البرياني لا يفوتكم

1. المقادير

المقادير

دجاجة ، علبتين روب حجم كبير ، بهارات البرياني وهي تنباع جاهزة بالأسواق ويفضّل بهارات مهران أو بهارات برياني باكستانيه ، ورق غار ، شوية خردل ، شوية كمون حبوب ، كمية بصل حوالي 7 بصلات كبار ، كزبرة خضرا ، ثوم كل ما زادت كمية الثوم كل ما كان أفضل ، بهارات عروق هيل ، فلفل أسود ، قرفة ، مسمار ، لومي ليمون ناشف ، صبغات أكل أصفر ، برتقالي
مقادير سلطة البرياني
6 خيارات بدون قشر ، علبة روب كبيرة ، ليمون ، فصّة ثوم ، شوية ملح وفلفل
طريقة السلطة
ابشري الخيارات الست بمبشرة واختاري اللي تسوي شكل شرايط متوسطة الحجم
بعد كذا ضيفي الروب واليمون والملح والفلفل والثوم حركيهم زين وخليهم بالثلاجة
طريقة البرياني
نقطع الدجاجة إلى 8 قطع ونشيل منها الجلد ونغسلها زين وبعدين نضيف الدجاج وعلبتين الروب وبهارات البرياني مع الكمون وورق الغار والخردل ونخلطهم زين ونغطي الخليط بقصدير ألومنيوم
نقطّع البصل للنص وبعدين الأنصاص نقطّعهم لشرايح ونقليهم بالزيت لين يتقمّر البصل ونصفّيه من الزيت ونخلّيه على جنب
بعد ما ننتهي من البصل نحط قدر على النار ونحط فيه زيت ونخليه لين يسخن ونضيف له الثوم المطحون ولما يتغيّر لون الثوم شوي نضيف خليط الدجاج كله باللي فيه ونحركه مع الثوم ونضيف اللومي والكزبره ، ونغطّيه زين ونخلّيه على نار هاديه لين ينجح الدجاج مع التقليب كل فترة وفترة
لين ما ينجح الدجاج نجيب قدر ثاني ونحط فيه ماي مغلي ونحط الرز البسمتي مع زيت وملح والبهارات العروق ، لازم ننتبه إن الماي لازم يكون طاغي عالرز يعني الرز رح ينسلق مو ينجح بالماي رز مشخول
بعد فتره بسيطه خذي حبة رز وإذا لاحظتي إن الحبة ذي شبه مستويه صفي الرز وخلّيه على جنب
نرجع للدجاج إذا كان الدجاج استوى حطّي فوقه البصل المقلي وحركي الخليط وطّي النار تحته
إلحين نفس القدر اللي سلقتي فيه الرز حطي ثلاث أرباع كمية الرز وبعدين حطي خليط الدجاج مع الروب كلها فوقها وفوق الخليط حطّي باقي الرز
وبعدين ذوبي شوية صبغة صفرا وبرتقاليه في ماي ورشيهم فوق الطبقة الأخير
إلحين غطّي القدر بقصدير وحطي صاج على نار هاديه وفوها حطّي القدر وخلّي الرز لين يبدا يدخّن واتأكدي قبل لا تطفين النار إن الرز مستوي
بعد ما يستوي الرز ويعد ما تأكدنا إنه دخّن نحرّك الرز كله حركه خفيفة عشان تنخلط الصبغة وتعطي لون حلو للكمية كلها انتبهي تتكسّر عليكِ الدجاج حاولي تحافظين على شكلهم
بعد كذا حطي الرز في صينية التقديم ولا تنسين السلطة