تزاحمنا امانينآ وتضحكنا وتبكينا فهذا شهرنآ ولى بأشواق المصلينآ 23 9

عفتهآ دنيآي

28-10-2022 - 08:45 pm

مرحبا بأهل المطبخ كلهم
اول موضوع لي هنا
وان شاء الله يارب يجوز لكم
اول شئ بسوي جوله بسيطه ب 6 طبخات حول العالم
اول جولة لنا في الهند
بنتعلم فيها الدجاج والرز على الطريقة الهندية
اول شئ حابه اتكلم عن البهارات الهندية اللي استخدمتها
سهله ومتوفره في كل بيت وممكن اي احد منا يسويها
طريقة اعداد البهارات الهندي للأمانه اخذتها من مدونة وحده هندية
http://sinfullyspicy.com/ المقادير
كل البهارات تكون كاملة ومقدارها نص ملعقه كبيره
كمون - فلفل احمر جاف وكامل - كزبرة - فلفل اسود - كركم - جوزة الطيب
انا اضفت برضو عود دارسين من عندي
شفتو المقادير الأربعه الأول تكون محمصه على النار .. الين يتغير لونها
بعدين اضيفوها على جوز الطيب والكركم وفي الخلاط الين يكون عندكم خليط مثل هالشكل
انتهينا الآن من البهارات
نجي للأطباق
اول شئ راح اشرح لكم طريقة
Bhuna Murgh
المقادير دجاجه مقطعه لاربع قطع (صدرين ورجلين)
ندهنها بزيت ونتبلها بالبهارات السابقه
ونتركها في الثلاجة لمده 3 إلى 5 ساعات
في هالفترة نشوح ثوم وبصل وزيت على النار إلين يتغير لونهم للأصفر
ونضيف عليهم ورق الغار ونطفي النار عليه
نرجع الآن للدجاج نشوحه على الصاج او على الة الشوي ثلاث ارباع طبخ
انتهينا والدجاج لسى ماستوى باقي ربع .. هنا بنشوحه مع البصل وثوم .. الخ اللي سويناهم قبل إلين يستوون ونضيف عليهم اللبن والملح وبكذا خلصنا من الدجاج
الطبق الثاني كان عبارة عن الرز الهندي
طريقته سهله وبرضو ماتأخذ وقت
المقادير
كوبين رز - لوز كامل مو مطحون - ثوم وبصل مفروم - زيت - بهاراتنا السابقه
وليمون اسود - زبيب كل المقادير السابقه على حسب الرغبة في ناس تحب تكثر منها وناس تحب تقلل
نجي للطريقة
نحمس البصل والزيت والثوم على النار بعدين نضيف اللوز والزبيب والليمون والبهارات
نتركها دقيقتين على النار بعد كذا نضيف الرز ونحمسه معهم مو كثير عشان مايتكسر
نضيف شوي من المرقه تبعت الدجاج اللي سويتها في الطبق اللي قبل عشان تطعم فيه + ماجي مذوب في مويه + مويه حاره
وخليه الين يرتفع الرز فوق ونطفي النار
ليش ؟ عشان في هالفترة يمتص الرز من المرقه وعلى هداوة
نتركها تقريبا ربع إللى نص ساعه ومن ثم نشب النار عليه والين يستوي مع مراعات تكون النار واطيه نتركها ثلث ساعة
وبكذا انتهينا
يقدم مع الصوص الهندي والخبز وبالهناء والعافية

التعليقات (8)

عفتهآ دنيآي

28-10-2022 - 11:27 pm

الجولة الثانية بتكون في ايطاليا
الفطيرة الايطالية
المقادير
ثلاثه ونص اكواب دقيق
كوب وثلث مويه
ثلاث ملاعق زيت نباتي
ملعقة كبيره خميره
ملعقة صغيرة ملح
ملعقتين كبار سكر
ملعقة كبيره حليب بورده
نضيف المقادير الجافه اولا بعدين السائلة ونعجن الين يتكون لنا عجينة لينه
بعد كذا نحطها في مكان دافئ ومغطى بفوطه مبلله بالمويه
تقريبا ساعه , مع ملاحظة تقسيم العجينه الى 3 اقسام عشان اسهل بالفرد
بعد كذا في خلال هالوقت نسوي الحشوة وهي سر النكهه المميز
وهي
دجاج مقطع مكعبات صغار - فلفل اخضر واحمر مقطع مكعبات صغار اضافة الى الفطر
- بصل وثوم مفروم - زيت - فلفل اسود - فلفل احمر بودره - بقدونس
- جبن موزريلا- وبرميزان انا مااضفته بس اكيد بيكون له طعم مميز - جبن سايل - ملح
الآن على النار بصل وثوم مشوح على النار مع الزيت الين يذبلون بعد كذا الدجاج والبهارات والملح
الين يستوي الدجاج نضيف الجبن السايل تقريبا ملعقة كبيرة وبعد كذا البقدونس وباقي الخضار
دقيقه بس على النار عشان ماتلين الخضار
الآن نجي للعجينة بعد ماتخمرت نفردها ونسوي فيها مثل ماانتم شايفين
يعني نضيف الحشوة ونضيف الجبن المتوفر عليها
بعد كذا نقطع العجينه زي ماانتم شايفين في اخر طرف العجينة ونسكرها
في الصورة اللي فوق
سكرنها ونخليها تتخمر تقريبا ربع ساعة وبعد كذا نضيف فوقها
بيض وحليب سايل ونسكافيه مذوبه بمويه حاره ونمسح على العجينة بالفرشه
وندخلها الفرن على درجة حرارة 350 إلى400 تقريبا ربع ساعة وتستوي وتتشقر من تحت ومن فوق نشب عليها 5 دقايق كافيه

عفتهآ دنيآي

29-10-2022 - 12:28 am

الآن نجي للطبق الثاني وهو الباستا الطازجة
تعد من افضل انواع المكرونات
لانها بكل بساطه تمتص الصوص ولينه وبرضو ممكن تبدعون فيها وتسوون فيها اللي تبغون
تغيرون لونها ، تعطونها نكهه، تحشونها ، تشكلونها باشكال مختلفه، تسخفونها .. تعرضونها وانتم وابداعكم
لذلك حبيت يكون اول موضوع اطرحه في هالمدونة والمزود بالصورة
يالله للمقادير
مع ملاحظه استخدام الاكواب المعيارية عشان نضمن الدقه
كوبين طحين- ملعقه صغيرة ملح -4 بيضات كامله -ملعقه صغيرة زيت زيتون
هالكميه تقريبا تكفي ل 4 أشخاص
وممكن نقسمها نوعين مختلفين وبنجي لهاالشئ
الطريقة
طحين + ملح + زيت هالاشياء بس حركوهم بملعقه عشان يتجانسون
بعدين سوو زي ماسويت بالصورة اللي تحت
واضيفو كل شوي بيضه وحده بالوسط وابدو خذي شوي من الدقيق اللي على الأطراف واخلطوها مع البيض
سوو هالعملية إلين العجينه متماسكه انا تقريبا اكتفيت ب 3 حبات بيض
بعدين ابدو اعجنوها إلين تصير عندكم عجينه متماسكه
وكل ماكثرتو العجن كل ماكان افضل
ملاحظه لاتضيفون الدقيق وقت العجن حتى لو مو متماسكه ؟
لانه بإضافتكم لدقيق تصعبون عليكم عملية العجن اكثر مما انك تسهلونها خلاص بما انكم مستخدمين الاكواب المعيارية ان شاء لله ماراح تحتاجون اضافة لدقيق زيادة
الطريقه اللي فوق احد طرق العجن واللي غالبا يستخدمها الطباخين قبل ومازال البعض يعتبر انها الأفضل
الآن في طرق اخر وهي بإستخدام العجانه وبنفس الطريقة
بعد كذا نغلف العجينة بالنايلون تقريبا ساعة كاملة عشان تتخمر
الآن .. أنواع الباستا
راح استخدم هنا نوعين منها
1-
الباستا المحشية
ممكن تحشونها
زي ماسويت ( بطاطس مسلوق وبقدونس وبصل اخضر ونعناع مجفف وفلفل اسود وملح واريقانو )
وممكن تحشونها باللحم المفروم او الدجاج المفروم بالخضار اوالسبانخ .. الخ
2-
الباستا الطوال
الآن نجي للعجينة بعد ماتخمرت
اول شئ نجهز العده من الآله اللي شايفين شكلها تحت
والحشوه والدقيق لأننا راح نحتاج له والعجينة مع تقسيمه لاكثر من كورة اسهل علينا في الفرد
كيف راح نستخدم الآله
عندنا عدت درجات من 1- 9 .. الرقم الاصغر هو الاكبر حجم
وكل ماكبرنا الرقم كل ماضاقت المساحه .. احنا في البدايه بنخليه على رقم 1 ونبدأ نفرد العجينة
كذا مره لين تلين عندنا مع ملاحظه عدم تغيير الدرجة ..
تقريبا 4 مرات
بعدين نبدا نغير الدرجة على حسب مانبغى .. اذا مثلا زي ماراح اسوي عجينة محشيه الافضل رقم 9
فأتدرج من رقم 1 إلى 9
وهكذا وفي كل مره ارش شوي دقيق اذا محتاجه
نبدا الآن نقطع العجينه دوائر ونحشيها ونلفها مثل الشكل اللي في الصوره
وهذا الكمية بعد مانتهيت منها مع ملاحظه رشو دقيق بين العجين عشان مايصلق
الطريقة الثانية اللي سويتها
استخدمت القسم الثاني من الاله وقطعتها شرايح طوال
وكل ماتنتهي من كمية غطيها عشان ماتيبس ويروح تعبك واضيفي دقيق عشان ماتتماسك
ممكن اذا خلصتي من كمية حطيها بالثلاجة
انتهينا الآن من طريقة الفرد طيب كيف اسلق الباستا ؟
بكل بساطه الوقت اللي تستغرقونه لسلق المكرونة اليابسه اقسموه على 2 ..
وهذي المده اللي راح نحتاجها
للسلق عادي اضيفو شوي زيت وملح وموية
وبعد كذا الباستا .. مع مراعات ترك مسافة بين كل باستا محشيه عشان متلتصق عندك
نجي الآن للصوص وماادراك مالصوص
استخدمت انا للباستا المحشية
هالصوص
( ثلاث ملاعق دقيق وملعقه حليب بودره وكوب ونصف مويه ورشه فلفل اسود ) يعني تقريبا هو صوص
الباشميل
اما بالباستا الطوال استخدمت
( ملعقتين كبار معجون طماطم تبع البيتزا ونص علبه قشطة وفطر وطماطم وفلفل مقطعات شرائح مع
البهارات الإيطالية والملح وشوي بقدونس )
الآن إنتهينا تقريبا ..بس عليكم اخذ المكرونة بعد ماتستوي ومع الصوص وشوي على النار
بعدين اضيفو موزريلا وجبن برميزان
وجملوها بالبقدونس

عفتهآ دنيآي

29-10-2022 - 01:29 am

نجي الآن للجولة الأخيرة وبتكون في المكسيك
بتكلم عن التورتيلا مو التورتيلا الاسبانية لا بتكلم عن التورتيلا المكسيكية
الترتيلا هو عباره عن خبز مقطع بشكل دائري ومخبوز وبعد كذا ينحشى
ماادري لاحظت اني دائم اشوف الناس تستخدمه لساندوتش دجاج , لحم , خضار
لاكن الحقيقة انه له استخدام كحلوى لاكن لكل شئ عجينة مختلفه
طريقة التورتيلا
اول شئ المقادير
بعطيكم مقدار ممكن يسوي لكم 8 حبات تقريبا وممكن اكثر من الخبز
كوب دقيق - ملعقتين كبار حليب مجفف - ملعقة ملح - وثلاثة ارباع كوب مويه
نخلط المقادير المجففه بعدين المويه إلى ان يتكون عجينة متماسكه
ملاحظات
ممكن نحتاج نزيد الدقيق لو مو متماسكه
اذا حابين تعطون للخبز نكهه او لون
ممكن تضيفون للمقادير الجافه
زعتر بري - فلفل اسود - فلفل احمر بودره - بقدونس- والقائمه لاتنتهي
وانتم قيسوا على اللي كتبته واضيفوه
بعد ماتتخمر تقريبا نص ساعه كافية
نفردها ارهف شئ ليش؟
عشان تنتفخ لما نحطها على النار اضافت إلى ماتكون جبره لما ناكلها كساندوتش
بعد الفرد نجهز صاج او مقلاه وتكون مدهونه بشوي زيت
وعلى نار وسط بعد مايحتر الصاج مره يعني بعد تقريبا ربع نخليه على نار واطيه
نضيف القطعه اللي فردناها وقصيناها على شكل دائري
وافضل شئ جربته عشان اخليها بشكل دائري احط غطاء قدر على العجينه وبعدين اقط بالقطاعه
نشيك على الجهه اللي حطيناها على النار ونشوف تغير لونها للاشقر ولا
متى ماتغير قلبناها على الجهه الثانية
ونفس الشئ
بعد ماننتهي منها
نحطها في حافظه ورجاء لااحط يحطها في كيس
لانه حاره والكيس بلاستك وكل الامراض اللي يسببها الحرارة مع البلاستك تكون في الخبز
نسوي إلى ان نخلص من العجينه
بعد كذا نجي للحشوة انا حشيتها
بدجاج متبل ب صوص الصويا والزبادي والبهارات والليمون
وخليتها تتخمر في الثلاجه وتمتص التتبيله
بعد كذا حطيت البصل والثوم على النارمع صوص الصويا وبعد كذا
الدجاج والملح وبس الين زانت
الآن إلى الصور
زي ماانتم شايفين دهنت الخبزه ب المايونيز واضفت الدجاج والبطاطس الفلفل والطماطم والمخلل
الصورتين الأخيرات بعد مالفيتها وبعد كذا على الاله الين تتشقر وبااهناء والعافية
جربوها ولايفوتكم الطعم
ملاحظة :- اذا متعيجزين في خبز تورتيلا جاهز بس انا عني مايقارن باللي ينطبخ

عفتهآ دنيآي

29-10-2022 - 02:30 am

وبكذا آنتهينا من آطباق حول العآلم
آن شاء الله تعجبكم ، و تستفيدون منهآ
دعوآتكم لي بالخيرر

القلب السموووح

29-10-2022 - 04:32 am

سلمت يدااك

توفي المنتوفي

29-10-2022 - 05:33 am

يعطيك العآفية ../~

آرتقآإء

29-10-2022 - 06:34 am

ماشاءالله تبارك الرحمن الله لايضرك
وصفات شهيه
يعطيك العافيه شغل مرتب ونظييف

دكتورة المشاعرH.A

29-10-2022 - 07:35 am

ماشاء الله تبارك الله
الله يجزاكي خيرر
،، ريحتيني كنت أدور على طريقة التورتيلا ولقيت في موضوعك ،،

رمضان بالحب تودعك القلوب ودآعا يآ حبيبي مشاركة بألذ سفرة رمضانيه←
القلوب المحشيه→