سؤال يحتاج لحل ضروري

1. ودقت علي تسألني :أنا إيش سويت لك حتى تطلعي عني هذا الكلام..

السلام عليكم ورحمة الله وبركاته
بصراحة عندي سؤال مهم جدا.. لكن قبل مااقول السؤال أبقولك القصة (بلساني حتى تكون مفهومه) عشان تكون إجابتك منصفة..
اتعرفت على بنت طيبة ،كريمة جدا في كل شيء لأبعد الحدود حتى لو طلبت أي شيء تجيبه لي إسمها سارة
المهم بيوم تصرفت تصرف مو حلو بحق سارة ولما شفت الغضب عليها تسامحت منها وبطيبة قلب سامحتني كالعادة ومرت الأيام وعلاقتي فيها حلوةلولا بعض أخطائي.. الى يوم تعرفت على شلة بنات من النوع الي عايش الدنيا على كيفه واندمجت معهم وابتعدت عن سارة
إلا إذا كنت محتاجة لشيء ألقى نفسي رجعت لها وهي ماتقصر مع أحد وكانت تنصحني , توجهني
بس كان ردي للأسف التطنيش غسلوا مخي صحباتي لدرجة اني قدامها أتصرف تصرفات تكرهها وسبحان الله مالقيت منها صدود
بالعكس تقولي هذا اللي قاعدة تسوينه حرام يغضب الله ...لكن ماكان يأثر فيني كلامها ولاكأني مسويه ذنب ..
المهم بعد ثلاثة أشهر كنت راجعة من حفلة مسويتها وحدة من الشلة وصار لي حادث أخذت بالمستشفى مدة مازارني إلا وحدة من الشلة وسارة وخففو اعني شوي من اللي أنا فيه وطلعت من المستشفى كفيفة لاأرى
وتركت المدرسة وصارت حالتي النفسية سيئة خاصة إنه صحباتي تركوني الا وحدة منهم كانت دايم تزورني من غير سارة
وندمت على اللي سويته بسارة وتأسفت منها وصارت دايم تجيني
وخبرتها عن رقم يدق علي وطلع شاب ،
قالت لي لاتردين عليه وإلا إنسي إن عندك صاحبة إسمها سارة
بس مع إلحاح الشاب رديت عليه وتعرفت عليه للتسليه فقط ماكنت أدري إنه مسجل مكالماتي إلا بعد مدة لما طلب يشوفني ولما رفضت هددني بالتسجيلات
فما كان عندي إلا سارة تساعدني ودقيت عليها وأعطتني كم كلمة إنه أنا حذرتك ليش كلمتيه؟! قلت لها ماعندي أحد يساعدني غيرك تكفين ياسارة لاتتركيني ..
طبعا عند سارة أخو بالهيئة كلمته مع إنه كان إحراج لها بس ماحبت تردني وقالها أخوها: مقابل إن يحل المشكله تقطع علاقتها بي ووافقت ساره أهم شيء يحل المشكة وقدر يحلها ويريحني من هذا الشاب ..
وبيوم سمعت سارة بالمدرسة كلام (إن سارة على علاقة بشاب)
ولما إستفسرت مين طلع هذا الكلام طلعت وحدة من صحباتي تقول إنه أنا اللي قلت لها هذا الكلام

ودقت علي تسألني :أنا إيش سويت لك حتى تطلعي عني هذا الكلام..

طبعا أنا ماأدري إيش أقولها غير أنا آسفة ياسارة ماكان قصدي آذيك بس لما زارتني صاحبتي وشافت رقم أخوها في جوالي خفت تقوله عني ويطفشني قلت لها هذي سارة تكلمه من جوالي وحلفتها ماتقول لأحد ماكنت أدري إنها بتنشره أنا من جد آآآآآآآسفه ياسارة مادري ليش قلت لها كذا... سامحيني (انتهت)
لو كنتي مكان سارة هل بتسامحين هذه المرة أيضا إنسانة لاتقدِر كرمك وإحسانك وتجاوزك عن أخطائها ولا تستجيب لأي أمر طيب تأمرينها به؟!

أكيد الجواب لا لأنها لاتستحق.. فكيف بنا نعصي الله سبحانه وتعالى رغم كرمه وعفوه الكبير لنا أعطانا نعم عديدة لاتحصى ونحن نذنب ونعلم أنه يرانا وعند الحاجة نرجع إليه متوسلين أن يرحمنا؟! وذنوبنا قد بلغت عنان السماء!!
فيعفوا عنا ولايرد يد مدت إليه خائبة .. ماألطفك ياربي بعبادك..
سؤالي :لماذا أصبحت كلمة (حرام) سهلة لاتردعنا عن ترك المحرمات؟!
لاأنزه نفسي عن الذنوب فكل بني آدم خطائون وخير الخطآءون التوابون لكن حينما أتصفح بعض المنتديات أرى العجب وكأنهم لم يقرأو القرآن في حياتهم، حتى وصلت لدرجة المجاهره بالمعاصي والإعانة عليها للأسف
نسأل الله الهدايه لجميع المسلمين.
ملاحظة :هذه القصة من نسج الخيال ليست واقعية.