العيد قرب خلونا نلحق إحنا قدها

السلام عليكم و رحمة الله و بركاته
صبآآح /مسآآآء الخير ..
الموضوع باين من عنوانه ،، أنا بداية رمضان أتحمست و حاولت أخفف من أكلي حتى أحس إنو معدتي سارت أصغر و ما سرت آكل زي أول
بس سار لي كم يوم رجعت أخبص و زي ما يقولو رجعت حليمه لعادتها القديمه !
أنا اليوم جايه متحمسه إن شاء الله و أبغى ألاقي إللي يتحمسو معايا
ما أبغى ألزمكم بمدة طويله،، كل إللي أبغاه نلتزم ألين آخر يوم في رمضان بس، يعني أقل من أسبوعين 12 يوم تقريباً
أتمنى لو أنزل شويا بحيث أنو الملابس إللي أشتريتها يسير شكلها أحلى عليا
لأنو ما في وقت عشان أوصل للوزن المثالي في العيد لكن أقدر أوصل لجزء من إللي أبغاه
أنا ما رح أحدد وزن معين و لا رح أحدد شي لقروبنا
كل إللي أبغاه أنو أي وحده تبغى تنحف و راح عليها الإشتراك في قروبات ثانيه
تجي هنا
عشان نتحمس سوا و نحاول نلحق إن شاء الله
م و عندي فكره كمان
ممكن نتواصل كمان عن طريق الماسنجر و نعمل لنا قروب
و نشد على بعض يعني كل ما لقينا تساهل من وحده شدينا عليها
أبغى نحفز بعض ،، أبغى الوحده فينا تشوف الثانيه بينزل وزنها و تتحمس أنو هيا كمان تنزل !
ما في أحد أقل من أحد
نظامنا ..
1- فطورنا نفسه لكن نقلل من الكميه إللي بناكلها كل يوم
2- و سحورنا شي خفيف .. توست أسمر ، سلطات يعني أشياء خفيفه
مع المشي يومياً
3- أنا حبدأ أشرب (شاهي أخضر + كمون حب + ميرميه + ليمون + نعناع أخضر)
تساعد على التهضيم مجربه
وأي وحده عندها وصفه سمعت فيها أو جربتها تقولنا عليها مشكوره
4- غازيات ممنوع و أي علبة تشربيها تمشي بدالها ساعه كامله
و نفس الشي بالنسبه للشوكولاته و الحلويات
إللي حابه تشترك في القروب تقولي وزنها و الوزن إللي تبغى توصل له
و في نص المده رح نتجتمع و نشوف كل وحده كم نقص وزنها و اللي ما نقصت في النص الأول من المده تحاول تشد حيلها أكثر في النص الثاني قبل العيد
و الإشتراك مفتوح إلى يوم 20 رمضان
عدد المشتركات لا يزيد عن 10 فقط
شعارنا رح يكون (إحنا قدها) و قد إننا نوصل للوزن إللي اليوم كل وحده فينا رح تحدده قبل العيد إن شاء الله
أبغى أشوف حمآآآآآآآآآآآآآس من اليوم
خلونا نفرح ،، خلو الناس يتفاجئو فينا في العيد !!
و إذا شفت قروبنا قدر أنو يوصل لهدفه إن شاء الله رح نكمل ألين نوصل للوزن المثالي
تحياتي للجميع ..
و الله يتقبل مننا طاعاتنا و لا يرنا خائبين