الروبيان

اهلين حبيبتي
انا مو عارفه اي طريقه تبغي
بس بقولك على كم طريقه كل وحده احلى من التانيه
روبيان مقلي( بانيه ) وربي طعمو زي روبيان المطام واحلى..
المقادير..
روبيان منظف الظهر ومشقوق من الظهر عشان تنفتح الروبيانه يعني سوي على طول الظهر خط بالسكين عشان تصير مفروشه الروبيانه ومتروك الذيل بس
ثوم مهروس
عصير ليمون
شويه خل ابيض
شويه صويا صوص الخفيفه
شويه من صويا صوص الحلوه ( الثقيله ) كميه بسيطه مره
فلفل اسود _ كمون _ ملح
للتغليف (دقيق_بيض _ بقسماط)
الطريقه..
اخلطي كل المقادير مع بعض وحطي الروبيان عليهم وخليه
3 ساعات اقل شي في الثلاجه
بعدين غمسيه في الدقيق وانتي ماسكتو من الذيل وبعدين في البيض وبعدين البقسماط
ولما تغمسيه في الاشياء افرديه بيدك مكان ماشقيتي عشان تصير زي الفراشه مو المنتدى لا اقصد الشكل ههه
وبعدين اقليه في زيت غزير وقدميه مع البطاطس المقليه وصوص الثوم.
الطريقه التانيه..
روبيان بالكزبره والثوم..
المقادير..
روبيان مقشر ومنظف من الظهر ومعصور عليه ليمون وشويه خل
بصل مفروم ناعم
ثوم مهروس
كزبره مفرومه
مكعب ماجي
فلفل اسود _ كمون _ بهارات كاري _ ملح صيني ( اجينو موتو ) _ ملح اذا حسيتي انو محتاجو
الطريقه..
حمري البصل في الزيت على النار ولما يشقر حطي عليه الروبيان( بعد ماتغسليه من الليمون والخل )
والثوم والكزبره والماجي وحركيه ولما تحطي هذي الاشياء تكوني موطيه النار وحطي باقي المقادير وخليه على نار هاديه وغطي القدر الين يستوي الروبيان
وقدميه مع الرز الابيض او الخبز وبالعافيه
وتقدري كمان تسويه كبسه روبيان
او تسوي الروبيان مع حشوة بصل وبهارات وتحطيه على رز ابيض مفلفل مسويتو يطلع روعه
وممكن تشوحيه مع بصل جوانح وفلفل رومي مقطع بالطول والبهارات اللي تحبيها وصويا صوص الثقيله بس لاتكثري منها لانو طعمها حلو واذا تحبي تضيفي عليها ملعقة كتشب حسب اختيارك
ولما يستوي الروبيان احشيه في ساندويشات او قدميه جنب رز ابيض
وكمان تقدري تبهري الروبيان بعد ماتنظفيه وتقشريه وترصيه في اعواد الخشب عشان تشويه على الصاج او الفحم زي ماتحبي وبالبهارات اللي تعجبك والنكهه اللي تحبيها
وفي اكلات كثيره للروبيان بس هذا اللي افتكرو دحين
اذا افتكرت شي كمان حرجع اكتبلك هوه
وبالعافيه على قلوبكم ان شاءالله

نفس طريقة الاخت دريم الاولي هيه طريقتي ومره جونان ماقصرت الاخت
وبالعافيه

مشكوره حبيبتي الله يعطيك العافيه من جد حمستيني اقوم اسويه دحين

صحه وعافيه