اكلي الصيني لخوياتي اول مرا انزل طبخه لاتفشلوني

السلام عليكم مرحبا بنات
وحشتوني كلكم ههه شخباركم
عاد اليوم انا مسويه اكله واتمنى تعجبكم يارب وتراني اول مرا انزل موضوع في قسم الطبخ يعني الله الله بالتقيم
قيموني تكفون عشان اشوف هل استمر او لا المهم الحمد لله انا اعرف اطبخ
وبتزوج قريب وبوريكم الطبخات وهاذي اول تجربه لي بقسمكم
واتمنى تتقبلوني وتقيموني
عاد اليوم مسويه لكم اكل صيني وبكتب لكم الخطوات والصور وكل شيء
نبدأ: اولا طبعا قطعت الخضار وهو عباره عن جزر وبصل وفلفل رومي وثوم وفلفل اخضر مع كزبره وبصل اخضر
ثانيآ: تبلت الدجاج والتتبيله عباره حطيت الدجاج في بيض وملح وفلفل بعدين غمسته بنشا الذره
ثالثآ: نقلي الدجاج ونحطه ع جنب وهذي صورته وهو مقلي
رابعآ:ناخذ صينيه ونحط فيها البصل ونحمسه لين يذبل ونضيف الفلفل الحار والكزبره نخليه 5 دقايق لين يذب نحمسه بزيت طبعا
وبعدين نضيف الدجاج كله ونضيف الخضار كله ونحمسهم
ونجيب كاسه نحط فيها نص كاسة مويه و4 ملاعق صويا و3 ملاعق كتشب وملعقة نشا وتحركينهم و2 ماجي مذوب بالمويه تكون حاره شوي
وتحطينهم عالخلطه كذا
وتضيفين كاس مويه وتخلينهم 5 دقايق يطبخون
وهذا الشكل النهائي للدجاج
خامسآ: نجي للرز رز عادي ابيض مسلوق بملح وزبده واذا تبين تضيفين خضار كيفك انا ماحطيت وهي صورة الرز لان بسويه قبل لايجون البنات وحلاته يكون فرش واخر شيء
سادسآ: نسلق المكرونه انا افضل النوع ذا قودي احبها واسميها الدبه هع
ذي بعد السلق نسوي الخضار البصل الابيض
والفلفل والبصل الاخضر والثوم ونخليها تطبخ 5 دقايق لين تذبل
نسوي نفس الخلطه اللي فوق كاس مويه واحد ماجي كتشب صويا ملح فلفل ملعقة نشا ونضيفها للخلطه
ونزيد كاسة مويه او نص ع حسب رغبتك انا حطيت كاسه
وتحركونها لين دخل المكونات كلها فيها 3 دقايق بس
وهذي شكلها بعد ماطلعتها تشهي بشكل
وهذي النهايه والطبقين مع بعض يارب يعجبكم
يارب يعجبكم الموضوع وترى تعبت عليه اتمنى تستيفدون والله الله بالردود عشان اسير صديقة القسم هع
ادعوا لي ربي يتمم زواجي على مابغى ويحميني انا وزوجي من عيون الحساد ويسخرنا لبعض ويهدينا