غداي البسيط في غربتي حياكم حصريا على الفراشه

شخباركم فراشات
طبعا اعذروني بعض الصور مو واضحه كنت اصور وانا مستعجله خ
( الجوع كافر )
هذي صورة السفره كامله
بتقولون وش ذا الحوسه بس طعمها لذيذ يمي
الربيان ماذقته لاني ماحبه
والحين كل طبق وطريقته
~~~ طبق البطاطس والخضار ~~~
وهالطريقه عرفناها عن طريق واحد صيني
الطريقه بالصور
ناخذ مقلاة العميقه نحط فنجان زيت زيتون ونحط عليه دراسين اعواد وفلفل اسود حب
وشي شكله مثل النجمه ماعرفت اسمها (اللي تعرف تقول لي هع)
نخليها على نار متوسطه 3 دقايق ونشيلهم من الزيت
ثم نحط البطاطس ونقلبها مع الزيت على نار متوسطه وكل شويه حركيهم
( طبعا طريقتي اقلبها مثل الطباخين بدون ملعقه عسى فهمتوو علي عشان مايتكسر
البطاطس بكثرة تحريكه بالملاس ) اذا ماتعرفين استعملي الملعقه عادي
وحاطه معها دواير صغيره تشبه الفلفل اسود بس اخف وزن ومتفتحه ماعرفت شسمها هع
لانه المسميات على العلب بالصيني ولا اعرف اقراها هع
ثم نحط عليهم الخضار عبارة عن جزر مقطع نص حلقات – كوسه قطع صغيره طوليا

• بازيلا ونقلب مع بعض

وخليهم على نار وسط وكل شويه قلبي لين تشوفينهم نوعا ما استوت
نحط عليهم 4 فصوص ثوم حلقات – فلفل اخضربارد قطع متوسطه –
زنجبيل طازج مفروم – 1 فلفل حار احمر مقطع حلقات ( الفلفل خياري )
ونحركهم معهم وتقليب كل شويه لمدة 5 دقايق ثم نحط ملعقتين كبيره صوص صويا ورشه بهارات
مشكله ورشه سنوت ورشة دارسين وملعقه صغيره بهارات كاري و ملعقه صغيره ملح
وتحريك لين يختلطون عدل خليها 3 دقايق اذا استوت طفي النار وبالعافيه
الربيان بطريقتي
ربيان مثلج اغسله ثم اسلقه بمويه خمس دقايق ثم اشخله من المويه اجيب مقلاة
احط ملعقه كبيره زيت زيتون واحط 2 فص ثوم حلقات وفلفل حار احمر حلقات ( خياري )
ورشه فلفل اسود ونص ملعقه صغيره بهارات مشكله وملح لين تستوي
ثم حطي عليهم ملعقه صغيره جبن سايل ونص فنجان مويه وحركي
وخليه على نار متوسطه لين تخثر وبالعافيه
ارز ابيض
اسلقه بمويه فيها اعواد دارسين و قرنفل ( مسمار ) و فلفل اسود حب وشويه زيت
وملح وفلفل حار صحيح واشخله وبالعافيه
اتمنى عجبكم غداي
ربي يسعدكم