مطازيز عمايل ايديا بالصور

السلام عليكم
كيفكم ؟؟ وايش اخباركم؟؟
اليوم سويت مطازيز وطلع يجنن
حتى زوجي الله يخليلي هوا يارب مرره عجبو
وهادي الطريقه ياقماري
صلو على النبي وقولو ماشاء الله
طبعا هادا شكل المطازيز تشتروه من السوبر ماركت <<لاياشيخه
الطريقه :
اول شي نقطع الخضار
انا قطعت جزر وفلفل رومي وملفوف لأنو هادا المتوفر عندي وممكن تضيفي بطاطس
ونقطع صدور دجاج قطع صغيره انا اسخدمت صدره وحده
ونقطع بصل ونحمره شويه ونحط عليه قطع صدور الدجاج
واقلبها الين يستوي الدجاج شويه ونحط عليه الخضار اللي قطعناها
ونقلبها شويه بعدين نحط عليها طماطم معصوره وشوية صلصه
نخليها الين تتشرب موية الطماطم بعدين نزيد ليه مويه مغليه اكتر من نص القدر ونحط البهارات ملح وماجي وفلفل اسود
ونخليه يغلي ربع ساعه تقريبا عشان الخضار والدجاج يستوي بعدين ارمي عليه عجين المطازيز
وكل شويه قلّبي العجين عشان لايلصق وازا حسيتي المويه قليل زيديها وزيدي ملح وقلّبي العجين الين يستوي ويسير ليّن
وهادا بعد ماخلصت الطبخه
ها ايش رايكم ؟؟
جربوها وربي تجن
يوه الصور مره كبيره الله يسعدكم اللي تعرف تصغرها