالي ))
ابتسم فهد وكأنه حال لغز .. نزل تحت وشاف رسايل كثيره مرسوله ل قلب اخوها .. يمكن بيان ..؟ فتحها وشاف من ضمنها ..
(( بيان ليه ماتردي ..؟ اذا مو نايمه تعالي تحت بسرعه وبتشوفي مفاجئه ))
هالمره يوم قرا اسم بيان ابتسم ابتسامه من قلبه .. مثل ماتمنى سطام .. ياربي وش فيني وش سالفة هالبنت ..؟
من قبل ثلاث سنوات وانا فيني شيء .. ماراح انسى ذاك اليوم .. يوم كانت بيان في ثالث متوسط .. وكنت عندهم بالبيت انتظر حمد ..
بيان وهي تنزل بسرعه / ميشو ميشو
ناظرت فهد الي جالس يناظر فيها بأستغراب لأنه له ثمان سنوات ماشافها ..
بيان حمرت خدودها بسرعه ورجعت على ورى بس كان وراها مشاري / نعم حبيبتي وش فيك ..
ناظرته وجات بتروح مسكها مشاري / وش فيك ..؟
بيان تناظر فهد / م كنت ابي اقولك ...... اني ابي اروح ..... م
مشاري يناظر في فهد الي عيونه على بيان / وش قايل لها خايفه كنها شايفه جني ..
فهد ابتسم ابتسامه خفيفه جدا / لا بس شكلها مستحيه لأنها ماعرفتني مو عادتي اجي بيتكم ..
مشاري / الله تبي تقولي على كثر ماجات بيتكم ماشافتك ..؟
بيان مسكت ثوب مشاري وبصوت خافت قالت / مشاري .. وقت اسئله بروح فوق وبقولك الي ابي بعدين ..
راحت بيان بسرعه تركض فوق ..
مشاري / والله اعتفس وجه البنت الي يشوفها عروس بليلة عرسها ههه
حمد طلع من المجلس / هذا طبع بيان ..
مشاري / بسم الله من وين طلعت جالس تتجسس ..؟
حمد وهي يدف اخوه علشان يسلم على فهد / طلعت من الباب وسمعتكم بالصدفه عندك مانع ..
سلم على فهد ..
مشاري / تدري اني مستغرب ان بيان ماتعرف فهد .. وفهد مايعرف بيان ..؟
فهد يخزه / وش دعوه مااعرفها اذكرها وهي بأول ابتدائي .. كانت خالتي تدرسها الحروف ..
حمد / ههه الله قديم وربي انت مغبر الحين بثالث متوسط .. وينك عن بيتكم ماتجيه ..؟ بيان عند ساره اختك دايم ..
فهد / صدق دايم عندها بس ماتطلع من الغرفه واذا طلعت اشوفها بعباه وغطوه وبرقع من هي صغيره ماادري شالسالفه ..؟
حمد + مشاري / ههه
مشاري / هذا طبعها متغطيه من يوم عمرها 13 سنه يقالها بس تبي زوجها يشوفها ..
حمد / اختي رومانسيه من هي صغيره ههه ..
\
رجع فهد للواقع بعد ماسمع بوري سيااره مزعج ..
سكر جوال سطام .. الله على ذاك اليوم حسيت اني شفت احلى عيون بالكون .. عيون دائريه لامعه .. لونها عسلي على بني ..
ماادري وش فيني صرت بس افكر فيها .. رجع للفندق علشان يرجع جوال سطام وبنفس الوقت يرتااح لانه توه حاس بالتعب ..
والله وطلعت انا الشايب ..!!
\
في بيت (( بو ثامر )) الساعه 3 الفجر /
كانت تهاني جالسه على الماسنجر تكلم ضي .. لما سمعت ضرب خفيف على باب غرفتها ..
تهاني / ادخل ..
دخلت غلا مكشره وماده بوزها .. سكرت الباب وراها وجلست على السرير بدون اي كلمه ..
تهاني لفت على الكرسي الدوار وناظرت غلا ..
تهاني / سلامات حبيبي مو على بعضك سلامات ..؟
غلا / ملل ..
تهاني / ودروسك ..؟ متى بتبدي تذاكري ..
تنرفزت غلا / اقولها ملل تقولي دروسك ..
وقفت وراحت قدام المرايه تناظر جسمها / زاد وزني ..؟
تهاني ابتسمت / وربي ماأحد مجنون مثلك .. عليها اختبارات وزاره وهمها وزنها ..!! روحي ياماما ذاكري وربي ابرك لك .. وبعدين تعالي رجع زياد البيت ولا لسا طالع ..؟
غلا ومو مهتمه بكلام اختها / لا رجع من الساعه 12ونص وينك فيه انتي .. بس بهالغرفه الي يشوفك يقول تذاكري ..
لفت تهاني وتكلمت مع من معها بالماسنجر بعدين قفلته .. وقامت اول ماجات تطلع لفت لأختها ..
/ اذا خلصتي طلعي وسكري الباب ..
راحت وغلا عصبت / ياسلام جايه اشكي لها ولاتعطيني بال حتى ..
جلست على كرسي التسريحه وقامت تتحوس بأغراض اختها .. لفت انتباها دفتر مذكرات بالدرج الاخير ..
خذته وراحت تجلس على السرير .. ترددت تفتحه ..؟ ياربي مايصلح اخاف تهاني تعصب .. بس ليه تعصب ..؟ مابيينا اسرار ..
فتحته وكان داخله ورد مجفف .. فتحت صفحه تلقائياً كان فيها خاطره بعنوان (( هل تحبني ..؟ ))
لا تسألني لماذا احببتك ..!!
ولا تسالني متى احببتك ..!!
ولا تسالني عن اسباب اشتياقي ..!!
لاني عندما رأيتك ..!!
تبعثرت جميع اوراقي ..!!
احس بك وانت بعيد ..!!
واراك امامي وفي منامي ..!!
اصبحت اراك في وجه البشر..!!
هل اشكر القدر ..!!
لانه عرفني عليك ..؟
وجعلني أذوب في عينيك ..!!
تلك العيون الجميله ..!!
التي رمتني في بحر لا اعرف قراره ..!!
لقد ارتسمت ملامحك في أحداقي ..!!
واختطت حروف اسمك في قلبي ..!!
فهل بعد كل هذا تسألني ..!!
هل تحبيني ..!!؟؟؟
فتحت على صفحه ثانيه بعنوان (( عفواً أنا عاشقه )) ..
عفواً حبيبي أنا عاشقة
لكل معاني الحب في قلبك عاشقة
لكل كلمة لكل نظرة لكل همسة منك أنا لها عاشقة
حتى قطرات الندى في جمال قلبك عاشقة
فكيف لا أكون أنا لمن أعشق حتى الموت عاشقة
وتسأل في النهاية لما أنا لك عاشقة ..؟
أنا لك بكل المعاني مصارحة وبكل العبارات صادقة
نعم ..
نعم حبيبي ..
انا لك عاشقه ..
قلبت عدة صفحاات لما شافت اسم بالأنجليزي مكتوب بخط كبير وباللون الأحمر ..
كشرت وهي تقراه .. بعدها نزلت تحت تقرا المكتوب تحته باللون الأزرق ..
شهقت غلا بصوت عالي ..
وسكرت الدفتر بسرعه لما سمعت صووت عند الباب ورجعته مكانه بسرعه وأرتباك ..
جات بتطلع .. الا فتح احد الباب ..
نزلت راسها شافت ريهام واقفه مستغربه وتناظرها ..
غلا / خيير ..؟ تبين شيء ..؟
ريهام / لا بس زياد يقول نادي غلا ودورتك بغرفتك مالقيتك قلت يمكن بغرفة تهاني ..
غلا / طيب هذا انا نازله يلا روحي ..
راحت ريهام غرفتها وهي تناظر غلا بنظرات استغراب ..
وغلا ماعرفت سبب هالنظرات راحت تحت .. وشافت زياد يسولف مع تهاني ..
غلا / سلاام ..
زياد / وعليكم السلام .. وينك اذا نزلت تهاني تروحي فوق واذا راحت فوق تنزلي ..
تهاني تناظرها / ماتحبني ..
غلا ماهتمت لكلمة تهاني وكانت بحالة تفكير / زياد ابي توديني بكره عند بيان ..
زياد / ليه ..؟ البنت تذاكر وماتبي احد يزعجها ..
غلا / لا ضروري ابيها .. في اشياء ماأعرفها ابيها تحلهم لي ..
زياد / طيب وريني الي ماتعرفي واحلهم لك انا ولا تهاني ..
غلا / لا لا انا مااعرف مسائل رياضيات .. وانت وتهاني ادبي كيف بتحلونهم لي ..؟
زياد وقف / يعني مصممه تروحي ..؟
غلا رفعت راسها تناظره / ايه ..
زياد / خلاص اجل تجهزي بكره بعد المغرب .. والحين يلا تصبحون على خير تعبان وابي انام ..
غلا + تهاني / وانت من اهل الخير ..
بعد ماراح زياد .. ناظرت تهاني غلا / وش فيك غلا مو على بعضك ..؟
قامت غلا / مافيني شيء يالله برووح انام مع السلامه ..
تهاني ماتدري وش في هالبنت اليوم .. وين عادتها مزووحه وهبله .. فيها شيء البنت .. وكأن مكتشفه شيء خطيير ..
م مو وقت هالتفكير افضل ارووح اريح واتحلم احلام حلوه .. (( ابتسمت ورددت بصوت مسموع وهي توقف )) احلام حلوه ..
\
يوم الجمعه الساعه 2 الظهر (( في بيت بو متعب )) /
كانت ساره جالسه بغرفتها تذاكر .. لما دق جوالها .. ناظرت الأسم على الشاشه (( روحي تحبك )) ابتسمت وردت ..
ساره / ياهلا ومرحبا ب حبي الأول والأخير ..
اسيل / ايه انصبي علي واذا كلمتي بيان وغلا قلتي نفس الكلام ..
ساره / ههه لا وربي بس بيان كاتمة اسراري .. وغلا مخططه لمقالبي .. وانتي حبي ..
اسيل / لا افضل اصير حبك ومخططه لمقالبك وكاتمة اسرارك ..
ساره ابتسمت / ابشري من عيوني .. بس قولي لي اخباارك وش مسويه مع الكتب الجميله ..؟
اسيل / وربي مافتحتها مالي خلقها ولا خلق جمالها وبعدين لاتجيبي طاريها انا متصله علشان اعزمك اليوم في بيتنا انتي والبنات ..
ساره مستغربه / من صدقك ..؟ وقت أختبارات ..!!
اسيل / ايه من صدقي مدام غلا وبيان بيغيبوا لمدة اسبوعين وحنا اختباراتنا يوم الأثنين تبدا .. خلونا نغير جو علشان نقدر نركز بعدها ..
ساره / م ماأدري يالهبله قلتي للبنات ..؟
اسيل / ايوا قلت لهم كلهم ووافقوا بس باقي انتي .. وبيان ضي بتقنعها ..!!
ساره / يعني ماوافقت ..؟
اسيل / لا مو على ماوافقت بس نحسها متردده .. وبعدين فكونا يانوابغ وبلا عباطه ..
ساره / ههه حلوه عباطه .. خلااص ولايهمك بعد العشااء تشوفيني عندك ..
اسيل / اوكيك يالله مااعطلك برووح اتكشخ ..
ساره بأستغراب / من الحين ..؟
اسيل / ايه من الحين يلا طسي ..
ساره / ههه ماتعقلين مهما مر الزمن ..
اسيل / تكفين يالعاقل .. يالله باي باي لو اتهاوش معك ماسكرت الا بعد ماتخلص الاختبارات ..
ساره / ههه الله معك ..
\
في بيت (( بو حمد )) الساعه 5 المغرب /
بيان كانت تصاارخ بالصاله / ضي ضي ووجع يوجع العدو ان شاء الله .. ضي ..
طلت ضي من الدرج معصبه / وش فيك بسم الله تصارخي ..؟ فيه حرامي ..؟
بيان حطت يديها على خصرها / لا والله اسم الله علي .. اصاارخ لأن ماأحد بالبيت وين راحوا ..؟
ضي / يعني ماتعرفي تجي فوق وتضربي باب غرفتي .. وتسأليني وينهم ..؟ لازم صرااخ ..
بيان / مالي خلق وبعدين تفاجئت وين يروحون واليوم الجمعه من يطلع اليوم ..
ضي / احلفي بعد الطلعه فيها يوم .. راحوا اساسا لجارتنا ام سعد .. صاير ل زوجها حادث والحمدلله ماجاه الا شوية رضوض بالساق وحمد وابوي ومشاري راحوا يتحمدون له بالسلامه .. وراحت امي لزوجته بعد تتحمد لها بسلامة زوجها ..
بيان / اها ياعمري ... طيب مالبستي انتي يبي لك ساعات على ماتخلصي ..؟
ضي رفعت حواجبها / من الي يبي له ساعات انا ولا انتي ..؟ المهم تعالي ابي اوريك شيء بالابتوب ..
راحت بيان ل ضي فوق في غرفتها ..
جلست ضي على الكرسي وانحنت بيان عليها علشان تشوف ..
ضي وهي تأشر على صورة تسريحه / ناظري وش رايك اقص شعري كذا ..
بيان / م بس شعرك مو طويل مره يعني لحد كتفك وتقصينه زياده ..؟
ضي / ايه عادي ياقلبي تعرفيني ماأحب الشعر الطويل ..
بيان خزتها / يعني شعري مو حلو ..
ضي / ههه لا انتي شعرك اسود وناعم وكثير ماشاء الله يعني حلو الطويل عليه انا خفيف وبني ..
بيان / بس ناعم ..
ضي / ايه حتى لو .. خفيف مايصلح له الطويل .. ايه صح ماقلتي لي غلا مو اتصلت امس الفجر وقالت بتجيك ..؟
بيان / ايوه بس اليوم لما عزمتنا اسيل خلااص كلمتني قالت اشوفك عندها ..
ضي / بس هي تبي تسألك عن الرياضيات اتوقع ..
بيان / ايه عادي تسألني بالتلفون بعدين ولاتجيني بكره ..
ضي / اها ..
لفت تناظر الصور والقصات ..
بيان / م ضي ..!!
ضي وهي تناظر الصور / هلا قلبي ..
بيان / م تصدقي ضي .. امس وانا افكر عرفت اني ابي اتزوج واحد على قد حاله .. ماعنده فلوس كثير واهله ناس عاديين جداً
ضي لفت بقوه وهي مفتحه عيونها بأستغراب / من جدك ..؟ انتي عكس البنات ههه الناس يبون تاجر يدلعهم وانتي تبين فقير ..؟ وبعدين وش جاب هالشيء على بالك امس ..
بيان نزلت راسها / مو يعني فقير ماعنده فلوس .. لا يعني مدرس واهله عاديين .. مثلاً ابوه مدرس بعد ومعيشهم على الراتب هذا .. والي جابه على بالي صراحه يوم فكرت ب لينا ..
ضي نزلت عيونها تناظر يدين بيان الي شابكتهم بقوه / لينا الحمدلله تلبس احلى اللبس وتاكل احلى الأكل .. مو معنى ان ابوها فراش صارت فقيره .. هذا شغله محترمه مافيها اي عيب .. وبعدين وش دخل لينا انك تتزوجي واحد على قد حاله ..
بيان جلست على سرير ضي وتكلمت بحماس / انا ماقلت انها فقيره بس يعني احسها لو اشترت شيء جديد او جاو بيسافروا او يسوو اهلها اي شيء انها تفرح من كل قلبها مو مثلنا متعودين على كل شيء جديد ومتعودين على السفر والأشياء الغاليه .. وودي اني اجرب الحياه العاديه مو اطلب اي شيء ويجيني .. ودي افكر كيف اصرف فلوسي واسوي ميزانيه (( ابتسمت )) زي الهنود ههه .. مو معناته اني ماأحب اعيش بخير .. بس الحمدلله اهلي ماقصروا ابي اعيش باقي عمري اعرف معنى الفلوس وافرح لو صرت مدرسه ا

>> الجزء الثال3ث <<
\
طلعت من قاعة الأختبار وهي مو مصدقه كانت تمشي بس مو حاسه بنفسها ..
ناظرت شلة المرح جالسين يضحكون بصوت عالي ويوم شافوها وقفوا وراحوا ناحيتها وهم يركضون كأنهم خبلان ..
غلا وهي تضم بيان الي مازالت جماد مو حاسه بنفسها / خلصنا بيان خلصنا الثانويه ..!!
البندري / بشوي شوي عليها بتموت خليها تاخذ نفس ..
غلا بعدت شووي تناظر في بيان الي دموعها بعيونها لكن مانزلت .. ومازالت سرحانه بعيونها عنهم ..
شيخه / بيان سلامات وش فيك ..؟
لينا / من الفرحه يمكن ..
مريم بدفااشه بعدتهم عنها ومسكتها تهزها / وش فيك اضحكي مو وقت تبكين على المدرسه فيه جامعه لاتخافي بتذاكرين ..
ضحكت بيان وسط دموعها وضربت مريم على كتفها / ههه مو مصدقه بنات وربي مو مصدقه حاسه اني بحلم وبصحى منه
غلا / لا ماراح يصير حلم بعد شوي راح تتأكدي .. يالله وحده تطلع البيبسي بنات
مسكت لينا شنطه مليانه بيبسي لأن الشله معروفين بعشقهم للبيبسي الي يشاركهم كل افراحهم ^_^ وعطت كل بنت علبه ..
تجمعوا على شكل دائره ومدوا اياديهم الي فيها العلب واليد الثانيه استعدوا يفتحوا البيبسي ..
بيان بحماس / مستعدين ..؟؟ واحد ..... ثنين .... ثلاثه .....
طش
فتحوهم مع بعض وعلى طول كل بنت قامت تشرب وهم يضحكون الا بيان الي بس وصلت العلبه لفمها رجعتها على طول وهي تناظرهم بخبث وبدون اي تردد .. سبحتهم كلهم بالعلبه ومابقى منها شيء
البنات / آآآآآآآآآآآآآآآآآآآآآآه وجع بيانوه
ماحست بنفسها الا انها تركض تنقذ نفسها منهم وهي ميته ضحك .. وهم وراها .. وبنات المدرسه يناظرونهم مستغربين ..
معقوله هذه حركات بنات بيروحوا الجامعه ..!!
\
الأربعاء الساعه 6 ونص المغرب /
فتحت عيونها بكسل بعد ماحست ان بغرفتها أحد ..
لفت لجهة باب الغرفه وشافت ظل واقف عنده ..
بيان بصوت خافت ملياان نوم / مين ؟؟ غلا ؟؟
/ لا .. حلا
ابتسمت بيان يوم عرفت صووت ضي ..
بيان قامت وهي تزين شعرها الي انعفس من النوم / وش فيك واقفه تناظري فيني شغلي اللمبه ظلاام يااختي ..
ضي بهدووء / م ماتكفي الأبجوره ؟؟ قومي حبي .. في احد يبيك تحت ..
بيان ناظرتها مستغربه / يبيني ؟؟ مين اكيد غلا تبي تنتقم من البيبسي الي سبحتهم فيه اليوم ههه
ضي لساا على هدوئها / نو شخص ثاني يبيك ..
بيان/ شخص ثاني ..؟ وش ذا الغموض ؟؟ مين هو ؟؟
ضي لفت بتطلع / البسي وانزلي وتعرفينه ..
طلعت ضي من الغرفه وبيان علامات الأستفهام على راسها ..
\
نزلت بيان بعد مابدلت ملابسها وصلحت شعرها .. شافت الصاله ظلام ..
يؤ ؟ وش السالفه ؟ وينهم ؟ توها بتنادي الا فجأه شغلوا اللمبات ..
وبصووت واحد / سبرايز
فتحت عيونها من الدهشه .. امها وابوها جالسين وهم مبتسمين ويناظرونها بحب ..
وحمد ومشاري وسطام واقفين عند كيكه طبقاات مره شكلها نايس ..
وضي وحلا ماسكين رشاش الحفلات الي يطلع ثلج وخيوط ملونه ^_^
ضي تقدمت منها وحضنتها / ألف الف مبروك التخرج وعقباال النسبه العاليه قلبوو
دمعت عيون بيان وهي تضم ضي / الله يبارك فيك حبيبتي
تقدموا كل خوانها وباركوا لها وراحت هي لأمها وباستها على راسها وضمتها
بعدها باست يد ابوها وراسه وضمته بقوه وهي تبكي من الونااسه ..
يارب يارب لاتحرمني منهم وتخليهم لي ياارب
حلا / وينك ياحلوه .. تجين من المدرسه وعلى طول نوم
بيان وهي تمسح دموعها / جيت تعبانه بعد الركض والرقص في هالمدرسه صايره مرقص مو مدرسه ههه
مشاري / ههه مااحد يلومكم خلصتوا الثانوي لازم ترقصون
بيان/ المشكله كل بنت خلت المدرسه كلها تكتب لها على مريولها وانا مريولي اختفى صار كله كتابات
حمد / يوه تصرف بزارين
ضي / لا عادي هذا بنات هالأيام
ام حمد / ايه بنات هالأيام اختربوا
بو حمد / ههه تكلمت ام حمد
بيان بدلع / يمه وش اختربنا ؟ عادي لاازم مذكرات ومافيه احلى من المريول
سطام / جيت اليوم من الدوام وقلت وين بيونه نبارك لها قالوا نايمه ولا كان بوديك بااسكن اشتري لك اكبر برميل
ضي / برميل خ
سطام / اوص
بيان / ههه وربي بس جيت رحت على طول غرفتي .. بس لحظه مايمنع الحين توديني (( ناظرته بخبث ))
سطام / ههه لا الحين بنام
مشاري / ول ماشبعتي من هالكيكه الكبيره .. ترى على ذووق ابوي (( وقام ينزل ويرفع بحواجبه ))
بيان / ههه ادري ماصارت حلوه الا لانها على ذووق بابي
خزوها اخوانها وهي كملت وهي ميته ضحك عليهم / بس ابي افهم ليه هالحفله ماأجلتوها لما تطلع النسبه وسويتوها حفل كبير خ
بو حمد / لا هذه الحفله نبيها بنفس وقت فرحتك يوم خلصتي اختباارات .. واذا طلعت النسبه ابشري بالحفله الكبيره الي تخلي الكل يتكلم عنها
ام حمد / يؤ يؤ يؤ لاتخرب البنت علينا .. بكره تتزوج وتبي زوجها يسوي مثلك
ضمت بيان ابوها وهي مستانسه / يسلموو بابي ربي يخليك لي .. ولاتخافي امي زوجي لازم يصير مثل ابوي اعرف اسويه مثله بطريقتي
الكل / ههه
حلا / والله وصار طبخه تسويها ..!!
بيان وكنها تذكرت شيء وشهقت وهي توقف / وين جدتي ............؟؟؟
مشاري يتطنز / خلصت فترة جلوسها عندك خ
بيان عصبت وحطت يديها على خصرها / لا والله مالها الا اسبوعين شايفني غبيه
سطام / بسم الله عصبت
ام حمد / ورا ما تضربي اخوك ؟؟
حلا وهي ماسكه بطنها على شكل بيان وهي معصبه / ههه
ابو حمد مبتسم / ليه تحبوا تجننوها هوايه هي ..؟ ياعمري انتي جدتك راحت بيت عمك بو وليد لان اليوم ولد عمك وليد بيجي من السفر وتبي تشوفه له ست سنوات ماجا السعوديه مع هالدراسه الي حتى بأيام العطل يدرس ..!!
\
الساعه 7 المساء /
كانت منسدحه على سريرها و تناظر الصور في الابتوب .. دق باب غرفتها
/ مين ؟؟
/ ايوا انا ريم ممكن ادخل ساره ؟
ساره / ادخلي حبيبتي
ابتسمت ساره ل اختها الهاديه الي نادر ينسمع صوتها عكس الأطفال بعمرها العشر سنوات ..
ريم / ساره انا طفشانه ابي اروح لبنت خالي ريهام ..!!
ساره / حبيبتي اتصلي عليها وشوفي اذا موجوده قولي لفيصل اوفهد يودونك ..
ريم تأشر براسها بمعنى لا / اتصلت عليها موجوده .. لكن فيصل وفهد مو موجودين ..
ساره ابتسمت / خلاص قلبي مدامها موجوده انتظري الساعه 8 اوديك لها مع السواق وفارس .. يعني بعد ساعه اوكي ؟
ريم ببرائه / اوكي
باست ساره على خدها وطلعت
ياحبي ل هالبنت ..!!
سكرت الابتوب وقامت وطلعت ووقفت عند غرفه جنب غرفتها دقت الباب بشوي شوي
ساره بصوت هادي / مرام ..؟؟ مرام ؟؟ افتحي الباب ابيك شوي
ظلت واقفه ماتدري دقيقه ؟؟ دقيقتين او حتى عشر دقايق .. المهم انها مافقدت الأمل وان شاء الله بتفتح لها هالمره ..
رجعت تدق الباب وبصوت اعلى شوي من الي قبل / مرام حبيبتي لي اسبووع معطله وطفشاانه من قلب افتحي بسوولف معك
سمعت خطوات تقترب من الباب ..
كنت حاسه اني لو قلت هالكلام بتفتح ..!! حنونه يامرام حنونه حتى في لحظات الألم والعذاب الي تعيشيها..
انفتح الباب .. وكان النور خافت داخل الغرفه .. طلت ساره براسها وقالت بصوت مرح / ممكن ادخل ياأختي الحلوه ..؟
جاها صوت حسته بعيد بعيد كثير عنها .. بس نعومته وجاذبيته ماراح منها شيء
/ تفضل ي
دخلت ساره وناظرت على طول بالعيون الي تناظرها بأنكسار وألم .. ناظرت اختها وهي تحس انها من زمان ماشافتها لدرجه نست ملامح وجهها ..
رجعت تدقق فيها بصمت ..عيونها الخضرااء الواسعه .. وشعرها الأشقر الغامق فيه خصلات بنيه .. بيااض بشرتها ولون شفايفها .. كلها تدل على الجماال المغري فيها .. وهي في هجري الحاله من الدموع والحزن والعزله .. كيف لو انك بسعاده يامرام ؟؟ كيف لو انك متكشخه وش بتصيري ؟؟ دمعت عيون ساره وماقدرت تمسك روحها .. رمت نفسها بحضن اختها الي ضمتها بدورها وباستها على راسها ..
ساره وهي تشهق وبصوت متقطع / لي ه ل يه يا م ر اام ل يه تس و ين ب نف سك كذ ا ليه ؟؟
مرام / .............
ساره / ليه جاوبيني ؟؟
مرام بصوت هادي كله ألم / ساره حبيبتي ........... الله يخليك اطلعي روحي غرفتك هذا انتي شفتيني
ساره رفعت راسها وبصووت عالي وصرااخ / شفتك ؟؟ شفتك في هالظلام شفتك بهالشكل شفتك في دقايق شفتك وانتي عازله نفسك عن العالم ؟؟ حرام عليك حسي في الي يحبونك وعذاابهم .. الي صار لك كله من ربي كله من الله تعترضي على ربي ؟؟
مرام وسط دموعها بهدووء غريب / بس انا السبب وانتي عارفه هالشيء ياساره .. (( غمضت عيونها شوي وفتحتهم .. وبصوت أعلى )) انا بيديني قتلت حلم من سبع سنوات كنت احلم فيه .. قتلته ياساره قتلته بيديني .. تذكرين أمي وقتها وش قالت لي ..؟ أني ماأستاهل هالحلم لأني قتلته ..
ساره انهاارت ماقدرت / لا ماقلتيته الله كاتب له هالشيء الله كاتب كل شيء
مرام مسكت مقبض الباب / مافيه فايده ياساره الله يخليك اطلعي ابي انام
ساره تمسح دموعها / تنامي ؟؟ تنامي وانتي 24 ساعه دموع ونوم حتى الأكل بس تتغدي وبالموت بعد ..؟ تبي تنتحري ترى النار جزائك ؟؟
صدت مرام ونزلت راسها .. ونزل شعرها على وجهها .. ولاردت
انتظرت ساره شوي بعدها طلعت من الغرفه وسمعت صوت قفل الباب وهو يتقفل ..
دخلت غرفتها معصبه على اختها الي مو فاهمه ان كل هذا مقدر ومكتوب ..
جلست على سريرها .. ياربي ياربي اغفر لها ..
نزلت راسها تفكر.. ماأحد يلومها حياتها من هي صغيره عذااب ..!! ويوم كبرت عذااب .. ويوم أخيرا فرحت انقلبت الفرحه عذااب ..
أنتبهت من تفكيرها على صوت الجوال ناظرت الشاشه (( بنوته كول ))
مسحت دموعها وتنحنحت علشان تعدل صوتها ^_^
ساره / هلا ب بنوته كول
بيان / هلا ب عجوزه ناايس
ساره / مالت عليك وعلى الي كاتب لك نك ماتستاهلينه
بيان / هجري ه هجري تكفين من زينه .. اسيلووه تكتبين لها روحي تحبك
ساره ابتسمت / يازيين الي يغارون .. تصدقي بياان دايم تجين بوقتك ماادري ساحره ولا هذه موهبه
بيان / ههه لا ساحره احلى .. ليه وش صاير
ساره نزلت راسها وقامت تصرقع أصابع يدها الفاضيه / قبل شوي رحت لمرام وكالعاده تلقيت طرده محترمه
بيان بألم / ياعمري هي مازالت ؟؟ الى متى طيب
ساره / قلت لها يابيان قلت لها .. بس وش اسوي ياعالم ؟؟؟
بيان / ربك كريم
ساره / ونعم بالله
بيان حبت تطلعها من جو الكئابه / انتظري لاتنسيني الي خلاني اتصل فيك علشان اقوله لك
ساره بتطنز / يعني مو لله متصله يابيان هانم
بيان بحماس / الا لله .. ولو عرفتي الي بقوله بتطيرين من الفرحه ..!!
ساره كشرت / بطير من الفرحه ؟؟ ما أتوقع ضاايق خلقي لدرجه مو طايقه نفسي
بيان بدلع / حتى لو كان في السالفه حبيب القلب ..
ساره من سمعت طاري حبيب القلب نطت من على السرير وراحت تركض للشرفه بغرفتها سكرت باب الشرفه وراها
ساره بحمااس يطلع من الف سماعه / بيونتي حبي هاه بشري عسى رجع السعوديه ..؟
بيان بدلع اكثر / شو تعطيني ياروح بيان انتي ؟؟
ساره جلست تنطط بمكانها وهي ماسكه الجوال / الي تبين الي تبين بليز قولي بسرعه
دفت وهي تنطط الكرسي الي بالشرفه وطااح وطلع صووت قوي لانه من الخشب ..
بيان تروعت مسكت قلبها / ساره صار فيك شيء
ماهتمت ساره لها / لا هذه الكرسي .. يالله قولي لي جاء ولا
بيان/ ههه وش ذا الحب صدق فيه بالحقيقه حب مو بس بالقصص ؟؟
ساره تسندت على الباب / آآه يابيان لو جربتي الحب بتعرفي انه حقيقه قلبك طاير من الفرحه والألم بنفس الوقت .. قلبك داايم عايش حالة شوق .. تحسين انك تطيرين ماتمشين على الأرض آآه وش اوصف وش اخلي
بيان طبعا مافهمت شيء وحطت بعفويه طرف صبعها بفمها .. وش تقول هالهبله ..؟؟؟
ساره تكمل / بيان ماكنت اعرف معنى الحب الا لم ..
قاطعتها بيان قبل ماتكمل / بس بس قلتيها لي طول الست سنوات الي كان مسافر فيها ..(( حطت يديها على خدها وكملت بشاعريه وصوت رومانسي )) ماعرفتي الحب الا لما شفتيه بالصدفه وماصدقتي ان كل هالزين ببشر آآه وحبيتيه بس هو مايدري عنك زين اذا عرف اسمك و ..
قاطعته هالمره ساره بعصبيه / مالت عليك انا ماقلت زين اذا عرف اسمي نسيتي انه ولد عمي ..؟
بيان / لا مانسيت .. لكن لاتنسي انه ولد عمي واعرفه من دخل ثانووي وهو مايتعدى الكتااب والأبتسامه اختفت وصار ثقيل دم بشكل مايطااق .. وجدي بكل الأوقات .. بدون مرح بدون ..
ساره صرخت / بس ياحلوه بكل عيووبه .. والحين بتقولين لي جاء السعوديه ولا بسكر ..
بيان عصبت / مالت عليك سكري يالله بااي
ساره برجاء / لا لا امزح حبي وربي احبك بس انتي ارحميني ..
بيان رفعت حاجبها وهي تنقل الجوال ليدها الثانيه / ايه تعدلي .. ومدامك عارفه ان الجواب هو انه راح يكون خلال هالدقايق بالسعوديه ليه تسألي ..؟
ساره / واي اخيرا ياقلبي يابيووني حسبته بيأجل رجعته .. مو هو مخلص من الأسبوع الي فات لكن يقول ولا مره شاف نيويورك طول هالست سنوات زين بسبب دراسته ويبي يشوفها ويمتع نفسه مع اغلى اصحاابه ..
بيان حطت يدها على راسها / ول ول ول .. من وين جمعتي كل هالمعلومات
ساره نزلت راسها حياا / من روحي اسوله
بيان / هجري ه هجري والله مو روحك من خير .. لانك تاخذي منها معلومات وهي الغبيه ماتحس
ساره عصبت / بيانوه وبعدين خليني اروح الحين افكر وش بسوي .. من زمان ماشفته ولازم اشوفه اليوم .. بعد ما أوصل ريوومه بيت خالوو
بيان تهز راسها تتحمد / الحمدلله يااربِ الحمدلله .... المهم تدرين اذكره وانا عمري 10 سنوات كان عمره تقريبا 21 سنه وكان دايم يقايضني وانا اعصب وهو يستهزء فيني مالت عليه ماعنده رحمه مع انهم يقولو حنون
ساره بصوت يشبه الصراخ / وربي حنون بشكل ماتتصوري اسيل دايم تعلمني عن مواقفه معهم اذا اشتاقت له وتبي تتذكره .. وبعدين لاتقولين لي ماشفتيه من عمرك 10 سنوات..؟
ابتسمت بيان بسخريه / احلفي ياشيخه ؟؟ يقالك انتي شفتيه اكبر يعني ههه تراه سافر يوم كان عمري 12 سنه يعني شيء طبيعي مااشوفه سنتين وهو مشغول بالدراسه ولاينشااف ..!!
ساره حمرت خدودها / م معك حق بس على الأقل انا شفته وعمري 13 بدخل 14 يعني كبيره وعرفت معنى الحب
بيان / تبين الصدق انتي ماطحتي بحبه الا من هالصور الي توريك اياهم اسوله .. هي قصدها تعرض لك صور العايله وانتي تركزين على حبيب القلب ..!!
\
في نفس الوقت وفي مطار الخبر ..
كانت الطياره على أرض السعوديه .. وكانوا الركااب ينزلون منها ..
الكل يدور اهله ويسرع يسلم عليهم ويضمهم .. ماباقي بالطياره الا أشخاص قليل بدوا ينزلون ..
نزل من على المدرج بخطوات واثقه .. خطوات مغروره .. كان رافع راسه وهو يمشي وكأنه سيد الكل ..
لابس بنطلون جينز وبلوزه نص كم سماويه .. ونظارات تعود انه يلبسهم طول الست سنوات الماضيه سواء بالنهار او بالليل ..
مغطي شعره الأسود الناعم بقبعه سماويه .. وماسك بأحد يدينه شنطه دبلوماسيه تدل على انه رجل اعمال اكثر من اي شيء ثاني ..
اول مانزل من على المدرج تقدم ثلاث خطوات ووقف .. جذب الهواء له بقوه .. وتنهد ..
من زمان عنك وعن هواك يا بلادي ولا أي مكان بالعالم يعوضني عنك
ابتسم أبتسامه نادر ماكان يبتسمها ايام الدراسه ..
مشى يستلم أغراضه .. ولفت انتباهه طفله تلعب ب لعبتها .. تذكر طارق الي يوم سافر كان عمره 9 سنوات
م يمكن نساني ويمكن لاا ..
رجع يبتسم وأرسل بوسه بالهوا للطفله الي عمرها مايتجاوز خمس سنوات تقريباً ..
مشى في طريقه يوم شاف ابوه بين الناس .. أما الطفله ظلت تناظر فيه بخدود حمراا وبأستغراب ..
ابو الطفله / شهد تعالي حبيبتي هنا لاتضيعي بهالزحمه ..
ام شهد / اقول ناصر مو كأن الرجال هذا شاعر ..؟ م فزااع ..؟ او محمد السهلي او شيء من هالقبيل ؟؟
ناظرها ابو شهد بأستغراب وتحولت نظرته لغضب / اقول انتوا يالحريم من تشوفوا واحد زين شبهتوه ب هالثنين (( وقلد صوتها )) شيء من هذا القبيل (( رجع لصوته وبقووه قال )) هذا شكله لبناني ياذكيه يالله جيبي بنتك خلينا نمشي ..
\
الساعه 8 المساء /
دق جرس باب بيت بو ثامر بأصرار وتواصل ..
غلا / بيان شوي وراجعه لاتسكري بعد دقيقه كعادتك ..
بيان متملله من سالفة غلا / اوف بسرعه غلا مو فاضيه توني معطله ابي احلل هاليوم ..
غلا معصبه / اوص اقول
حطت التلفون وراحت تركض ترد على الباب
غلا وهي تلهث / مين .؟؟
جاها صوت رجولي / افتحي الباب..
غلا (( وش يبي ذا افتحي الباب مين هو ؟؟ )) رجعت تسأل / مين طيب ؟؟ افتح الباب وبس .. حلا هو؟
ساره / ههه هذه اكيد غلا دفشه ماتدري من هو الرجال وتصاارخ عليه (( دفت فيصل )) شوي فيصل .. غلا افتحي هذا انا ساره بنت عمتك ياهبله .. اعلمك بعد بعمري ولا خلاص
غلا دق قلبها يوم قالت اسم فيصل / ها ؟؟ سوير ؟؟ آم سوري ..
دقت الزر الي يفتح الباب .. ولفت ويدينها تنتفض .. وش سويت ؟؟ وش فيني دفشه كذا وش بيقول فيصل عني الحين؟
دخلت ساره من باب الصاله وريم وراها
ساره ترفع يدها لراسها مثل الشرطه / سلام بنت خالوو الهبله .. لو ماعليك أمر نادي اخوك زياد لفيصل يقول من زمان ماشافه ..
غلا / هاه ؟؟ زياد ..؟
ساره تلمس جبين غلا / اسم الله عليك غلوو وش فيك اخوك زياد تعرفين زياد غيره .؟؟
دفتها غلا بدفاشه / رووحي زين شايفتني هبله مااعرف اخوي .. لحظه بشووف يمكن طالع بعد
راحت فووق .. وساره مستغربه وشفيها ..؟
نزلت ريهام تركض من الدرج ..
ريهام / هالو بنات
ابتسمت ساره لريهام الي خذت كل شطانة اختها غلاا
باستها على خدها ولفت ريهام لريم تسلم عليها ..
ريهام / اخباارك ياشطووره مستعده لخامس ..؟
ساره في نفسها (( يقالها كبيره هي خ ))
ريم بهدوئها المعتاد / ايه الحمدلله .. انتي ياشطوره اخبارك مستعده لسادس ..؟
ماتت ضحك ساره على اختها الي طلعت ذكيه وعرفت ترد على ام لساان ريهام ..
\
الكل متجمع بالصاله والدمووع قايمه بالذاات أم وليد و أم محمد (( الجده )) ..
بو وليد / خلاص يمه .. خلاص رغد لكم نص ساعه ماخلصتوا دموع ..؟
ام وليد وهي تصيح وماسكه راس ولدها / والله ماراح اشبع من الصيااح لو جلست لبكره .. ست سنين ياوليد ماتشتاق لنا وش دعوه سمعت عن ناس درسوا عشرين سنه بس كل اجازه يزورون اهلهم
وليد وابتسامته الي مختلطه مع دموعه / يمه لو كنت كل اجازه بزوركم كان يبي لي 12 سنه على الأقل ادرس .. كل ماشديت على نفسي كل ماخلصت
ام محمد / بس ياولدي قلب امك يتقطع كل يوم .. وقلوبنا مثلها وانت تدري انك بكر ابوك اكيد بيفقدونك .. الضنا يبقى ضنا حتى لو كبر
وليد يبوس راس جدته ولا عشرين مره من وصل / ياجده وش اسوي ابي اخذ الشهاده وارجع افرحها .. والحمدلله الحين بجلس معها طول العمر لا مسافر ولا شيء ..
ام وليد رجعت تصيح زياده وكنها تذكرت شيء / وش بتجلس وانت سفراتك للشغل بتبدأ اكيد .. غير الزواج الي ان شاء الله ماتخلص هالأجازه الا انت مكون لك بيت .. خلاص كبرت بتدخل 30 وانت اعزب ..!!
بو وليد / ههه الحين وليد يتمنى انه مارجع بتبدأ تمثيليات الأمهات ههه
اسيل تمسح دموعها الي ماوقفت / ههه توه راجع امي
وليد ضام طارق / ههه ولايهمك يمه بكره بخطب آمري بس ههه
خالد / ترى تصدق امي بكره تروح تخطب لك افضل تتراجع بقرارك ههه
الكل / ههه
ام وليد تمسح دموعها / ايه صدقت بكره بخطب له ..
روابي تحرك يدينها تمثل / ياسعد حظك ياخوي رجعت بشهادتك من غربتك وتلقى عروستك تنتظر اليوم الثاني
الكل / ههه
خالد / بس تصدقون الغربه خففت دمه ماكانت ضحكته تبين يوم كبر
وليد خزه / بدينا نقايض من اول يوم ؟؟ ماأسرع عبرت عن شوقك
اسيل / ههه شوقه خلص من كثر ما ....... (( وحطت يدينها على فمها ))
وخالد مسك مخده الكنب وضربها فيها
وليد / ها ليكون تزوجت ولاحبيت من ورانا
خالد خزه يعني اسكت وانت عارف من أحب
طارق رافع راسه وهو يناظر في وليد ..
بو وليد / تصدقون طارق من جااء وليد ماتكلم بس يتفرس بملامح اخوه ياعمري شكله نسااه
ناظره وليد بحنانه الي افتقده طارق .. حس ان طارق بيبكي .. فضمه بقوه وهو حاس انه هو الي بيبكي
الكل تأثر على هالمشهد .. وقفت روابي تبي تغير الجو وهي تمسح دمووعها / ولوودي حبيبي .. كنك ماسألت عن عيالي الي ماشفتهم ولا مره هاه (( وحطت يديها على خصرها وسوت انها معصبه ))
وليد ترك طارق ورفع راسه وناظر روابي والكل يضحك / ياعمري توني بسأل بس لساا ماشبعت منكم
روابي تغمز / علينا
وليد وقف مبتسم / فكينا من حركاتك وصرقعتك الي ماتغيرت حتى يوم كبرتي وروحي جيبي نايف ونوف (( لف يناظر اسيل )) اسيل لاتصيري مثل اختك وتجيبي ثنين في ست سنوات زواج .. زين ؟
اسيل حمرت والكل قام يضحك وروابي عصبت رمته بمخدة الكنب ..
وليد تفاداها برشاقه ..
روابي / عادي ست سنوات ينااسب اجيب ثنين .. يعني لو انك متزوج يوم سافرت كان رجعت لنا بثلاثه مو ثنين (( حركت حواجبها على فوق وتحت ))
وليد / ههه كنت بقول لأمي تدور لي على زوجه بس ذاك الوقت الكل منشغل بزواجك .. وانا معهم .. ماأبي اسافر الا انا متطمن على مستقبلك ههه
روابي / ايه ايه ياعمري متطمن على مستقبلي وهو راح وخلاني
خالد / ههه صادقه
ام وليد / يالله روحي جيبي عيالك روابي بس سوالف
روابي كشرت / حرام عليك يمه مشتااقه لأخوي
قرب منها وليد وباسها على راسها ناظرها بعيون سودا كبيره لامعه / وانا مشتااق لك بعد ومشتااق لكم كلكم ماأدري كيف قدرت على بعدكم
ام محمد / المهم

>> الجزء الرابع <<
تقلبت في سريرها الواسع بملل .. مو عارفه ليه مش راضي يروح وجهه عن تفكيرها ..
ردة فعله قبل امس توضح شعوره تجاهها .. يعتبرها بنت عمه وبس .. وهي طول أمس تفكر فيه وتحلل حركاته وتصرفاته ..
وش جاها ..؟؟ ليه تحبه اساسا وهو ماكان قريب منها كثير وهي صغيره ..؟ ماقال شيء يخليها تحبه أصلاً ..
الحب كذا .. يجي فجأه من غير سبب ولا وش السالفه ..؟
مسكت راسها بيديها بقوه .. تبي الأفكار تهدأ براسها .. ماتبي تفكر أكثر من الي فكرت فيه أمس ..
طول عمرها تعصب بسرعه .. بس مو مثل الحين .. الحين ودها تاخذ قلبها وتفصله عن جسمها .. بس المهم مايدق بقوه اذا شاف وليد..!
رجعت بذاكرتها لقبل أمس اول ماطاحت عيونها بعيونه ..!!
\
أسيل / ادخلي وش فيك واقفه ..؟
بو وليد / هلا والله ببنتي ساره تفضلي حيااك ..
ساره ارتبكت / هجري هلا عمي الله يحييك .. آسفه أزعجتكم بس .. (( مسكت فارس من كتفه )) فارس طفش وقال يبي يشووف طارق
فتح فارس عيونه على آآآآخر شيء وهو يناظرها .. وصاار يشبه فهد وهو مفتح عيونه كذا .. ضربته ساره بكوعها .. يعني ألعب الدور
أم وليد / وش دعوه ساره ..؟ تزعجينا والبيت بيت عمك .. حيااك ادخلي مع أسيل وهذا طارق طفشان بعد يونسه فارس ..
طارق خز أمه .. وقال في نفسه (( من قال طفشاان وأخوي ماشبعت منه ..؟ فاضي لهالبزر ))
ساره أبتسمت ودخلت داخل الصاله عندهم علشان تسلم على جدتها وعمها وزوجة عمها .. بعدها سلمت على روابي وباست نايف ..
لفت تدور نوف .. شافتها عند خالها وليد .. طاحت عينها بعينه شافته مبتسم لها .. واي وليد يبتسم ..؟ أخيراً
يااربِ كيف أستحلى وش ذا القمر ..؟
سمعت صوته المميز الي ابد ماراح تنساه / أخبارك ساره ؟ وأخبار عمي ومرت عمي ؟ وفهد وفيصل من زمان ماكلمتهم وش مسوين ؟
روابي برجتها كالعاده / بشوي شوي على البنت كلتها اسأله خ
حاولت ساره تبتسم .. وليد يكلمها .. بس ماقدرت من النفضه الي في كل جسمها ..
ساره بصوت متقطع خافت / الحم دلله كلهم ي يسلمون علي ك
وليد رد وهو يلعب نوف / الله يسلمهم .. يبه انا بمر على عمامي وبسلم عليهم واحد واحد
أم محمد / عمامك وعيالهم كانوا يبون يجون المطار مع ابوك .. بعدين قالوا جو عائلي مانبي نخربه
ابو وليد / ايوا والله متقطع قلبهم عليك
وليد واصل ابتسامته الي الظاهر صارت جزء منه من اول مارجع لأهله ولوطنه / وانا قلبي متقطع عليهم بقوم أريح علشان بكره اروح وأسلم عليهم بنفسي .. هذا واجبي ..!!
\
أنتبهت من أفكارها على صوت الجوال .. شافت الشاشه وردت وهي تحاول تبتسم ..
ساره / هلا والله .. أنا قايله انتي ساحره .. تتصلين بوقتك ..!!
جاها صوت بيان المرح / ههه أدري من كنتي تفكرين فيه بهالوقت ..؟
رفعت ساره ساعتها تناظرها / يوه توني قايمه والساعه 2 الظهر .. ؟ نايمه من الساعه 12 بالليل ..؟
بيان / ههه النوم غدار
ساره بأستهزاء / أحلفي ياشيخه ؟ البحر غدار مو النوم
بيان / مايهم .. المهم من كنتي تفكري فيه ..؟
ساره / آآه يابياان قطعتي علي وأنا أفكر كيف قام وسلم على الكل وحتى نظره ماعطاني .. جلست أسيل تسولف وأنا ماسمعت ولاشيء تقوله .. بالنهايه قالت لي فيك شيء .. قلت لا بس لاني مانمت .. ياربي ماادري أحس أسيل ماصدقت ..!!
بيان مافهمت شيء / هيه هيه .. قولي لي من أول مو تجيبي لي آخر السالفه .. أخلصي كلي أذان صاغيه ..!!!!
\
كان صوت الزفه عالي بغرفتها .. وماسكه ورده بيدها .. وحاطه شرشف أبيض على راسها على أنه الشرعه ..
ترقص بهدووء مع خيال حبيبها ك العاده .. فتحت أمها الباب معصبه ..
أمها / وبعدين يعني أزعجتي الكل بهالزفه ..؟ من صدقتس تتخيلي هذه زفتتس ..؟ شكلتس بتعنسي بتسبدي ..!!
لفت وهي ترمي الورده معصبه على أمها / يمه ..!! وش فيكم تقطعوا علي أحلامي ..؟ اول شيء رندووه بنت بنتك والحين أنتي ..؟
أمها / أقول ...... أعقلي وشيلي من راستس فكرة الزواج من رجال بالخبر بتتزوجي من الرياض فاهمه ..؟
ردت على أمها بعنااد / زواج من غير الي في بالي ماراح أتزوج .. وأنتي تعرفين ان اصلي من الخبر .. ليه أخذ من الرياض ؟ بس علشان امي من الرياض يعني ..
أبتسمت أمها بأستهزاء وبقسوه معروفه بطبعها / أقول لاتنسي الي صار لزوجة أخوتس لأنها خذت واحد بعيد عن عايلتها .. شوفي الحين عايشه بعذاب بيت اهلها .. لو أن اهلها كانوا قراب منها كان على الأقل ساعدوها قبل مايفوت الفوت ..
ردت بملل / اوف يمه .. هي من أول عايشه بعذااب عند أهلها .. وهم ماعطونا اياها الا لأنهم مايحبونها ولاكان مازوجوها من أخوي وهم عارفين عن أخوي .. وو (( سكتت تناظر أمها )) وعنك ..
امها عصبت/ اقول بلا عني ولا عنتس .. وبستس خرابيط .. والي في بالتس زين الزيون يعني انتي ناظري المرايه وخذي على قدتس ..
سكرت الباب بقوه .. وبنتها تتألم من كلماتها السم الي رمتها .. ليه تحسسها دايم انها شينه ..؟ طيب انا طالعه على أهل أمي يعني هي الملامه مو انا ..!!
راح قدام المرايه وتفحصت شكلها ..كانت ضعيفه أكثر من اللازم .. سمراء وشعرها خفيف قصير تحت أذنها .. متموج مصبوغ أحمر .. عيونها صغار .. وفمها ملياان .. لا هي مو شينه بالعكس حلوه ومملوحه .. ايه يمكن شعري انا خربته بهاللون بس أقدر ارجعه ..
أبتسمت وبانت ملامح القساوه ..
الشيء الي ماتعرفه انها قاسيه مثل أمها ... ويمكن أكثر ..!!!!!
\
ساعه وهي تشتكي لها .. بس هي وش بيدها ..؟ تتمنى تساعدها .. بس ماتقدر لأنه ولد عمها مو أخوها تمون عليه وتعلمه عن حبها له ..
بيان / خلااص ساره وش اسوي ياعمري .. تراك قطعتي قلبي وانتي ماتدرين ..
ساره / بيان خليني أشكي خليني .. أنا حاسه اني بفقده .. حاسه انه يحب غيري .. انه بيتزوج غيري ..
بيان / ساره هو مايدري انك تحبينه كيف تبينه يخطبك ويتزوجك ؟؟ لازم نقول لأسيل علشان تلمح له
ساره كانت جالسه على السرير ووقفت مفزوعه / بيانو لاتتهوري ويخطر ببالك تقولي لها ؟؟؟
بيان أستغربت / أجل كيف تبينه يحس انك تحبيه ..؟
ساره رجعت تجلس على السرير وبصوت هادي / من قلبه ..!!
\
نزلت من الدرج وهي تدندن على أغنية يارا صدفه .. ناظرت بالصاله مالقت أحد من أهلها .. ولاسمعت صوت أحد منهم ..
ناظرت الساعه لقتها ثلاث ونص .. قريبه الساعه 2 كان الكل موجود ع الغداء ؟؟
راحت للمطبخ تشرب مويه الا سمعت صوت احد يركض جاي للمطبخ .. لفت تناظر لقتها ريهام جايه تفحط ..
ريهام تقلد أصوات التفحيط / دن هوع ..
غلا / الحمدلله ياربِ ما أنتي بنت .. ولد ..!
ريهام مسكت كاس وصبت لنفسها مويه / ايه الكل يقول طالعه عليك .. (( ناظرتها على جنب بعدها شربت المويه ))
غلا خزتها .. ياليل صدق ام الساان .. أبتسمت .. ههه طالعه علي ..
راحت غلا لعند الباب بتطلع مالها خلق هوشه او شيء ثاني .. بس وقفت ولفت لريهام الي تصب لنفسها كاس مويه ثاني ..
غلا / ريهام وين أهلي راحوا ؟؟
ريهام نزلت الكاس من يدها ولفت لأختها / راحوا يتمشوون .. ريان وتهاني يقولون طفش وامي قالت لأبوي يطلعهم ..
غلا رفعت حاجب / وأنتي ..
ريهام تمر من جنبها / انا جالسه اتابع شريط عطتني اياه ريم لازم اشوفه اليوم وأرجعه لها علشان تعطيني ثاني ..
غلا / مو لله اجل ترجعيه
ريهام رجعت لخبالها وراحت للدرج تفحط / نو .. بس علشاان أخذ ثاني ..
يالله لك الحمد أختي ولد طبيعي مافيها طبع الأنوثه والحيااء خ مثلي وأنا صغيره ..
راحت فوق وتوجهت لغرفتها بعدها وقفت تفكر .. م يمكن زياد بغرفته الحين ؟؟ اليووم أجازه عنده ماراح الدواام ..
راحت ودقت الباب .. جاها صوت عصبي كالعاده ..
/ مين ؟؟؟
غلا / أنا زيااد ممكن أدخل ..؟
زياد / تفضلي ..
دخلت غلاا ناظرت زياد على الكمبيوتر الشخصي يطقطق على الكيبورد .. لف يناظرها بوجه خالي من الأبتسامه ..
أنتفضت غلاا .. طول عمرها تخاف من زياد ولاتقرب غرفته .. وش الي خلاها تدخل غرفته الحين ؟؟
زياد بصوته الجدي / تبين شيء ؟؟
يااربِ حتى مايجاامل ويقول كيف حالك ياأختي ؟؟
غلا تلعثمت / هجري ؟ لا ماأبي شيء بس الكل طالع مافيه الا ريهام على الفديو .. قلت بما ان اليوم أجازه لك اسوولف معك شوي من زمان عنك ..!
زياد رفع حاجب / ليه شايفتني بنت تسولفي معها ؟؟ اطلعي وسكري الباب .. وروحي أتصلي على أحد من بنات عمتك ولاصديقاتك ..
تجمعت دموع غلا بعيونها .. هذا هو أخوي الكبير ..؟ من تزوج ثامر فقدنا جو الأخو الكبير ومزاحه ..!
لفت كأنها مو مهتمه .. طول عمرها كانت تخبي خفة دمها ومقالبها وهبالها عن زياد .. لان دوومه يعصب .. ومزاجه يتغير بدقيقه ..
بس يضحك فجأه يرجع يعبس ..
طلعت من غرفته بدون ماتناظره .. مرت قدام غرفة تهاني .. أبتسمت لنفسها بأستهزاء ..
(( بس أكيد .. ماأكرهه مثل ماتكرهه تهاني ...!! ))
\
واقف عند التسريحه يمشط شعره الأسود الكثيف .. بعدها لبس غترته ..
وجلس يتكشخ .. لازم يسرع لأنه بيسلم على كل عمامه .. أمس خذاه يوم راحه بس اليوم لازم يسوي واجبه ..
ناظر نفسه وأبتسامته الي حالفه ماتفارقه من أول ماوصل وطنه مرسومه على وجهه ..
الثوب يبين من تحته عضلاته .. الي طلعت نتيجة التمارين اليوميه ب نيويورك ..
تعطر وبعدها راح لسريره وجلس على الطرف طلع من الدرج السفلي هديه مغلفه ..
جاب للكل هدايا .. وبيوزعهم يوم العزيمه .. لكن هالهديه يبي يسلمها ليد صاحبتها بنفسه .,! مايبي أحد غيره يسلمها لها ..
رفع راسه .. مو متأكد من مشاعره لحد الحين وهذه مشكلته الوحيده ..!
يمكن لأن عمره وصل 30 تقريباً .. وراحت أيام المراهقه ..! بس الحب مايتغير ..
غمض عيونه وهو ينزل راسه .. بس الصراحه زينه ..! ماكنت أحبها .. بس مايل لها .. يعني اذا تزوجتها يمكن اقدر احبها ..
أبتسم ........ هذا اذا كان فيه شيء أسمه حب بهالحياه .. ولا بس بالقصص الخرافيه ..!!
\
تمشي بشوي شوي .. كأنها توم وهو يراقب جيري .. ناظرت غرفة النوم .. شافته يلبس ثوبه ..
الظاهر بيرووح بيت عمي علشان يسلم على وليد معهم .. أبتسمت بمكر ..
طيب ياميتوو ..!! أن ماطلعت الشيب براسك ماأكون انا روابي ..
شافته دخل دورة الميااه وبسرعه رهيبه دخلت بدولاابه وهي تمسك قارورة مويه بارده بيدها اليمين ..
سكرت باب الدولاب .. ووقفت عند غترته الي متأكده انه بيلبسها .. تسمع خطواته بالغرفه .. ياحبي له .. بس ماأقدر اقاوم حمااس المقالب ..!
دق جواله .. وسمعته يرد ..
متعب / يالله انك تحييه وتبقيه ..
فهد / الله يحييك يارب .. وش اخبارك شمسوي ..؟
متعب / بخير جعلك بخير .. انت أخبارك وأخبار الأهل والوالده ..
فهد / كلهم بخير جالسين ينتظرونك الحين وليد بيوصل عجل شوي ..
متعب / جاي .. مسافة الطريق وأنا عندكم ..
فهد / يالله اجل ننتظرك .. فمان الله ..
متعب / الله معك ..
حط جواله على السرير ومشى بيفتح دولابه ياخذ غترته .. بس وقف شوي .. حط أذنه بباب الدولاب ..
وسمع صوت أحد يتنفس بسرعه .. أبتسم وهو يرجع ياخذ جواله .. روابي هذه ماراح تعقل من رجتها حتى لو صارت جده ..!!
طيب يامرجوجه .. تحسبني ماأعرف حركاتها .. خمس سنوات من خذتها وهي كل يومين مقلب ..
رفع جواله عند أذنه وأبتسم وهو يقول / هلا بحبي هلا بدنيتي كلها يازين ذا الصوت والله ..
أفتحت روابي فمها وعيونها .. مو مصدقه هذا زوجها ..؟ الي مايعرف لشيء أسمه رومانسيه ..؟ جال .. جالس .. ي ي ..
ماكملت تفكيرها الا تسمعه يرد على الي معه ..
متعب / زوجتي ؟؟ لا أتركيها عنك .. تلقينها جالسه بالمطبخ تقشر بصل ههه
>> جاب العيد ^_^
ومن غير ماتنتظر فكت الدولاب بقوه كانت بتكسره ..
بس توها بتنزل منه الا حست بيدين متعب ينتظرونها شالها بسرعه على كتفه.. كأنها عصفور مالها وزن ..!!
ورماها على كنب غرفتهم .. رفعت وجهها المحمر من المفاجأه .. وشافته يناظرها بخبث وأبتسامه مرسومه على فمه بسخريه ..
متعب / أحلى مافيك أنك تقشرين بصل بدولاب الغرفه ..!!
روابي حاولت توقف وهي معصبه .. لأنه فاجأها بحركته .. طول عمرها ماأحد يكتشف مقالبها وش صار الحين ..؟
رجعها للكنب بحركه من يده وجلس جنبها ومسك ذقنها بيده .. وخلاها تناظر بعيونه ..
روابي / ي ي يعني البنت الي تكلمها كذب ..؟
متعب / لا حقيقه ..! بس نسيتها ع الخط لحظه اجيب الجوال تسمعين صوتها ..
روابي بعصبيه جات بتقوم / أقشر بصل أجل ,..؟
متعب رجع جلسها / فديت البصل أنا ..
روابي فتحت عيونها لآخر شيء وش جاه رومانسي اليوم ..؟ / الحين انت من متى تعرف للرومانسيه ..؟
قام مارد عليها وجاب جواله وجلس جنبها / يالله بحطه ع السبيكر أسمعي صوتها ..
ناظرت روابي بالجوال مو مصدقه ..
سمعت أغنية أحمد حسين (( حركاتك ))
(( نظراتك .. حركاتك .. همساتك .. لمساتك .. خلوني ارفع إيديه واقول اني انهزمت ..
وبقولها بشوق عينيه .. وبقولها ........... ف حبك أنا اتغلبت ......
بعيون حلوه وبريئه .. ترسم أحلام جريئه .. بشوفها معك حقيقه .. وأيدك تحضن أيديه ..
الحب معك عرفتوو .. وحنان الدنيا عشتوو .. وحنان الدنيا عشتوو ..
والشووق بعينك شفتوو .. ذا الشوق سهر عينيه ..
انا وانت روحنا وحده .. والدنيا علينا شاهده .. ))
ضغط بأصبعه على إيقاف .. وناظرها نظرات حب ..
روابي بهمس / م لا اليوم متأكده انك شاارب من كأس الحب .. ولا تبي تراضيني على تقشير البصل ..
قالتها من غير ماتكشر او تعصب .. تحبه .. تحبه أكثر من روحها ..
حتى لو مايعرف للرومانسيه .. يكفي يحاول ..
أبتسم متعب وخذ المويه الي متمسكه فيها بقوه من يدها ..
متعب / تدرين ودي أسحب على أخوك ..!!
روابي قامت بسرعه وبأنفعال حركت يدينها بمعنى لا / لا لا تفشلني مع أهلك وش بيقولون .. قايل لأخوك مساافة الطريق وأنا عندك ..
قرب منها وهو يفتح غطاا قارورة المويه وبحنيه قالها / وأنتي ..؟؟
روابي تناظر بيده الي تفتح الغطاا / انا وش فيني ..؟
متعب / لاتسوين نفسك بريئه ..
أبتسمت وهي تناظره / انا لاحق علي حبي ..
مسكت القاروره تبي تاخذها لأنها حست انه بيسوي شيء .. الرومانسيه ماراح تنزل عليه كذاا ..
بس هو سحبها من يدها بسرعه .. طلعت منها شهقه .. وبدون ماتحس لقت نفسها متسبحه بالمويه الباارده
متعب وهو ياخذ غترته وجواله وبسرعه باسها على خدها وقال وهو يطلع من الباب ويضحك / من حفر حفره لحبيبه وق.. كمليها ياحلوه ..
ياربِ خدعني بهالرومانسيه .. !!! كانت معصبه وباقي شوي تركض وراه وتقتله .. بس تراجعت وهي تناظر نفسها في المراايه حالتها حاله ..
بس لفت أنتباهها عيونها الامعه وخدودها المحمره .. آآآه ياقلبي .. هذا مايمسى (( حالة حب ..!! ))
\
هو هنا في بيتهم ..!! وهي بغرفتها .. وش ذا الحظ .. لازم اطلع أشوفه .. عاادي ولد عمي ..!!
كانت تحااول تشجع نفسها أنها تطلع بس الظاهر مافيه فايده كل جسمها يرتجف ..
ياربِ انا ليه رميت نفسي بهالحاله ..؟ ليه أحب اساسا .. أظن نفسي بأوروبا أقدر أحب واتزوج .. حنا هنا مافيه شيء اسمه حب ..
بس زواج .. أفهمي ياساره ..
دمعت عيونها .. ياربِ .. ياربِ ..خلني انساه .. خلني أستوعب انه بس ولد عمي لاأكثر ولاأقل ..!!
انسدحت على سريرها وقررت تناظر فلم في ام بي سي توو علشاان تنسى شوي .. بس على طول سكرت التلفزيون وهي تتأفف ,..
ياليل وش تحب بياان بهالأجانب ..؟
\
بعد ساعه ..
كانت بيان مندمجه على فلم .. مو حاسه بنفسها ..
مسحت دموعها يوم أنتهى الفلم .. حرام البطله ماتت .. ليه ؟؟؟
فلم بايخ .. قامت بعصبيه وطلعت شريط الدي في دي .. ورمته بقووه مع الأشرطه بأهماال .. ماتحب هالنهايات الحزينه ..
تحب ان البطل يتزوج البطله وخلااص تنتهي السالفه .. مو تموت او هو يموت ..
مع أنها ماتصدق بشيء موجود أسمه (( حب )) تعتبره بالأفلام والقصص فقط ..
لكن بالحقيقه ..!!!
أبتسمت بأستهزاء وهي تتخيل شكلها تغني مع حبيبها مثل الأفلام الهنديه ..
ههه ضحكت بقوه مع نفسها كأنها خبله ..
وماحست الا بأحد يدق الباب .. حطت يديها على فمها وخدودها كعادتها حمرو بسرعه .. فشيله شكل أحد سمع ضحكتي ..
أفتحت الباب وشافت ضي تناظرها بأستغرااب ..
بيان / وش فيك تناظريني كذا ..؟
ضي / مع مين تضحكي ..؟
حمرت خدودها أكثر وتلعثمت وهي ترد على أختها / لا مو مع أحد بس كذاا .. تخيلت ان عندنا بالسعوديه حب مثل الهنود .. نرقص مع حبيبنا بالملاهي ههه
ضي فتحت عيونها أكثر .. وقربت تلمس حرارة بيان / الظاهر هذه هلوست الحراره فيك حراره صدق ..
دفت بيان يد ضي بقوه وهي معصبه / رووحي زين قال ايه هلوسه .. ياأختي حتى التفكير حراام ..؟
سكرت غرفتها من وراها .. ومرت بسرعه من غير ماتحس ضي .. رايحه للدرج تنزل درجتين درجتين .. وهي تغني أغنيه من أغاني مسااري .. لأنها تموت على صوته ..
ضي أستوعبت ان بياان نزلت وقالت بخووف / بيان وين ؟؟
بيان ماهتمت لها ونزلت من درج الجهه الثانيه / برووح أشرب مويه ..
أختفت من عيوون ضي الي لساا ماتحركت مو قادره تسوي شيء .. ماتدري وش الي مسكها ..
ضي بصوت خاايف / بس ... بس .. وليد تحت ..!!
قالتها وهي عارفه ان ماأحد يسمعها .. مشكلتها ماتحركت وصرخت علشان تسمع بيان .. شيء خلاها تسكت ..
\
توجهت على طول للمطبخ وهي مازالت تغني أغنية مسااري ((real love ))
شافت الخداامه تسوي قهوه وشاهي وأستغربت ..
بيان / لمين هذا ريكا ..؟
ريكا / مافي معلوم بابا حمد في كلاام سوي ..
كشرت .. شكل احد عندنا .. ليكون عمو بو وليد .. أبتسمت بونااسه غير طبيعيه .. تموت بعمها هذا ..
راحت تركض تدور على اهلها بالفله الكبيره .. راحت للصاله الثانيه جهة الحديقه ..
كانت مسويه قرنين .. ولاابسه بنطلون برمودا مع بلوزه علااقي ورديه .. طالعه كأنها بنت بالرووضه مع وجهها الطفولي ..
طلت بالصاله ماشافت أحد .. يوه وينهم ..؟ يمكن بالمجلس الكبير ..؟ او المجلس الثاني من الجهه الثانيه .. تكيسلت انها تدورهم ,, يمكن مو عمي الي عندهم ..!!
فتحت باب الحديقه بترووح شوي تاخذ هوى بالحديقه أحسن من تجلس دايم بغرفتها ..
بهاللحظه نزلت ضي من الدرج بشوي شوي بعد ماحست بعمرها .. وأنها لاازم تتحرك .. طلت بالصاله .. يؤ ؟؟ غريبه كانوا موجودين بالصاله ؟؟
وين راحوا ..؟
بيان بس طلعت للحديقه على طول توجهت لحوض الورود .. هي الي تسقيه كل يوم .. واو روعه الورود عند الغروب ..
ضحكت يوم شافت عصفوور نازل يشرب من الصنبور الي ينقط مويه ..
كلمته بصوت عالي (( وش تسوي ياقمور هالوقت ؟؟ يالله رووح نوم بسررعه بيظلم الوقت ))
ناظرها العصفور بعد ماشرب مويه .. وهي تناظره مبتسمه .. بعدها راحت تركض تبي تطيره .,. خلااص المفرووض يرووح ينام ..
شكلها كان مرره كيووت وطفوولي .. بس طاار العصفور رفعت راسها ومدت يديها تدور على نفسها وهي تضحك ..
حست بأحد يناظرها لفت تشوف مين .. وشافت شخص طويل يناظرها بأستغراب وهو رافع حااجب ..
ماعرفت شتسوي غير أنها تركض بسرعه وتدخل الصاله وتسكر الباب وراها بقوه عجيبه ..كل البيت سمع صووت الباب ..!!
حست الدمووع تجمعت بعيونها وقامت تسيل على خدودها .. ياربِ مين هذا ؟؟ حطيت يديها على خدودها الي صاروا ساخنين من الفشيله ..
وش ذا الفشيله ؟؟ بهاللبس وهالشكل في شخص غريب شافني ؟؟
شافت أختها ضي جايه تركض لها .. ضي / بيونه وش فيك ؟؟ وش في وجهك كذا محمر ؟؟ من شفتي ؟؟
كانت ضي تطرح اسئله وكأنها تعرف أجابتها .. ماردت عليها بياان وراحت تركض للمصعد ودخلته وضغطت على الدور الثاني بقوه ..
ضي مستغربه ؟؟ وش صاار يعني ؟؟ يمكن شافها بس مو لدرجه يصير وجهها كذا ؟؟
راحت لمجلس الحريم .. شكل أمها جالسه هناك .. شافتها تتقهوى .. وجلست معها تسولف ..
\
بالحديقه نادى حمد على وليد ..
حمد / وليد تعال بسررعه لقيت مكان الصندوق ..
تحرك وليد بخطووات واثقه وهو مازال يفكر بالطفله الي شافها قبل شوي .. معقووله عمي عنده بنت صغيره ..؟ أذكر ان أصغر وحده بياان وهي الحين يمكن بال 20 ان ماخاب ظني !!
وقف وليد عند حمد ومشاري وسطام وعمه .,. يناظر للمكان الي يأشر عليه حمد ..
وليد يبتسم / متأكد ياحمد انه المكاان نفسه .. ماشاء الله الحديقه أكبر بكثير من يوم أروح للخارج ..
بو حمد / ههه ايه دخلنا عليها أرضنا الي كانت فااضيه علشان نقدر نزرع كل شيء .. خابر مرت عمك تحب الزرااعه في البيت ..
سطام / ايه والله مره اقترحت على أبوي نسكن بمزرعتنا ونخلي البيت نزوره ايام العطل
وليد / أجل انقلبت الأدوار
الكل / ههه
مشاري / يالله أجل وليد خذ لك شيء من أغرااض الزراعه وأحفر هالمكاان وتشووف الصندووق الي دفنته انت وحمد من 15 سنه
بو حمد / مشاء الله تدفنون من ورانا وتوكم تقولون لنا .؟
وليد / ههه ياعمي كان عمرنا وقتها 14 سنه وحبينا نسوي مغامره ..
حمد يهز حواجبه / بس كانت فكرتك ياعبقرينوو صح ..
وليد / ههه للحين تذكر لقبي ..
حمد / وأحد ينساه ..؟؟؟!
\
اليوم الي بعده الساعه 5 المساء /
ماتبي تفكر بالي صاار أمس .. يوم قالت لضي قامت تضحك عليها ولاأهتمت .. قالت لها انه ولد عمها " وليد " وهالمواقف تصير لكل الناس ,.؟
بس هي أول مره تصير لها .. ياربِ فشيله وش بيقول عنها ؟؟ اكيد بيقول انها متعمده ..
رجعت دموعها تتجمع بعيونها .. ياليتني اقدر اقول لسااره بس أعرفها بدال ماتهديني بتعصب علي ل