o O مرقوق O o بالعافيه عليكم O o

1. مرقوق

مرقوق

السلام عليكم يابنياتي .. شلونكم وشخباركم عساكم بخير وعافيه وعسى ريايلكم منثولين من طباخكم .. اي ماعلينا اليوم ياويوه الخير بنطبخ مرقوق .. والمرقوق شوي يبيله مقاقه ويبيله تبطلون عيونكم ومخوخكم هالمقفله معاي ..يالله نبدي
بسم الله بدينا وعلى النبي صلينا .. نحتاج حق المرقوق سلمكم الله .. طحين اسمر وابيض مع ان بالاول ماعندنا طحين ابيض ولا نعرفه .. اي نكمل .. والطحين الاسمر يكون اكثر من الابيض بمرتين يعني اذا بنحط قلاصين ا4 قلاصات اسمر نحط مقابلهم 2 ابيض .. ونبي بعد ربع قلاص زيت عشان تمسك العجينه وماي .. الحين نخلط الطحين مع بعض وفوقهم الزيت وشوية ماي عشان تتماسك وتخلط لما تصير عينه .. نخليها نص ساعه عشان تصك .. وبهل فتره نروح نسوي المرقه مالت المرقوق .. ترى اهي نفس مرقة اللحم بس فيها تغير شوي يحطون في المرقوقه بيديان وفلفل اخضر بارد وغيره من الخضار وهذا طبعا على هواكم وعلى حسب ذوقكم ولا ان ماعندكم ذوق بس يالله ... وماراح اشرح طريقة اللحم لاني شرحتها .. المهم نحمس اللحم مع البصل والطماط والثوم والبهارات ونحط فوقها ماي ونخليها تقلب لمدة ساعه وبعدين نملحها وبهل فتره نرجع حق العينه ونسويها اكور صغار مدلقمين ونرقهم نخليهم يصيرون بليتات ادري ماتفهمون هل كلمه يعني شرايح او صفايح او مادري شنو بعد .. ولما نخلص من رق العينه نشوف المرقه ونحط فيها الخضار والخرابيط كلها كوسه بيديان جزر فلفل في ناس اللهم ياكافي يحطون زهره وفي ناس يحطون ملفوف وفي ناس مادري شيحطون .. ماقول الا مالت حتى مالت .. ماعلينا واحنا نرق العينه اللي نخلص منها نشوحها بالجدر ونسوي الثانيه ونحاول نشوحها في مكان ثاني يعني نوخرها عن رفيجتها وهلم جره .. بعدين لما نخلص نقصر على النار ونحط حديده تحت الجدر .. ولا تنسون تخلون الماي اللي باجدر قبل لاتحطون العينه يغطي الخلطه يعني يغطي اللحم والخضار اللي حطيتوها بشوي واذا قصر الماي زيدوا يعني تحت نظركم ..وعقبها يبيلها ربع ساعه مو اكثر وعليكم بالعافيه
الحين عرفتوا طريقة المرقوق .. عاد بقولكم طريقه اسهل واحسن .. ماعليكم من خرابيط وهذرة العيايز .. ترى المرقوق تعب على الفاضي روحوا الجمعيه واشتروا الخبز العربي قصدي اللبناني مال المطاحن وقطعوا صغار وحطوه على المرقه شوفوا شلون يصير احلى من المرقوق ونفسه بالضبط .. واذا تبون بعد حطوا خبز ايراني وهذا يسمونه محروق صبعه .. ليش مسمينه هالاسم مادري !! طبعا مافي سبب
نصايح الحجية
اذا رقيتي العينه حطي شوي منها على عيونج يقولون انها تشيل السواد اللي تحت العين .. مادري عاد صج ولا جذب انتوا جربوا ومنتوا خسرانين
و شعارنا؟؟
كونوا معنا في حملتنا ضد الرجال ومحاربتهم من خلال كروشهم .. والهوايه حمايه