مطبق زبيدي على أصوله

امس سويت هالاكلة والصراحة انا احبها وزوجي يحبني لاني اضبطها
واكيد لازم اخليكم تشاركوني الاكلة الحلوة
ياالله تفضلو
file:///C:/Documents%20and%20Settings/user/My%20Documents/My%20Pictures/VBQ0Es05250911.jpg
الطريقة حبايبي كالتالي
2كاس رز
كيلوسمك زبيدي
ماجي
ملعقة سمن بلدي
زبيب وبصلة مقطعة للحشو
البهارات(لومي اسود مطحون,كاري,كركم,فلفل اسود,رشة قرفة,ملح
الطريقة
نظفت السمك عدل وحطيت البهارات عليه وحطيت داخله بهار بعد
وغطيته بالقصدير وحفظته بالثلاجة ساعة(ممكن ساعتين بس مو اكثر عشان ما يتفتت بالبهار)
احمس البصلة والزبيب واحطلهم البهار واشيل منهم مقدار يكفي للحشو
والباقي اخليهم في القدر واحط عليهم ماء لطبخ الارز وماجي واخليه عالنار يغلي
وبعد الغليان اضيف الارز بحيث يكون الماء مغطي سطح الارز
اما السمك نحشيه بالزبيب والبصل المحموس ونخيطه عشان مايطلع الحشو
على فكرة حشو السمك مهم لانه يروح الزفارة اللي فيه
بعدها نعمل بكل سمك 3شقوق بالعرض من الاتجاهين يعني 6 شقوق بكل سمكة
والشقوق ما تكون عميقة حيل عشان ما يطلع منها الحشو
ونقليها بزيت غزير حتى تاخذ لون اشقر وما تاخذ وقت طويل بالزيت نفس انواع السمك الباقية
وبعدين نحطها فوق الارز بالقدر ونسكر عليها (يكون الارز قرب عالاستواء يعني قعد ينشف)
ونحط فوقهم ملعقة السمن العربي
وممكن نحط السمن على الرز قبل السمك وهذا اللي اسويه
وننطر لين ينشف الارز ولما تفتحون القدر بتلقون السمك بعد حمام هالبخار طري
وكأنه ما انقلى بالزيت ابدا
شرايكم بنات؟؟؟؟؟