شاورما دجاج السيدة المشاغبة بالصور

يابنات ياحلوات اللي مسويه غدا دجاج وتم عندها باقي شتسوين فيه؟؟
عندي الحل أحلى شاورما من بقايا الدجاج وبخبز بيتي سهل وبسيط
المقادير:
طبعا الاخت في الله ماتستخدم مقادير كل شي بالنظر لكن أمري لله بحاول ابسطلكم الموضوع:
العجينة: حطي طحين حوالي كوبين وحطي عليهم حليب سائل مع شوية ملح مع شوية خميرة فورية وبيضة لو حبيتي بس مب شي اساسي وماي دافي بس خليه مثل عجينة الكيكه سائله شوي واخلطيهم..
الطريقة:
طبعا بعد ماتخلطينهم تدهنين المقلا زيت نباتي وتصبين شوي من العجينة لين ماتحمر عقب تقلبينها وتصير نفس البانكيك وتحطينها في الطبق..
طيب اللحين نجي حق الشاورما
المقادير:
أي دجاج مطبوخ عندج ومنتي عارفه تصرفينه شيليه عن العظم والجلد وقطعيه قطع صغار
اخلطي ثلاث ملاعق كبار مايونيز مع نصف كوب طحينيه مع رشة ملح وعصير نصف ليمونه
اخلطي الطحينيه والمايونيز مع الدجاج
قطعي خس افرنجي وطماطم وبصل شرحات رفيعة
عقب تحطين شوية خس عقب طماط عقب دجاج بالطحينيه عقب شوي بصل..مثل ماتشوفين بالصوره
بعدين لفيها وحطيها على شوايه كهربا واقفلي عليها علشان تتحمص شوي:
وبعدين قدميها بالهناء والشفاء