قصة للي تعاني من الوسواس

السلام عليكم ورحمة الله وبركاته
اليوم عندي قصة وهذه القصة حصلت لوحده اعرفها وقريبة مني ودائما تشكي وتسولف معاي
المهم كانت بنت عادية زيي وزيك و زي الباقي بخير ومافيها شي لكن فجأة صارت تهتم بنظافة يدها باستمرار وتغسلها كل مامسكت شي عادي تغسلها بالمويه والصابون بكثرة هي مااعطت الموضوع اي اهمية .
وطبعا كانت بداية وسواس وطبعا مع الوقت ولفترة طويلة يعني يمكن حوالي ثلاث او اربع شهور من بداية هذا الشي بدأت تحس احيانا ان وضوءها انتقض وتعيده واعتبرته شي عادي وماكانت تحس انه وسواس مع الوقت صارت تعيد الوضوء مره ومرتين وثلاث الين بدأت تتضايق وتحس انه وسواس بعد كذا تطورت حالتها وصارت تشك في صلاتها انها تنسى ركعه او سجده او تنطق الفاتحه غلط وتعيدها مره ومرتين وثلاث وصارت تطول في الصلاة تخيلوا يابنات ان صلاة الفجر تجلس تصليها ربع ساعه ويمكن 20 دقيقة مع انها ماتسغرق 5 دقائق لانها تعيد الفاتحه اكثر من مره لانها تحس انها غلط وهي صح بس الوسواس لعب لعبته المهم مع الوقت تضايقت حيل وصارت تتضايق من الصلاة لكثرة وضوئها ولطول صلاتها صارت تبحث في النت عن حل وقرأت ان الوسواس المفروض لايلتفت فيه وهي جربت انها ماتلتفت لهذا الوسواس لكن ماقدرت لانها تحس انها مذنبة اذا طنشت شي ويمكن يعاقبها الله
المهم طولت سالفتها يمكن جلست ثمان او تسع شهورعلى هالمشكلة كل صلاة تعيد الوضوء وتطول بالصلاة وتعيدها تخيلوا تقعدوا تعيدوا الوضوء والصلاة لكل صلاة تعب وارهاق من جد .
المهم انا قلت لها تكلم شيخ وتقول له مشكلتها طبعا دقت على شيخ وقالت له عن معاناتها ونصحها انها ماتلتفت لهذا الشي وتطنش شي اسمه وسواس وانها ماتعيد الوضوء ولا الصلاة لانها لو كل مره تتبع الوسواس راح تدمراكثر, ونصحها بقراءة الاخلاص والمعوذتين واية الكرسي كل صباح ومساء وعند النوم والحمدلله نفعها ذلك
صارت تحاول وتحاول تطنش ولا تلتفت للوسواس مره تفشل ومره تنجح الين قررت نهائيا انها ماتلتفت للوسواس وانها ماتعيد الوضوء وحتى اذا احست بشي تعوذت من الشيطان وطنشت ولاتعيد صلاتها وتدعي الله انه يشفيها من هذا الوسواس وتدعي الله ان لايؤاخذها اذا اخطأت
والنهايه ولله الحمد تشافت نهائيا من هذا الوسواس الان وهي تحمدالله على ذلك وتدعي لكل من اصابه الوسواس بالشفاء وتوصيه بأن لايلتفت للوسواس لان مع مرور الوقت يتضاعف ولا يستطيع الانسان وقفه الا بترك اتباعه والالتفات اليه
اتمنى من كل قلبي اني افدت بهذه القصة من يريد الاستفادة