صار عليها حادث وأسعفها وهذا اللي صار له بعد إسعافها

1. السلام عليكم ورحمة الله وبركاته..


2. إليكم القصه على لسان أخوي وبعدها النصيحه وأعذروني على الإطاله...


3. أخذت عبائتها ولفيتها فيها وحطيت شماغي على أسفل جسدها..


4. ........


5. ومن بعدها ماعاد نطلع إلا بلبس ساتر كل شئ..


6. طبعا يابنات زوجت أخوي اللي كانت قاعده معنا ماتت في حادث قبل سنتين

--------------------------------------------------------------------------------

• *بسم الله الرحمن الرحيم**

الحمد لله رب العالمين والصلاة والسلام على من لا نبي بعده محمد صلى الله عليه وسلموعلى صحابته أجمعين وأهل بيته الطاهرين ومن تبعهم بإحسان إلى يوم الدين..

السلام عليكم ورحمة الله وبركاته..

اليوم يأخواتي بقولكم على قصة أخوي فرج الله كربه ساعة حضوره وإسعافه لأحدى المصابات في حادث مروري حصل قبل فتره من الزمن ليست بالقليله بس والله ياغاليات ماقدر يروح عن بالي أو أنساه وبالذات تعليق أخوي على اللي شافه وآلمه في نفسه وأخوي الله يحفظه ويفك أسره نصحنا إحنا يامحارمه من أم وأخت وبنت أخ وبنت أخت بنصيحه وحبيت أوجه النصيحه هذي لي ولكم كمسلمات نخاف الله ونتقيه ونطلب رضاه وعفوه ورحمته....

إليكم القصه على لسان أخوي وبعدها النصيحه وأعذروني على الإطاله...

كنت راجع من مكه المكرمه بعد مأكرمني الله وأديت العمره وقبل وصولي لمدينتي بحوالي نصف ساعه شفت حادث لعائله وبسرعه توجهت لمكان الحاث وكان فيه مجموعه قليله من أهل الخير يسعفونهم ويتفقدون المصابين يشوفون من حي ومن ميت المهم شفت وحده طايحه بعيد عن مكان الحادث وتوجهت لها بسرعه ولقيتها ساكنه بدون أي حركه بس أسمع أنينها وقلت أبشري خير يأختي إن شاء الله إنك بخير وأهلك بخير فحاولت مساعدتها على الحركه لكن دون جدوا فأضطريت أني أحملها وأحطها بحوض السيارة وكانت شابه بدينة الجسم وكانت هداها الله متكشفه لم يستر منها إلا مابين الصدر إلى نصف الفخذ والباقي مكشوف فقلت اللهم إسترها بسترك وتجاوز عنها وأعمي بصري وبصيرتي عن جسدها وأعني على إسعافها ووالله العظيم أني تخيلتها وحده من خواتي وأنا أغطي ماكشف من جسدها..

أخذت عبائتها ولفيتها فيها وحطيت شماغي على أسفل جسدها..

وتوجهت بها إلى المستشفى إلي بمدينتي لأنه أقرب مستشفى لنا وأخبرت الباقين إلي يسعفون أهلها بوجهتي وتوكلت على الله ومن خوفي عليها لم أشعر بأني تجاوزت السرعه القانونيه إلى بعد ماسمعت صوت عسكري الدوريات وهو يقولي خفف السرعه ووقف ياصاحب ال...<<<أسم السياره..
فأشرت له بيدي على حوض السيارة ولما شاف العسكري حوض السياره وإن فيه حرمه مصابه تقدم قدامي جزاه الله خير وفسح لي الطريق من السيارات حتى وصلنا إلى طوارئ مستشفى مدينتي..
وقام العسكري حماه الله بإستدعاء الأطباء ودخلوها وأخذ العسكري أسمي ورقم بطاقتي وجلست لين دخلوها العنايه المركزه ورجعت للبيت...

........

طبعا أنا بقولكم أول مادخل علينا بالبيت كان ثوبه مليان دم وشفايفه بيضاء من تعب السفر والموقف اللي مر عليه وسلم علينا وكان كلنا جالسين بالصاله أنا وأمي وخواتي وزوجت أخوي الكبير الله يرحمها ويغفر لها..
وقال وعبرته بعينه طلبتكم طلبه ونصيحه لوجه الله إن كان تخافن الله وتدورن الستر لاعاد تطلعن من البيت إلا متسترات ولابسات سراويل طويله وشراب خوفا يصير فيكن ماصار بهالحرمه ويكشفونكن الناس وتنولن غضب الله وعقابه..وش بيضركن لاتسترتن..
قلنا وش اللي صار وش مناسبة هالكلام وقال لنا السالفه..

ومن بعدها ماعاد نطلع إلا بلبس ساتر كل شئ..

طبعا يابنات زوجت أخوي اللي كانت قاعده معنا ماتت في حادث قبل سنتين

ومن ضمن اللي حضروا الحادث عسكري نعرفه وكان مذهول منها يقول والله ماشفت منها لو حتى إصبعها حملناها في الأسعاف ودخلناها ثلاجة الموتى وهي يغطيها القماش الأسود من رأسها حتى أخمص قدميها رحمك الله يأم فهد وغفر لك وتجاوز عنك سيئاتك وأسكنك الفردوس الأعلى من الجنه ياغاليه..
وطبعا خواتي الكبار مع وحده من بناتها هم اللي غسلوها ويقولون لما جينا نغسلها بالقوة طلعنا دسوس يدها(شراب اليد) من يدينها مع إنها الله يرحمها كل جسمها متكسر كسور مضاعفه..
طبعا ياغاليات الغرض من طرحي للموضوع هو إن لو باغتنا الموت فجأة أو حصل لنا ماحصل لأختنا اللي تم إسعافها وإحنا بلبس لايكاد يستر إلا جزء من جسدنا وش بنقول لربنا وش عذرنا نقول ياربي السروال الطويل والشراب
يضايقوننا أحس بالحر والضيقه وأنا لابستهم لا والله هذا ماهو عذر
طيب ماتحملنا ضيق وحر الملابس الساتره بنتحمل ضيق القبر وحرارة نار جهنم؟؟؟؟؟؟!!!!!!!!!!
ملاحظه:أنا قلت سروال طويل وماقلت بنطلون علشان البعض مايفهمني غلط ويفتكر إني أقصد البناطيل الجينز وغيرها وآخذ ذنب الغير وأنا ذنوبي مكفيتني..
قال الله تعالى (( يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلَابِيبِهِنَّ ذَلِكَ أَدْنَى أَنْ يُعْرَفْنَ فَلَا يُؤْذَيْنَ وَكَانَ اللَّهُ غَفُورًارحيما )) الاحزاب 59 .
هذا وصلى الله على نبينا محمد وعلى آله وصحبه أجمعين
منقول