تعالو شوفو وش صار معي

1. اخوي ماانتبه لها يمكن لو ماكنت معه كان اعطاها وجه ...

قبل لااقولكن سالفتي
بعطيكن نبذة عن الحاله اللي عندي....
احم احم...
انا انسانه موتي ولااني اشوف وحده تناظر لمحارمي >>>قصدي اخوي ابوي والحين زوجي
اخوي ماشاء الله وسيم هو يشبه قصي خوري بالحيل فيه منه دايم يقولون عنه السوري ههه
مره قبل زواجي كان موديني للمكتبه اشري كتب والا ذيك المعصقله جت تمايل وتناظر بأخوي وانا زاهلتني على جنب ولا كأني موجوده وصارت تقربلنا وصارت تحدنا والله لو حنا بشارع واللي فيها سيارات لعنبو ابليس العدو

اخوي ماانتبه لها يمكن لو ماكنت معه كان اعطاها وجه ...

طبعا هو اصلن يستانس لاشاف البنات يناظرن فيه يزيد من غرورة هالشي اصلن اغلب الخليجيين الا العرب كلهم كذا ولاتزوج نظرات زوجته وغزله فيه مايجيب خير مايعجبهم الا هالخشش اللي عيون الوحده منهن تقل عيون حصني>>اللي ماتعرف الحصني هو كائن نذل يشبه الثعلب يعيش بالصحراء ياكل الحيوانات بغته
المهم انا خليتها لحد ماتقرب بالحيل علشان ماحد يسمع حسي
(الظاهر كانت تحسبني زوجته وقالت خلوني اقهرها) وقربت ذيك الصخله>>>>صخله ولاحصني كله واحد اهم شي انها ماعجبتني هي وعيونها
قلت هيه خير وشعندتس لاابوتس لاابو.....والباقي مشفر
طبعا البنت انحاشت مدري وين
واخوي جرني من يدي وركبني السيارة وقضاها مسبات وعصب علي لحد ماوصلنا البيت....
طبعا مين اللي اكلها بالأخير مين
هاه مين جاوبوني
محسوبتكم انا
شاطرات لكل وحده منكم ريال(بس ريال قديم متعرفط عليه صورة الملك فهد الله يرحمه مااعطيكن من الجديد الخضر)
هذا واحد من المواقف مع اخوي
حتى ابوي هالشيبه مايسلم منهن.. .الظاهر حتى الشيبان يتسلن فيهم يمكن يحصلن شي من وراهم منا ولا منا
ابوي الله يخليه ويطول بعمره طول وقته بالبر مايطلع الأسواق مايجيها والمنتزهات لاجاها يكونون اهلي كلهم معاه
طبعا لازم النظرات هذي من الفئة ذيك من البنات مدري هو فضول ولاايش اول مره يشوفون رجال والا فيهم نقص ويدورن واحد يردلهن النظرات وتزيد الثقه فيهم والا بس يبون يشوفون كيف وضعه مع زوجته
المهم ياطويلات العمر مالكن بالطويله
بعد زواجي
صار كذا موقف انقهرت فيه شبت فيني نار الغيره ونار ياحبيبي نار...
من كم يوم طالعه مع زوجي لمنتزة عائلي قريب تعشينا هناك ومشينا وجلسنا ندور بالسيارة بدري للرجعه لم البيت
قلتله مشتهيه عصير شقف ذاك اللي فيه فواكه مقطعه يازينه زيناه يم يمي لذيذ ((تقل اني اشتهيته الحين))
ورحنا لمحل يسوي عصائر طازجه
وقفنا السيارة جا يبي ينزل والا السيارة صارت تدرج لورا رجع يركب ويعشق السيارة علشان توقف والا مافيش فايده كل مابغا ينزل الا السيارة تدرج لورا
والا ذيك المعصقله الثانيه تشبه المعصقله الأولى بسالفتي مع اخوي طالعه من محل الحلويات بجنب المحل اللي نبيه ومو شافت وضعنا صار ت تناظر وتضحك ذيك الضحك بدلع
الا ياضاحكتن مع سرتس
قالي ماعليش بطفي السيارة والمكيف بيطفي قلت عادي وانا عيوني عليها وهو شافني وشافها ويخبرني مجنونه طفى السيارة ونزل من السيارة وقال خير وش تناظرين له (يقصدها طبعا)
ههه
برد وجهها كركركركركركر
لو عندها فرن كان ولعته ودخلت راسها فيه
انقهرت
هههآآآآآي
بس وين هالنوعيه لاانقهرو لازم يبردون قلوبهن
دخل زوجي المحل والا تطلع ذيك الشله تبعها من المحل واصواتهم عاليه كلن سمعهم... وين السواق.... وحده تدق عليه... هيه انتي دقي....
وانا قاطه اذن عندهم...
وهذيك اللي كانت تناظرنا قالت ابي عصير
بنت اللذينا تبي تلحق زوجي داخل
قلت استني يابنت شوفي وش بتسوي
وصارت قضيه علشان هالعصير
والمحل رجال طالعين داخلين منه وهو صغير خلقه
وقفن كلهن بيرا المحل يقالهن ذابحهن الحيا لوتستحن ماضيقتن عباياتكن وطلعتن سيقانكن.. وهي حاطه ايدها على خصرها
وكل شوي تلتفت ورا وتناظر فيني
من زين هالخصر عليتس يالمكنسه
وقعدو ينتاقشون مين تدخل تجيب عصير وهي تتشرط تبي المنيو
وكانت معاهم بنت صغيرونه صارن يدفنها ودخلنها داخل المحل وترجع عليهن ماهي عارفه وين المنيو
وزوجي تأخر اشوفه داخل (ابواب المحل زجاج) المحل عليه زحمه يستنى الطلب...
تخيلو وش صار ارسلن البنت على زوجي يطلبن منه العصير اه يالصايعات يالمايعات
تدرون وش سويت فتحت باب السيارة وبنزل ومتردده
اه لو معي خيزرانه امحطهن وحده وحده يرجعن لبيوتهن وجلودهن محمره
زوجي قعد يناظر للبنت وهو قالي بعدين انها قالتله يبن عصير وهو اصلا سمعهن يقلن دوري المنيو وجيبيها ....اشرلها على المنيو واخذتها ورجعت لهن
وطلبنا خلص ورجع زوجي وانا بابي لسه مفتوح قالي سكريه سكريه وش فيك
قلت قهرني
وهي تناظرنا
ومشينا وغبرنا عليها.........>>>اتمنى بس كان رصيف ماهو تراب
طبعا من بعد هالموقف انا تغيرت صرت اذا شفت هالأشكال مايهموني وش ماسوو احرق نفسي علشان قطعه داشرة ماتستاهل
مااملك الا اني ادعي لها بالهدايه
سبحانك اللهم وبحمدك اشهد ان لااله الانت استغفرك واتوب اليك