صح كلامي ولا لأ رايي بالكتب

السلام عليكم والرحمه
شخباركم؟؟
ان شاءالله بخير
انا حطيت هالموضوع وابي بس اعرف شي واحد بس شي واحد لا اكثر ولا اقل وش الفايده من الدراسه؟؟
قبل لا تبدأين تلوميني انا موقصدي على مواد الدين.. انا اقصد المواد الثانيه وانا بما اني بنت الادبي وبنات الادبي اللي اعتبرهم عباقره لانعم يحفطون اكثر من 10 مواد واكثر عشر طعش كلمه وتعريف
المهم ابي اعرف فائده من هالمواد
اولها المكتبه القلق ابي شي واحد يفيدني بالمستقبل من المراجع والقواميس الاجنبيه وال30 مرجع
ونجي للبلاغه وماادراك مالبلاغه وربي في جمل وكلمات مكرره في كل درس اتوقع هذا دليل ان الماده غبيه ومامنها فايده ولا هم يحزنون
ونجي للنحو وياويلي ع النحو طول حياتي اكره حاولت كم مره واقول هاذي لغتي بس في دروس وربي مااستفيد منها اعطيكم مثال درس توكيد النون يعني متى أأكد النون في الافعال المضارعه والامر والماضيه.. طيب انا وش اسوي بعد ما أأكدها؟؟ ارقص؟؟
وفي غيرها كثير
ونجي للادب استغفر الله.. انا اسميه قليل الادب مو ادب.. يعني احس ساعات المؤلف اللي حط هالكتاب كان في قمة الفضاويه
اهم المطابع واهم الشعراء واهم ماادري ايش.. طيب حط مثالين او واحد ليش تسطرها كلها؟؟
المهم انا عندي كم ماده يمكن مو الكل يعرفها.. مثل اصول الفقه والقراءات والفرائض
اصول الفقه على عيني وراسي بس اني اقعد احفظ تقريبا 40 كتاب ليش؟؟
يعني هي الدروس عن المذاهب الاربعه واهم الكتب فيها وكل مذهب 10 او 11 كتاب مع المؤلف مع اهم محتويات الكتاب... طيب ليش؟؟ يعني مثل واحد مايكفي؟؟ لازم نوريهم انه احنا عباقره وذاكرتنا 10 ميجا
نجي عند التاريخ.. استغفر الله.. هي حلوه ماقلت لا بس وربي حفظتها بسادس ارجع احفظها ثاني مره ليش؟؟
ولا الجغرافيا اما هالماده خلوني اسكت وماله داعي اعبر عن اللي فيني.. لاني اذا كتبت بقعد اسبوع كامل انقدها وبالنهايه مابستفيد ولا شي
وغيرو وغيرو وغيروو
ساعات ودي اكلم وزير التربيه او المسؤوال عن الكتب.. ابي افهم ليش هذا كله؟؟ يعني عقاب ولا انتقام ولا ايش؟؟
المهم ابي فائده من هالمواد.. اوكي هي علم وهي واجب على كل مسلم ومسلمه بس مااظن انه في فايده لما اعرف مناخ الدول العربيه او وش عندهم من حيوانات.. طيب انا وش دخلني؟؟
بس خلاص تعبت وانا اكتب.. وداريه مامن فايده