توست التونة والبشمل

السلام عليكم ورحمة الله وبركاته
بنات انا اليوم سويت لنفسي غدا وعشا ...قصدي اكلة وحدة هيا لمفروض غدا لكن انا ماكان ليا نفس فاتأخرت وسارت الاتنين سوا ..
المهم .انا وحدة جدا فاشلة في الطبخ ..اصلا انا ما حب الطبخ وما ابدع فيه كتير بس اطبخ علشان اولادي وزوجي الله يحميهم يارب
والاكلتين اللي ابدع فيهم ويطلع لي نفس فيهم المحشي وهادي الاكلة اللي بقوللكم هيا دحين..ماشالله عليا مش بطاله <<<<<شايفة نفسها بالطبختين دي فالحة والله
على فكرة ! هيا تشبه المكرونة بلبشميل بس بدل المكرونة توست وعبارة عن طبقتين..
ياللا نبدأ..
مقادير الحشوة:
واحد ة بصلة كبيرة ونصف
ملعقة صغيرة ثوم مهروس
ثلاثة علب تونة كبيرة..
مكعب ماجي-ملح -فلفل اسود -كزبرة ناشفة..كللو حسب الرغبة
نحمر البصل وبعدين نحط الثوم
وبعدين نحط البهارات والتونة ونخلطهم مرة كويس وخليهم يتشوح على النار شوية..آه افتكرت التونة لازم تتفتت زي ماهوا باين في الصورة ok?
وبعدين نجيب زبدية نحط فيها الخلطة اللي هيا:
ملعقتين قشطة
ملعقتين مايونيز
ملعقتين جبنة سايلة..
ونخلطهم كويس..ماشي؟
وبعدين نجيب صينية ونرص فيها توست مقطع اطرافو وندهن التوست بلخلطة حق الجبن والقشطة والمايونيز..
وبعدين نحط نص كمية التونة فوق التوست المدهون..
ونكرر نفس الطبقة الاولى نعملها في التانية..
توست بعدين ندهن بلخلطة >>>جبنة وقشطة ومايونيز..وبعدين تونة ..
واخر طبقة تكون التونة تمام؟
وبعدين نجي للبشاميل حبيب البي..
مقادير البشاميل تبعي مش زيكم انا ماحط فيها لازيت ولاسمن ولا زبدة وتطلع طيبة مرة
مقادير البشاميل:
9 ملاعق حليب باودر
4 ملاعق دقيق
وملح وفلفل اسود وآجي نوموتو
3 كاسات موية
حطيت اول شي الحليب بدون موية ودقيق والبهارات وخلطهم على الناشف مرة كويس
وبعدين حطيت الموية وبدأت احركهم الين مادابو كولهم بس مش على النار لا برا لسا..
وبعدين لما دابو حطيتهم على النار..الين ماتقلت
وحطيتها طبعا فوق التونة ودهنتها بصفار بيضة ودخلتها الفرن الين ما انحرقت
ايوا من جد شوفوا
مو اقولكم انا طباخة فاشلةةة وبقوة مافي شي يكمل معايا
انا حشيل الاسود وحاكل طبيعي وكأن شيأ لم يكن
والله مرة جوعانة انا بغرف لنفسي وانتو الصينية قدامكم البيت بيتكم حياكم الله
وهادي ليا ....باي <<<<<<<اعذروها بلا غدا وبلا فطور
لاتحرموني من ردودكم الحلوة