يالي تاكلين خلاص عاد وقفي اكل لين متى تاكلين

مساء الخير
هذا موضوعي شوي قوي
بس والله اشوفكم مثل اخواتي وهالموضوع اقوله لنفسي للدرجه الاولى
بعد معاناه مع التخبيص
بنات لين متى ناكل ماملينا
من الشحوم
من الدهون
من المقاسات الكبيره
من الثقل
من الم الركب
من السكر
من الضغط
من اي مجهود بسيط ينقطع نفسنا
متى نقول لنفسنا خلاص ستوب
النفس الطفسه هذي لين متى بتاكل
الله سبحانه وتعالى خلقنا عشان نعبده صرنا استغفر الله نعيش عشان ناكل مو العكس
وبعدين مامليتوا من هالشحوم والمناظر المقرفه
كل يوم بكره او السبت او الاسبوع الجاي او بدايه الشهر
ترى احنا مانضحك الا على انفسنا
شبابنا راح
بيدك يكون جسمك مودل وبيدك تندسي ورى الجلابيات وندفن شبابنا ورى لذه مؤقته ويبدء بعدين تآنيب الضمير وليش اكلت وليش خبصت
عاد انا انسان الله ميزني بالعقل واعرف
وش الي يحتاجه جسمي
يعني اوكي نحرم نفسنا شهر اثنين وثلاثه نرجع ناكل بكل عنف
طيب وين التعب ووين المشي والرياضه كلها تروح كذا في مهب الريح
بعدين بقولكم شي هذي الريجيمات السريعه مامنها اي فايده وانا اول وحده ضعت منها صرت ادور في حلقه مفرغه تقولك انزلي خمسه في خمسه ولا
عشره في اسبوع كلها كلام فاضي طبعا حتى لو نزلنا بالميزان راح ننبسط من الفرحه بس
بالميزان فقط ولكن صدقوني الشكل ماراح يفرق كثير وانا اكلمكم عن تجربه
وبعدين مافيه احسن من النظام المتوازن الي مايخليك ترجعي مفجوعه عالاكل خليه نظام حياه مافي مانع لو نفتح مره بالاسبوع مطعم او اجتماع مع العائله
ومايكون النزول اكثر من كيلوين بالاسبوع هذا الصحي والي مايرجع
خلاص يابنات اصحوا اصحوا عمرنا ضاع واحنا من ريجيم لريجيم يوم ريجيم وعشره تخبيص
حطوا قاعده ببالكم اللاكل ماراح يطير والله ولا قالوا لاسمح الله راح تصير مجاعه عندنا بالعكس ماشاء الله كل يوم تزيد المطاعم اكثر واكثر
لو ماتهنينا بشبابنا الان متى نتهنى ننحف لمن يصير عمرنا
خمسين وستين خلاص عاد ماينفع
خليكم اقوى من نفسكم الاماره بالسوء تحدوا نفسكم قبل كل شي
لاتقولي بكره ابدء لا ابدي من هاللحظه صدقيني حياتك بتتغير ومع كل كيلو تفقديه تحسي انك ازحتي عن جسدك المتعب بالشحوم انجاز وكافئتيه
قرري في نفسك ورددي دوم هالجمله راح انحف راح اصير رشيقه
لو طالت المده مشوار الف ميل يبدء بخطوه
كل يوم ردديها عشر مرات او ماتصحي من النوم والله هذا ايحاء وشعور جميل
قولي وزني راح ينزل وراح اصير رشيقه وحلوه
واكبر غلط لمن نحدد لنفسنا فتره معينه عشان ننحف فيها لاتعطي لنفسك فتره شهر او شهرين او حتى ثلاثه
لا خليها مده مفتوحه
تصالحي مع جسمك وارضي فيه بكل عيوبه الحاليه عشان تقدري تصلحينه وتجملينه
مو مهم تنزلي عشره او عشرين او ثلاثين
المهم في هالفتره المفتوحه توصلين لهدفك لاتقولين انا وزني 100 او اكثر
لا انسي
لو نزلتي نص كيلو باسبوع اعتبريه انجاز
حبي وزنك وجسمك والله حتى لو كنتي سمينه راح تنحفي لان اهم شي الثقه وحب الذات بعدها نقدر نصلح في داخلنا
عندي كلام كثيير مره ودي اقوله لكم
السمنه مره بشعه يابنات لابعد ماتتخيلوا اذا كنتي متزوجه استلمي تعليقات من زوجك واحراج وقت ماتطلعي معه السوق
وماتلقين مقاس وحتى لو كان طيب وذرب ومايحاول يجرحك ويحرجك بكلام بس صدقيني جوى قلبه يكون
نفسه ومنى عينه يشوفك رشيقه تلبسين له وتكشخين بجسم حلو وانثوي
ماتخافي تطلع بطنك او جسمك ولحمك
يعني كل شي يليق عليك القمصان الشورتات الجينزات تصيرين قمر مو هذا اكبر سبب عشان تنحفي
واذا كنتي بنت يكون هالشي بكل اسف عائق في زواجك
يعني كل شي في النهايه قسمه ونصيب بس الله سبحانه وتعالى يقول توكلوا علي وخذوا بالاسباب حطي بنت سمينه وبنت نحيفه في مناسبه اكيد الرشيقه
رراح تكون الانظار عليها
وبعدين الكل يدور الرشاقه سواء الرجال او الحريم يوم يخطبوا لاولادهم يدورا رشيقه
يعني بتكون السمنه سبب اساسي يمنع الزواج
اكيد ودك مثل كل البنات تفرحي وتنخطبي وتلبسي الفستان الابيض وهذا اكبر سبب ودافع يخليك تسعين للرشاقه
بس هذا الي عندي واتمنى تتقبلوا كلامي بصدر رحب ومايزعلكم ابد لانه مثل ماقلت موجه لنفسي للدرجه الاولى
واتمنى لو كنت لامست فيكم واعطيتكم دفعه لقدام
وفي النهايه لو عجبكم موضوعي ادعولي بالسعاده