ابي اعرف شلون اسوي رز ابيض حلو

حتى انا ابي اعرف لانو ساعات يظبط وساعات لا
ان شاء الله البنات يفيدونا

الطريقة تغسلي الرز وتفركيه زين بس انتبهي لا يتكسر وحبذا المويه تكون دافيه شوي بعدين صفيه من المويه وخليه على جنب عشان يجف يعني من عشر الى خمسة عشر دقيقه وجيبي قدر فيه زيت او سمنه او سمن وبعدين سخنيه الين تكون درجته عاليه بس مو تحرقيه واضيفي الرز وقلبيه كثير الى حد ماتحسي انه بدا يلصق في بعضه اضيفي الماء بس لا تكثريه يعني اللي يغطيه بس واضيفي عليه الملح والهيل وخشب القرفه والهيل يكون حبات مو مطحون وخليه على اصغر نار عندك وممكن تسوي معه انك تجيبي بصلة وتقطعيها زي ماتحبي وتبشري جزر وتحمريه معاها وتضيفي عليها الزبيب وبالهنا والعافيه

مشكوره حبيبتي بس كنت ابي اسال المويه تكون حاره ولا عاديه....

انا طريقتي اول شى اجيب دجاجه واقطعها بالنص واحطها بمويه مغليه مع ماجي ابيض وملح اين تصير شبه استوت طبعا الرز مغسول ومنقع قبلربع الى عشر دقايق بعدين اشيل الدجاجه اللى اخذت نكه الملح والماجي واحمرها بالفرن بعدين اجيب البصل احمسه بزيت كثير شوي لين يتحمر بعدين اكبه على الرز بزيته والله يطلع جونان عاد كلن وطريقته

عشان يكون متماسك يعني مو معجون لازم تكون المويه حاره........وبعدين المطاعم يحمرون بصل مقطع شرايح في سمن وبعدين الرز.....

انا طريقتي
اغلي الماء اول شي
بعدين اضيف له اللحم والتوابل ( مطحونه او عدله ) كله واحد وهيل عدل مو مطحون وحبحر حاار وماجي ابيض وملح وبصل وثوم واتركها على (نار هادية ) اطعم والذ
مع ملاحظة الماء لايكون كثير بزياده يعني مجرد يغطي اللحم شوي باختصار يكون على سطح اللحم بالضبط
واذا نقص الماء اثناء الطبخ واللحمه ما استوت زيدي شوي ماء مغلي عادي......
وبعد ما تستوي اللحمه اصفيها من المرق
وبعدين اجيب قدر واحط فيه شوي من مرق اللحم بارتفاع 2 سم او 3 سم اذا كانت كمية الرز شويه اما اذا كانت الكمية لعائلة كبيرة طبعا يكون اكثر واضيف له ماء مغلي ويكون كميته اكثر من المرق عشان يطلع الرز ابيض واضيف له زيادة ملح وماجي ابيض وملعقة شاي سكر وحبحر حار عشان يعطيه نكهه واتركه يغلي وعلى طول اضيف الرز المغسول بعد نقعه 10 دقايق
طبعا انتبهي لايكون الماء كثير ((( اغمسي ملاسه في الوسط واتركيها اذا هي طاحت او مالت فكميت الماء كثيرة -- اما اذا ثبتت في محلها فكميت الماء مناسبة )))
و اتركهه على نار هادئه وقبل ما ينشف بشوي يعني خذي سكين واغمسيها بالرز وارفعيها اذا شفتي فيها شوي رطوبه اضيفي عليه ملعقة زيت عشان ما يتلاصق مع بعض وبعد ما ينشف الرز تكوني مجهزة الحميسه طبعا اكيد تعرفينها حطيها على وجه الرز وغطيه
وجربيها وان شاء الله زوجك بيبوسك يديك وبتدعون لي
ولا تنسين تردين علي تفرحيني انها ضبطت معاك زين

مشكورات حبايبي

شوفي طريقتي وحلوههه وطعم الزر حلو وابيض
اول شي اقطع بصل وثوم فص واحد واحط زيت انا افرم البصل والثوم وممكن تقطعيم مكعبات صغيره
واكشنهم اجيب الدجاج او اللحم بس الدجاج افضل له ها الطريقه واللحم طريقه ثانيه وحطه باالقدر فوق
الكشنه واحط شوي مويه واحط فلفل اخضر حار ودارسين عودين وملعقه ماجي ابيض ومسمار عدل حبتين
وحبتين هيل عدل واغطي القدر على نار وسط دقيقتين او لين يصير الدجاج او اللحم ابيض وازيد عليهم مويه
فايحه الين تغطي الدجاجه واخليها تطبخ عادي وحط ملح طبعاً واجيب الرز واغسله زين وانقعه في مويه
دافيه وملح وفلفل اذا استوت الدجاجه احمرهاوشيل البصل والفلفل وكل البهارات العدله واحط الرز فوق
المويه وزيدها مويه الين يغطي الرز واعلي عليه النار واغطيه واذا بقى شوي مويه تحت اقصر مره النار وخليه
وحط الكشنه والصنوبر او الزبيب بعد مااخذ شوي رز من القدر من الي فوق واخلطه مع الكشنه واحطه فوق
الرز الباقي واغطيه والفلفل الي مع الرزالمنقوع احطه اذا جيت بحط الرز عشانه بيعطي ريحه حلوه وطعم
او اذا حطيتي الرز باالقدر حطيه فوق الرز وشوفي رزك بيصير احلى من رز اي مطعم ولا الرومنسيه
بس حاولي تضبطين كمية الملح قبل ماتكبين الرز والمويه تصير مناسبه عشان مايلتبد ولاتخلينه يطول
اذا كبيتيه يبيله تقريباً ساعه او ساعه الا ربع اذا الكميه كبيره اذا الكميه كاس رز نصف ساعه تكفيه
وان شاالله اكون افدتك

بصراحه انا عني اختصر جدا ويعجبني طعمه ..
بعد مااغسل الرز انقعه في مويه دافيه شوي بعدين احط عليه شوي زيت وملح وابشر جزر واحطه عليه
ثم اصب عليه المويه المغليه واحطه على النار لين يبدا يتقلب ثم احط عليه فلفل بارد اقطعه نصفين..
ريحة الفلفل لما يطبخ تجنن وتعطي نكهه للرز ماتوصف ..
والطريقه كلها ماتاخذ ربع ساعه معي..
اكثر شي اصلحه معه خضار ..