تسكنين في شقه تعالي

السلام عليكم ورحمه الله وبركاته..
جبت لكم موضوع ابي نتناقش فيه,
اغلب البنات يسكنون في شقه اما اجار او ملك والبعض يواجه مشكله في نضام الشقه (طبعا اللي شقتها كبيره بتكون مرتاحه اكثر )...
اللي ابي اقوله ان كل وحده تقول كم الغرف عندها وكيف مرتبتها حتى نفيد ونستفيد من بعض اتمنى تكونو فهمتو
وراح ابدا انا:
شقتي انا فيها مجلس للرجال حليو مو كبير مره خليته كنب ورسمي..
وفيها مقلط خليته جلسه ارضيه وفي الزاويه طاوله الكمبيوتر..
وصاله هي مكان جلستنا فيها كنب اللي يكون زاويه وخليته زاويه وحده والمكتبه في الزاويه اللي بجنبها
والجزء الباقي صاير ممر يعني الصاله قدنا..
المطبخ صغير ومتضايقه منه يعني لو اشتري صحون او اي غرض اتوهق وين احطه لان الدواليب صايره جدار واحد بس والجدار اصلا صغير فحطيت زياده دولاب يكون مستودع شكله بايخ بس حكم الاوي ع الضعيف..
غرفه نومي انا وعيالي عندي بنت 5سنوات وولد 2ونص فيها اسرتهم ودولابهم واحس انها صايره زحمه لو ارتبها وانظفها احسها حوسه..
وغرفه ثانيه فيها دولاب كبير للملابس الشتويه وملابسي الفخمه والمفارش ويعني تخزين وفيها انشر الملابس وفيها الكوايه وفيها العاب الصغار ..
وعندي 2دورات مياه وانتو بكرامه وحده في قسم الرجال وصغير مره والثانيه عند الغرف كبير شوي وحاطه
فيه غساله الملابس..
حاليا الغرفه الثانيه فصلت فيها غرفت نوم للصغار والدولاب الكبير حطيته في غرفتي ادري بيشوه الغرفه بس طلعت اوسع لاني شلت كل شي يخصهم( وفي غرفتهم )
اذا جاني ضيوف الرجال في مجلسهم والحريم في المقلط واذا صار وقت العشاء يطلعون الحريم ويتزاحمون في الصاله والصغار يكونو في غرفه الالعاب.
يالله عاد ابي اشوف مشاركاتكم واقتراحاتكم انا في الانتظار...