الحلى الكارثة اللي سطل العالم

سلخير قميعا ..
حي الله كل خشتن قلطت خشة خشة كل خشة باسمها ..
طبعا اكيد كوولكم مستغربين وش هالسنع اللي انكب علي فجأتن وبدون مواعيد .. على فكرة تراني منيب مسخنة ولافيني الا العافية ..لاتظنون اني شسمه ..
بس هذي الطواري وماتسوي .. وهالسنع ترى ماجا كوذا لوجه الله لا بالتأكيد ..
هذا سلمكم الله هما صقيقاتي عزموا انفسهم عندي الله يرعاهم .. وقالوا ترانا نبي نقلط عندك لاتقولين ماعلمتوني .. <== خوش والله
عاد وحدتن منهم ماشاءالله عليها رمز للسناعة الله لايضرها وعساها تعاديني واصير زيها ..
قالت لي اسمعي انتي وخشتك يالرفلا.. ابيك تسوين لنا حلى اذا جينا عندكم مهب كل مرة تلعبين علينا وتجيبين لنا من برا وتقولين شرايكم في حلاي..
ترى الحركات ذي مكشوفة بس ذيك الايام كنت اجاملك وماودي اسكب ماء وجهك عند البنات.. <== كاشفتني
وكنتي تتعذرين بالدراسة وبالجامعة والاختبارات لكن الحين وش وراك لاشغل ولا مشغلة ماغير تتسدحين وتتبطحين.. <== يحسدون الفقير على اللقمة
المهم قلت ابد ابشري وشسمه اني هذا بسوي لكم حلا..
وبعدين جلست افنكر وراودتني نفسي اني اسحب عليها .. بعدين قلت لا خن اثبت لها اني سنعة عشان معد تنفش ريشها علي ..
واروح ادوج النت كله ادور حلى شكله حلو ويواجه .. وعجزت القى شي يعجبني .. خنقتني العبرة وبغيت اكسر اللاب توب ..
وجت قدامي صورتها وهي تتريق علي عند البنات وتقول اني من جنبها واني ما انفع ولا بريال..
ومير اروح ادوج مرة ثانية وابحث..
ويوم يأست وانا اللي اطيح على حلى خرافي .. مرة اعجبني .. قلت بس.. لقد وجدت ضالتي ..
فهيا بنا اعلمكم وش سويت .. اول شي البسي عباتك وروحي للسوبر ماركت عشان تجيبين المقاضي وهي كالآتي :
كرتون كيك اليمامة
مغلف دريم ويب
مغلف كريم كارامل
علبة قشطه
3 تويكس ابو اصبعين
علبه جبن كيري
علبه نستله كبير
علبه بسكويت شاي
بسكويت اوريو بالشوكولاته الغامقه
ثم اذا شريتي المقاضي وجيتي تعالي اعلمك الطريقة ..
جيبي الصينية اللي تنفتح من تحت .. وراعي انها تكون مربعة ..
جيبي لك بزر يفتح لك قراطيس كيك اليمامه ..<== الله من الزوالة حتى القرطاسة عجزة تفكها
طبعا انا سويت الحلى تالي الليول والعالم خامدة..مافيه احد بالمطبخ الا انا بلحالي..
فرحت وجبت اختي الصغنونة ام 13سنه.. عشان تجسرني وبالمرة اكرفها ..
فتقومين تفصلين طبقات كيك اليمامة عن بعض وتصفينهم في الصينية ..
بعدين تجيبين مغلف الدريم ويب والكريم كراميل والقشطة والتويكس ..
وتحوسينهم بالخلاط ..
و تصبينهم على كيك اليمامة ..
ثم تجيبين بسكوت أولكر .. وتغمسينه بحليب سايل وتصفينه على الطبقة اللي صبيتيها
همن تجيبين جبن كيري ونستلة .. وتحطينه بالخلاط وتخلطينه الين يذن ..
وتصبينه على البسكويت
بعدين تجيبين شوي بسكويت اولكر وتطحنينه .. وتجيبين الاوريو بعد وتطحنين ابوه ...
بعدها تقسمين الصينية ل4 اقسام وترشين عليه جهة بسكويت اولكر وجهة اوريو بشكل مرتب
بعدين تجيبين الباقي من كيك اليمامة وتفصلينهم عن بعضون وتأصصينون كل قسم لثلاث شرائح
وترسمين بهم على الصينية مثل عيدان الاكس او .. وتجيبين بسكويت اوريو وتفصلينه عن بعض وتحطينه عساس انه أو .. وتاخذين عودين من كيك اليمامة على اساس انه اكس ..
وبعدين غلفيها ودخليها الثلاجة لحد ماتبرد ..
واذا بردت فكي الصينية عن الحواجز وقدميها مع القهوة ولا مع الكابتشينو ..
انا حبيت اقدمها مع الكابتشينو .. طالعوا الصورة لله دركم ..
>>>>لعبت عليكم ما في صوره شلون اصورما عندي كيمرا و جوالي ما في كيمرا>>>تعيشو و تاكلو غيرها
ونسيت اقوولك انهم سطلوا علييه .. وذاك اليوم ص رت حديث المجلس ..
هاه يمديكم على حلاي البطران..
تبطون عظم تسوون زيه..
دمتم وش حليلكم ..