شو حتى الدمع زاعل بواجينة

من گد ما دمانة تسيل فوگ الگاع
ومن گد ما حفرنه گبور ملينه
لمينة جثثنة والأمر لله
وكل خمسه شراكة بگبر خلينه
جثث تدفن جثث والروس تدفن روس
وضعنه بليلة ظلمة وضاع راعينه
الوادم بالفرح تشعل صواني شموع
بس احنه الفرح زاعل صوانينة
چان الليل يحرس والنجوم تنام
وهسه الليل مات وفرهدوا عينة
چان الماي همه يشمرة فوگ الراگ
وهسه اعله الجرف زعلت شواطينة
وگبل چان النه أول وين الاول صار
الاول هسه راح ومات تالينة
گبلّ تلگانة نضحك لو لفانة العيد
وهسه العيد اصلاً ما يمر بينة
گبل ضحكتنة چانت بين الحچايات
وهسه الضحكة صارت ما تحاچينة
گبلّ شارعنه يرسم ورده عالحيطان
وهسه من القطع طاحت حياطينة
تفرج . يمته تفرج يمته نبقه نصيح
ويمته الناس تدري شبينة ما بينة
الفرح لاهل الفرح مو هيچي چنه نگول
أدري اهل الفرح ما حنوا علينة
مدري شلون نبچي وماكو هسه دموع
شو حته الدمع زاعل بواچينة