احلى زربيان من يدي وعلى اصولو شي واو

اهلين حبايبي
حبيت اكتب لكم طريقة الزربيان اللي بصراحه اعجز وانا امدح فيه
انا قد ذقت زربيان عند ناس كثير اعرفهم بس الوحيد اللي اخذ قلبي وكل حواسي معاه ههه
ذقتو عند خالتي واخذت الطريقه منها وصرت اسويه دايما والكل يموت عليه
وبما اني احبكم واحب افيدكم زي ما انا استفدت قلت بكتبلك الطريقه وتراها سهله
المقادير..
طبعا مقاديري بالنظر
دجاجه منظفه ومقعطه ار بعه بالجلد
بصل شرايح ( اهله ) كميه كثيره
طماطم
زبادي علبه او علبتين على حسب كمية الرز
ماجي
ملح صيني ( اجينو موتو )
بهارات صحيحه ( ورق غار _ خلنجان _ قرفه )
بهارات مطحونه ( قرفه _ قرنفل _ هيل _ بهارات مشكله _ خلنجان _ كركم )
رز مسلوق نص سلقه في مويه وزيت وملح وملح صيني وهيل
الطريقه..
يالله شمروا اكماكم وتعالوا معاي
1_ حمري البصل المقطع شرايح في زيت غزير الين يصير غامق زي حق الصياديه وحطيه في مصفايه.
2_ حطي في الخلاط الكاس:
(الطماطم قطعيها ارباع وحطيها_ البصل اللي حمرناه _ الزبادي _ الماجي )
3_ بهري الدجاج بالبهارات التاليه :
( كركم _ بهارات مشكله - قرفه _ قرنفل _ هيل) بهريها كويس من جميع الاتجاهات يعني افركيها من قلب بإخلاص.
4_ اقلي الدجاج في زيت البصل يعني خليه يغطي ربع الدجاجه وخليه يتحمر على الوجهين
وتقربيا يستوي بعدين شيليه وحطي في مصفايه او على ورق نشاف.( وهو في الزيت قلبيه كل شويه عشان مايلزق او يتفتت معاك ) والزيت طبعا حرارتو متوسطه.
5_ اذا القدر اللي قليتي فيه الدجاج ملتصق فيه بقايا دجاج ومحروقه حطي الزيت اللي فيه في قدر ثاني
عشان نستخدمو بعدين.
6_ حطي كميه مناسبه من الزيت اللي قلينا فيه الدجاج في القدر وحطي عليه الخلطه اللي سويناها في الخلاط وحطي عليها هذي البهارات الحب(خلنجان _ ورق غار )
والبهارات المطحونه ( قرفه _ هيل _ قرنفل _ خلنجان )
وحطي الملح والملح الصيني والدجاج وخليه على نار واطيه الين يتسبك تقربيا 10 دقايق ويستوي الدجاج بالمره.
7_ حطي الرز على الدجاج والخلطه بس لازم تكون في كميه من الخلطه يعني تغطي ربع الرز من تحت و اغرزي فيه عودين قرفه وصبي عليه زعفران منقعتو من اول في مويه دافيه.
8_ وحطي رشه هيل مطحون ورشة قرفه مطحونه ورشة قرنفل وغطي القدر بالقصدير وفوقو الغطا وخليه على نار مره هاديه الين يستوي الرز بالمره طفي عليه وقلبيه في القدر وغطيه.
قدميه مع سلطة الزبادي..
طريقتها..
اخلطي زبادي مع خيار مبشور وشويه جزر للي يحبو ونعناع ناشف وملح وكم ملعقة لبنه عشان تثقل
وثوم مهروس ورشه فلفل اسود بسيطه
وقدميها بجنب الرز واستمتعوا بأحلى زربيان
واي استفسار انا حاضره وبالعافيه على قلوبكم حبايبي