ربيان مبتكر على طريقة الوالده بالصور

السلام عليكم
ربيان مقلي على طريقة الوالده
اليوم الوالده الله يحفظها مسويه لنا ربيان على الغدا .... والوالده معروفه بابتكاراتها
وحسافه ما صورت كل خطوات اعداد الطبق ... بس صورت ثلاث صور
ما اطول عليكم الكلام واخليكم مع الطبق وبعض الصور اللي قدرت اصورها في المراحل الأخيره من اعداد الطبق
المقادير:
1 كيلو ربيان حجم كبير
2 حبات بطاطا مقشره ومنظفه
1 ملعقه صغيره زنجبيل طازج مهروس او بودره ( طبعا الطازج أفضل)
3 - 5 ملاعق كبيرة طحين
نص ملعقه صغيره بهارات
ملح
فلفل حار بودره - اختياري
زيت للقلي
الطريقة:
ننظف الربيان بالطريقه المعروفه ولكن من غير ما نشيل الذيل
نتبله بالفلفل الاسود وشوية ليمون ونتركه منقوع على ما نجهز التغليفه
ننظف البطاطا ونبشرها بالماكينه وتكون على شكل خيوط
نضيف على البطاطا البهارات والزنجبيل والملح والطحين حتى تتكون عندك عجينه رخوه رطبه
والحين نبدا بالشغل
نجيب كل حبة ربيانه ونبدا نغطيها بخلطة البطاط .. مثل ما هو مبين بالصورة
(الصورة ناقصه ربيان لان على ما رحت المطبخ لقيت الوالده باديه بالقلي)
نتركه مغطى بالخلطه وبالثلاجه مدة ساعه او الى وقت القلي
نسخن الزيت العميق ونبدا نقلي الربيان ... نار متوسطه وياخذ وقت ربع ساعه حتى تستوي حبات الربيان ويكون لونها اشقر
للتقديم .... نقدمه مع شبس مقلي واي صلصة جانبيه ( مثل الكاتشب او صلصات السلطة الجاهزة)
يطلع الربيان مقرمش من بره وطري ولذيذ من داخل
اتمنى عجبكم
بالعافيه