حشواات سنبوسة رمضان

كيفكم فراشات نقلت لكم هذا الموضوع وابي الردود المفرحه
اليوم جيبت لكم جم حشوة سمبوسه او سبرينغ رولز
ممكن تستخدمينهم للبيف باستري او المعجنات
انا مجربتهم كلهم
تقدرين تتفنين على كيفج طبعاً
بس انا حبيت اعطيكم افكار من تجربتي
انا مابحط مقادير لان كل وحده تسوي على الكميه الي تبيها
و حبيت اقولكم اني استخدم عجينة السمبوسه الي تصير مربعه
حق السبرينغ رولز و هذي صورتها
و العجينه الطويله للسمبوسه
و هذي طريقتها
طبعا هذي المعلومه معروفه بس انا اقولها للبنات الي
ماعندهم خبره في هل سوالف
و الصقهم بالبيض مخفوق بالشوكه
و مرشوش عليه شوية بزار ( فلفل اسود )
ممكن تسوين خلطة طحين و ماي بس انا افضل البيض يطلع ارتب و مايلعوز
# الحشوات #
1 / حشوة الخضروات الجاينيز
( ممكن تضيفين لها دياي مسلوق و مسلل يعني منتف
او بس تكتفين بالخضره )
انا افضل هذي الحشوه تسوونها على شكل سبرينغ رولز
و تاكلونها مع صوص جاهز ينباع في السوبرماركت)
هذي صورته
فلفل بارد ملون اخضر اصفر احمر او الي عندج
و انا افضله مقطع طوال و ضعاف كلش
ملفوف ابيض و بنفسجي
جزر مقطع شرايح طوال و ضعاف و صغار او مبشور
بصل عادي و ممكن تضيفين البصل الاخضر الطويل
فلفل حار اخضر مقطع صغار كلش للي يحبه حار
ثوم مدقوق
صويا صوص شوي
بهارات مخلوطه و تحصلون في السوبرماركت صوب البهارات علبه مكتوب عليها
بهارات السمبوسه او تحطين على كيفج الي تبين
2 / حشوة اللحم بالصنوبر
(بنات هذي حدها لذيذه سويتها السنه الي طافت و عجبت اهلي وايد)
لحم بقر مفروم و انا افضله يكون فريش بالكيلو من السوبرماركت
لان بيكون احسن من المثلج
بصل و ثوم
فلفل بارد اخضر مقطع صغار كلش كلش و اذا ماتبين مايحتاي
ذره حسب الرغبه
صنوبر تضيفنه آخر خطوه عشان مايحترق و ضروري تتأكدين ان الصنوبر يديد
لان اذا قديم بيصير طعمه كلش مو حلو
بهارات مشكله و حلاتها تكون شوي سبايسي
3 / حشوة الدياي و الذره
( هذي الصغار يحبونها )
دياي مسلوق و منتف صغار
جزر مبشور
ذره
فلفل بارد صغار مفروم
جبن كرفت مبشور
شوي مايونيز يمكن ملعقه صغيره بس عشان الخلطه تلزق مع بعضها
رشة فلفل اسود
4 / حشوة البيتزا
جبن كرفت مبشور او جبنة موزريلا او الاثنين
زيتون تقطعينه صغار
مشروم تقطعينه صغار
فلفل بارد احمر اخضر اصفر الي عندج
دياي مسلوق و منتف او سجق مسلوق و مقطع صغار او مايحتاي
رشة اورغوانو ( زعتر بري ) تحصلونه صوب البهارات
رشة فلفل اسود
ممكن تحطين ملعقه صغيره كلش كاتشب او تستغنين عنها
5 / حشوة الجبن
جبنة كيري
جبنة كرافت مبشوره
بطاطا صغيره مسلوقه و مهروسه مرشوش عليها ملح و شوية فلفل اسود
بنات انا حطيت البطاطا عشان الجبن يتلزق مع بعضه
و مايطلع برى السمبوسه عند القلي
6 / حشوة الجبنه البيضه و النعناع
جبنه بيضه المراعي او الي تبين و الاحسن قليلة الدسم
نعناع مجفف و تلقينه صوب البهارات يشبه الاورغوانو
ممكن تضفين معاهم زيتون اسود مفروم
او سبانخ او زعتر تكثرون منه
7 / الحشوه الهنديه
بطاطا مسلوقه مهروسه مملحه و مبهره
ماش اخضر
ممكن تضيفون نخي اخضر يعني بازلاء خضره
تلقونه في معلبات
بس تهرسونه هرس خفيف كلش بحيث يحتفظ بشكله
بصل و ثوم
فلفل اخضر حار اذا تحبينها حاره
بهارات مشكله
8 / حشوة الشوارما او التندوري
دياي مسلوق و منتف صغار
او تشترون باكيت دياي الشوارمه الجاهز المثلج
بصل و ثوم
فلفل بارد مقطع
جزر مبشور اذا تبون
بهارات التندوري و بهارات مشكله
تسون الخلطه بنفس طريقة الشوارمه
9 / حشوة الجبن الحلوه
جبنة كيري بس
و عقب ماتبرز تصبون فوقها عسل او شيره
و ترشون مكسرات مثل الفستق المطحون
10/ السمبوسه الحلوه
( مالت امهاتنا و يداتنا يقدمونها مع القهوه للعيد )
مكسرات مفرومه و لازم تكون يديده مثل الفستق و اللوز ( الي شكله دمعه)
نصب عليهم ماي ورد شوي و هيل و زعفران شوي
بعد القلي نصب عليهم عسل او شيره و نرش شوي من المكسرات للزينه
عقب ماتسوون السمبوسات صفوها بشكل مرتب
داخل علب بلاستيكيه
مثل هذي
و احتفظو فيها في الفريزر لي شهر رمضان و بالعافيه
و يارب تعجبكم و الي عندها اضافه تضيف