إذا نبي والله نقدر

1. والله عيب علينا ..


2. فهموني شلون تضعفون ؟؟؟؟؟؟؟؟..


3. وعندي لكم بعد نصائح حق اللي تشجعت من كلامي وتبي تسوي رجيم ..


4. خلكم وبشوف وين بتوصلون <<<< عصبت ماادري ليش

بسم الله الرحمن الرحيم
السلام عليكم ورحمة الله وبركاته
شلونكم دبدوبات وعصقولات ( ماكو رشيقات , لان هالقسم اغلب اللي يدخلونه من العصاقيل او الدباديب ) ..
بدش بالموضوع على طول ..
في أشياء وايد بالدنيا لما ننولد نلقاها موجوده معانا , وفي اشياء نقدر نغيرها واشياء مانقدر نغيرها ..
مثلا من الاشياء اللي مانقدر نغيرها اهلنا , وفي اشياء وايد نقدر نغيرها مثل شكل الجسم ( وهذا موضوعي ) ..
لما الوحده منا تكون دبدوبه والا عصقوله , وتحلم بالجسم المثالي , اذا كانت تبي هالشي بتقدر توصله , لان في مقوله تقول إن الاشياء تأتي لمن يريدها ..
وايد ناس من هالفئات يقولون احنا من اول ماانولدنا جذي وهذه طبيعه جسمنا ومانقدر وهذه وراثه ....والخ من هالتبريرات السخيفه , انا اقولهم لا ياحبايب قلبي انتوا تقدرون تختارون اللي تبونه , اللي تبي الجسم المثالي تقدر توصله ..
مثلا لما الانسان ينولد فقير , يظل طول عمره فقير ؟؟
يحط ايده على خذه ويقول ربي خلقني فقير خلاص ؟؟
لا طبعا يشغل مخه ويدرس ويشتغل ...الخ , عشان يحسن ظروف معيشته ..
نفس الشي بموضوعنا , لما نكون عصقولات او دبدوبات , نقدر نغير من نفسنا ونطور نفسنا عشان نكون افضل ..
الانسان دايما يطمح للافضل بكل شي , فليش مانصير افضل بجسمنا وصحتنا ..
قبل شهور كنت اسوي بحث حق ماده , واثناء بحثي في الانترنت لقيت هالمعلومه ( هذه حق المتان ) , يقولون على الصعيد المهني , في بعض الدول يقل راتب النساء اللي عندهم وزن زايد بنسبه 5% ..
بنات والله وانا اسوي البحث واحط هالمعلومه بالبحث كنت مستحيه من نفسي لما يقراها الدكتور , حسيت انها عني ( لأن بوقتها كان وزني بلوه سوده ) ..

والله عيب علينا ..

ومن الاشياء اللي تفشل وتقهر لما الوحده فينا تدخل السوق , ياسلام ياسلام , خاصه المتزوجات اللي يروحون مع ازواجهم , او البنات اللي مثلي يروحون مع اهلهم والله مانستحي من نفسنا , ومن مقاساتنا ؟؟
ولا وصراحه احلى شي بالموضوع لما ندخل المحل ويعجبنا شي وطبعا المصيبه ان مانكون بروحنا , وندور بهالمقاسات الكبيره XXXXXXXXXXXXXXXXXXXXXXXXl ''] , طبعا بعد عناء طويل لقينا هالمقاس اللي كتبته وماادري اذا كان موجود او لا , المهم خذينه القطعه اللي مقاسها مليون ودخلنا غرفه القياس , والجمهور اللي معانا ناطر يشوف شكل القطعه على جسمنا عشان يعطينا رايه اذا كانت حلوه او لا , وطبعا الطامه الكبرى واحنا بغرفه القياس , القطعه وربي ( هذا بالنسبه حقي انا ) , والله القطعه توصل فوق الصدر وماتنزل , وانا اكذب على نفسي واقول لا بتنزل وبعد صراع طويل والوجه صار قوس قزح من الحر والقطعه مو راضيه تدخل فينا , عاد نستسلم للواقع ونقرر نفصخها , وبطلعه الروح تطلع , ونطلع من غرفه القياس والوجه احمر ويصبصب عرق من الضغط اللي صارلنا , والجمهور اللي برا يقولونا هاه ( طبعا بنبره صوت وتعبيرات وجه تحسسج جنج طالعه من غرفه ولاده وناطرين ولد والا بنت خ ) ..
لا يقولون هاه مااعجبتج ؟؟ , وطبعا بقلبنا نقول آآآآآآآآآآآآآآآخ الا اعجبتني بس مو كبري , بس طبعا نستحي نقولهم مادشت فينا لان مثل ماقلنا المقاس
ففشله نقول مو كبرنا , نجذب ونقول مو حلوه باللبس <<<< يعني مرقعين السالفه ..
وطبعا النفسيه خلاص والعبره خانقتنا , والطامه الكبرى لما نرجع البيت ناكل من القهر ..
والشي اللي يفشل بعد , لما الناس كل يوم والثاني يسمعونه نبي نسوي رجيم , وتمر سنه ورا سنه واحنا كله على لسانه كلمه رجيم والناس ماشافوا اي نتيجه , بالعكس يمكن النتيجه كانت زياده الوزن ..
وابيخ شي لما نروح مطعم , يعني تخيلوا شكلنا كل وحده دبه وداشه مطعم , تصدقون عاد انا لما اشوف احد متين داش مطعم وربي انقد عليه ( مع ان انا نفسه ) , فمابالكم الرشيقات شنو يقولون !!
ومن الاشياء اللي تقهر وتبط الجبد , بالجامعه مثلا او بالاعراس او المناسبات , كل وحده من البنات الرشيقات كاشخين ولابسين احلى لبس , واحنا قاعدين بمكانه مقهورين وناطرين بس متى نرجع البيت , واللي يذبح من القهر ان والله احنا حلويين واحلى من كل هالبنات , بس جمالنا مدفون بسبب وزننا سواء كنا عصقولات والا دبدوبات ..
ومرات الوحده فينا توصل لمرحله انا وصلتلها اللي اهيا ماتروح لا عرس ولا بطيخ ..
انا عن نفسي وصلت لمرحله كنت بس اروح الجامعه , لا اروح السوق ولااروح اي مكان , وصارت الطلعه مثل الهم وربي , صرت بس قاعده بغرفتي وقاعده على هالنت وطايحتله اكل , واقول ابي اضعف ..
طيب بالعقل شلون اضعف وانا اكل كل هالاكل ؟؟ , هذا تناقض , لان اللي يبي يضعف لازم يقلل اكله ويغير طريقه اكله , والمشكله احنا مانفكر حتى نسوي رياضه او نقلل اكلنا , ونقول ياربي ليش مانضعف !! ..
مانضعف لان مانبي الرشاقه ونبي الاكل , بس لما نعكس تفكيرنا ونقول نبي الرشاقه ومانبي الاكل , راح نقدر , عشان جذي سميت موضوعي اذا نبي نقدر ..
ولا وحده الحين تدخل وتقولي ابي بس مااقدر , لان مثل ماقلتلكم اذا نبي نقدر لان الاشياء تأتي لمن يريدها ..
ومايصير نحط ريل على ريل وماسكيين بايدنا سندويش , وايدنا الثانيه كيت كات <<<< غرامي خ
وعلى الطاوله بيبسي ( المشكله ان البيبسي دايت خ ) , وعلى السرير شبس , وعلى الارض انواع الحلاو , ونقول نبي نضعف ..

فهموني شلون تضعفون ؟؟؟؟؟؟؟؟..

اي وفوق كل هذا على كل هالاكل , نكون مشغلين اللاب توب او الكمبيوتر وشابكين بمنتدانا الحلو وداشيين قسم الدايت شوب , وندور بهالرجيمات , وربي وربي تناقض , ندور رجيم وناكل كل هالاكل , مايصير ..
ومسكين والله هالكمبيوتر , كل ماشفنا رجيم سويناله نسخ ولصق بملف وحفظناه وخليناه الى اجل غير مسمى , وكل ماشفنا خلطه رحنا شرينا المقادير وماانطبق , وبعدين نقول ياربي مانضعف , واللي تقول انا وزني ماينزل بسرعه ( نفسي انا , كنت اقول وزني ماينزل بسرعه ) , اوكي صج وزني ماينزل بسرعه بس المهم ان ينزل , حتى لو بالاسبوع ربع كيلو , المهم فيه نزول ..
وافضل نزول يابنات وعن تجربه هوا النزول البطئ , اللي مايتعدى الكيلو او الكيلويين بالاسبوع , افضل نزول لان مايترهل الجسم بشكل بشع ومايرجع الوزن بسرعه ..
ويابنات لا تظنون ان الرشاقه حلم وان الرجيم سحر , الرشاقه مو حلم ولا شي مستحيل , كل انسان يقدر يصير رشيق , وصدقوني الرجيم مو سحر , يعني لما تقرون رجيم ينزل وزنج بالشهر 30 كيلو لاتصدقين , لان بالعقل اصلا مستحيل كل يوم تنزلين كيلو حتى لو ماتاكلين شي , فحطوا في بالكم ان الرجيم مو سحر ..
وفي شي مهم اكثر من الرجيم واكثر من الاراده واهوا الصبر , يابنات والله ان الصبر اهم من الاراده ..
الصبر يولد الاراده , والاراده انا بوجهه نظري موجوده عند كل البشر ولكن الصبر نادر وجوده ..
والدليل لو اجيب اي بنت تقول انا ماعندي اراده واقولها هالرجيم سويه لمده شهر وتنزلين 30 كيلو راح تسويه وتلتزم فيه حتى لو كان قاسي , والسبب ان ماعندها صبر بس عندها اراده ..
لكن لو اجيب وحده واقولها سوي رجيم لمده 6 شهور وبتنزلين فيه 30 كيلو وماراح يرجعون هالثلاثين كيلو طول العمر , صدقوني ماراح تسوييه , لان مافيها صبر ..
عشان جذي يابنات اهم شي الصبر , يعني اذا وحده تبي تنزل 40 كيلو , خل تحط في بالها بتنزل هالوزن بسنه او 6 شهور ..
ويابنات اهم شي بعد , الرجيم اللي تسوونه يكون صحي , وضروري بعد ماتوصلون للوزن المثالي تسوون نظام تثبيت وزن عشان مايروح تعبكم عالفاضي ..

وعندي لكم بعد نصائح حق اللي تشجعت من كلامي وتبي تسوي رجيم ..

يابنات بفتره الرجيم لاتدخلون السوق , ولاتخربون نومتكم ( لان انا هالاسبوع خربت نومتي وانعفس حالي ) ..
وحطوا في بالكم انكم لازم تطلعون بلوك يديد سواء برمضان او بعيد الفطر او حتى بعيد الاضحى , او حق السنه الدراسيه اليديده , او حتى حق ازواجكم , والا حتى حق نفسكم ( يعني حطوا هدف عشان تقدرون تستمرون بالرجيم ) ..
بنات انا ادري ان الموضوع حوسه وملخبط , سامحوني لان صارلي سنين مو كاتبه موضوع , بس والله هدفي من هالموضوع انكم تتشجعون وتغيرون تفكيركم ..
بنات قبل شهور كنت رايحه الجامعه وبالطريج شفت سياره مكتوب عليها مااذكر بالضبط الكلام لكن المعنى مكافحه السمنه او محاربتها , والله فشله لما وحده منا احنا الدببه تمر وتلقى اعلانات مكتوب فيها محاربه السمنه , والله شعور مو حلو لان الكلام عنه احنا , السمنه صارت مرض وصارت شي خطير اكثر من المخدرات والتدخين , بنات والله اهم شي صحتنا , والسمنه ماوراها غير الامراض ..
وغير الصحه , يابنات المتزوجات , بالله عليكم لما تقعدون مع ازواجكم بمكان وتمر وحده رشيقه يمكم , شنو يكون موقفج وشعورج ؟؟
انا مو متزوجه بس بجاوب , في بنات يحاولون يسولفون مع زوجهم عشان يشغلونه ومايطالع , وفي بنات تخنقهم العبره , وفيه بنات يتنرفزون وودهم يذبحون البنت , ليش تسوون كل هذا ؟؟
سووا رجيم صحي لمده سنه او شهور وان شاءالله يصير جسمكم حلو وازواجكم مايطالعون غيركم ..
يرضيكم يامتزوجات , ان ازواجكم يشوفون هيفاء وهبي والا نانسي عجرم والا وحده من هالمغنيات , ويقارنون بينكم وبينهم ؟؟ , بنات منو هالاشكال عشان تسمحونلهم انهم يتقارنون فيكم , والله انتوا احلى منهم , بس ناقصكم رشاقه ..
خلصنا من المتزوجات , الحين نوصل للبنات العزوبيات اللي مثلي , بنات مو عيب عليكم , كل وحده بتنفجر من المتن وكأنها ام عيال , والله عيب يابنات , الوحده فينا عمرها 19 والا 20 بس لما الناس تشوفها تحسبها 30 !!!!!!!!!!!! من المتن ..
والا احد يتقدملكم ويقول انا ماابيها عشانها متينه , مو عيب , مافيكم احساس !!
لا جد خلاص انا تعبت وانا اكتب وانصح , انتوا بنات كيفكم تبون السمنه خلكم طول عمركم متان ..
خلكم طول عمركم دافنين نفسكم بنفسكم , خلوا المتن يدمر حياتكم ,ويخليكم انطوائيين وماعندكم ثقه بنفسكم , وخلكم طول عمركم تدورون بهالرجيمات والخلطات وماتسوون , بس فالحين تشترون بهالحبوب اللي تجيب الامراض والبلاوي وتاكلونها عشان تسد الشهيه ..

خلكم وبشوف وين بتوصلون <<<< عصبت ماادري ليش

انا عن نفسي ان شاءالله مكلمه لي الاخر وقايله هذا اخر رجيم بحياتي ولازم ان شاءالله اوصل للوزن المثالي واعيش حياتي الباقيه وانا رشيقه , اللي تبي تصير مثلي حياها الله , واللي ماتبي انا من الحين اقولها لاتفكر تدخل قسم الدايت شوب , لانها بتضيع وقتها على الفاضي , خلها بقسم المطبخ احسن ..
آسفه يابنات اذا كان الموضوع طويل ومخربط والكلام ماعجبكم , يمكن يكون تافه لبعض البنات وحلو للبعض الاخر , بس والله يابنات اتمنالكم كلكم انكم تصيرون رشيقات , وتتمتعون بصحه حلوه , وماتهمني الردود كثر ماتهمني رده الفعل الايجابيه والله ..
ولأني مو نحيسه بحطلكم رابط رجيمي اللي متبعته , ورابط القروب اللي بديت معاهم حياتي من يديد , ورابط نظام التثبيت اللي ناويه ان شاءالله اسويه بعد مااوصل للوزن المثالي ..
هذا رابط الرجيم http://alfrasha.maktoob.com/showthread.php?t=267805 ]
هذا رابط القروب اللي بديت معاهم http://alfrasha.maktoob.com/showthread.php?t=480727 ]
هذا رابط نظام تثبيت الوزن http://alfrasha.maktoob.com/showthread.php?t=532243 ]
اتمنى مايكون موضوعي ضيع وقتكم عالفاضي , وكنت اتمنى اكتب اللي عندي بطريقه احلى بس هذا اللي طلع معاي , ان شاءالله المرات اليايه اكتب شي يكون مرتب اكثر