الدايت اللي نحفني ولله الحمد

1. رح احكيلكم حكايتي من البدايه للنهايه جيبو مخدات عشان حتنامو من طولها


2. نجي للبرنامج


3. خلال اليوم يمكن تناول :


4. من الاشياء اللي تساعد على الحرق :

مرحبا ياقمورات

رح احكيلكم حكايتي من البدايه للنهايه جيبو مخدات عشان حتنامو من طولها

طبعا انا في يوم من الايام كنت بطبوطه (قصدي برميل ) زي كدا وطفشانه من نفسي مره وابغا انحف بأي طريقه
رحت لدكتوره في المركز السعودي الصيني ( مركز د.رياض الهجن) وجربت الابر الصينيه حقتهم طبعا ماشفت منها اي نتيجه يمكن بس عامل نفسي مو اكتر تركت الابر الصينيه واستمريت بس على البرنامج اللي اعطتني هوا الدكتوره يعني اسبوع كنت انزل شويه واسبوع لا وطفشت وتعبت من البرنامج ولخبطت وتركتو هوا كمان
في مره من المراريت كنت جالسه ع ابربر مع صحبتي في الماسنجر وقاعدين نتكلم عن الدايت والوزن ودي الأمور الا قالتلي انا اليوم رحت لدكتوره واعطتني دايت وحبدأ فيه من السبت قلتلها هاتي اشوف يمكن يعجبني طالعت في الدايت بنص عين وعجبني وماعجبني المهم قلت يابت جربيه ماحتخسري شئ وقلت لصحبتي خلاص السبت معاكي بأذن الله
بديت في الدايت معاها لفتره انا ماعرف بالزبط كم لاني وقتها لاكنت احسب ايام ولا كنت اقيس وزن ابدا لكن الفتره ماكانت طويله ابدا ولقيت نفسي الحمد لله بنزل مره كتير ماشاء الله (صلو ع النبي ) وانبسطت واتحمست اكتر واستمريت ونزل وزني بشكل كبير والله يابنات لدرجة كتير ناس شافوني والله ماعرفوني الين انا عرفتهم بنفسي وماصدقو بعدها رحت لنفس الدكتوره اللي هيا (دكتوره لمياء كردي في مستشفى جده الوطني الجديد ) الله يسعدها يارب تابعت معايا وكانت تغيرلي البرنامج احيانا لكن نرجعلو تاني لأنو هوا اللي كان ينزلني ماشاء الله (( طبعا حتسألو وصحبتك ايش سار معاها حقولكم الى اليوم تقول حمشي عليه وماتمشي ههه ولسا تولول وتقول ابغا انحف ))
بالنسبه للرياضه والله والله اني ماكنت اعمل رياضه ابدا في الاول بعدين قلت ادخل نادي واستشرت الدكتوره قالتلي انصحك لاتدخلي نادي حاليا الا بعد فتره من نزول الوزن لكن طلبت مني بس المشي يوميا لمدة نص ساعه وسرت امشيها مع بعض الرياضات الخفيفه كنت اخدها من كتب جورج كروز تلاقوها في جرير الكتب حسب اجزاء الجسم كل وحده تختار اللي يناسب جسمها ورياضة شد البطن مره مهمه
حكتبلكم البرنامج بشرط كل وحده تاخدو او حتى بس تشوفو تدعيلي دعوه من القلب وصدقوني رح تنبسطو مره عليه اهم شئ الاراده والصبر
وعلى فكره في اهم خبر واحلاهم انو يوم في الاسبوع مفتوح مفتوح يعني مفتوح ع الاخر كنت اكل فيه بيتززا ،، سينابون ،، شوكلت ،،.... الخ الخ (شكلو عيونكم هنا سارت زي كدا ) ونصيحة مجرب لما تحسو انكم مره تبغو تاكلو خلو اليوم دا هوا المفتوح المهم مو اكتر من يوم في الاسبوع

نجي للبرنامج

خلال اليوم يمكن تناول :

• * 3 أكواب لبن أو حليب أو زبادي قليل الدسم .
• * 4أكواب عصير خالي السكر ( ممكن استخدام سكر الدايت تروبيكانا ) .
• * شوربة بأي كمية والتوابل والبهارات والملح والخل والليمون والبصل والتوم مسموحه .
• * سلطة ( ممكن تبوله أو فتوش تقدري تستخدمي البرغل بكمية اقل وفي الفتوش العيش اسمر ومحمص ) .
• * 3 حبات شابورة .
• * دجاج مشوي أو مسلوق أو مع الشوربه ( مرتين في الأسبوع أو تلاته )
• * جبنه شرائح ( شريحة واحده مرتين في الأسبوع أو تلاته مرات بشرط أن تكون في الأيام اللي ماتاكلي فيها الدجاج ..يوم دجاج ويوم جبنه وهكذا ) .
• * لو حسيتي برغبة مرره قويه في الحلى تاكلي تلات حبات تمر بس مو اكتر من مرتين في الاسبوع.

طبعا مهم جدا شرب المويه 8 اكواب تقريبا وبلاش تقيسو وزنكم كل يوم عشان مايجيكم احباط ويفضل تقللو الملح في الاكل لأنو يحبس السوائل في الجسم

من الاشياء اللي تساعد على الحرق :

• الفواكه : الكيوي .. الأناناس .. الجريب فروت
• العصيرات : الكيوي .. الأناناس .. الجريب فروت
• زيت الزيتون ( يمكن إضافته للسلطات )
• خل التفاح ( يمكن إضافته للسلطات )
• الشاهي الأخضر
• شاهي الزنجبيل

اتمنى تستفيدو من الموضوع يارب ومايهمني الردود لكن يهمني تدعولي ولو تحبو تنقلو الموضوع لأي مكان في العالم (< مصدقه نفسها ) حلال عليكم ومسموح واي سؤال واستفسار انا في الخدمه