جاء دور الاكل الايطالي

مرحبا
كيفكم يافراشات
بعد الهندي والمغربي والمكسيكي والفرنسي والتايلندي يجي دور الايطالي
الاكل الشهي ببساطته
انا ماصورت السفرة بس راح اوركم صور الاطباق
طبق رئيسي وهو فوتيتشينو بالفلفل الحلو الاحمر المشوي
والحلى المشهور تيرميسو
اطعم مكرونة
نجي للمكرونة: المقادير
فلفل رومي احمر - بصل - ثوم - مرقة دجاج - جبن مازريلا - زيت زيتون -ملح
فلفل اسود -اويغانو
نمسح على الفلفل الاحمر بالزيت الزيتون وتدخليه الفرن ينشوي لمدة 15 د او اقل ولا
تنسي تقلبيه على جميع الجهات
لما تخرجيه من الفرن تتركيه يبرد بعدين تقشري القشرة الخارجية له وتقطهية مربعات
تحمسي البصل والثوم بزيت الزيت الزيتون لين يذبلو وبعدها تضيفي الفلفل الاحمر
وتحركيه معاهم لدقايق بسيطة
تحطي البصل والثوم والفلفل في الخلاط وتضيفي نص كاسة صغيرة مرقة دجاج
وملعقة جبن مازريلا والملح والفلفل الاسود والريغانو وتخلطيهم لين يصيرو
صلصة ثقيلة
تقطعي الدجاج الصدور لمربعات وتشويحيهم على النار بشوية زيت
لين يستوى تقومي تفتتيهم بيدك لشرائح
تحطي الدجاج في اي صينية وفوقها الصلصة والمكرونة المسلوقة وتقلبيهم
وتزيني الطبق بالبقدونس وشوية رشن من جبن البرميزان
الترميسو
المكونات :
بسكوت ليدي فنجر كيس - نسكافة -جبنة فيلادلفيا الصغيرة -قشطة - دريم ويب كيسين
انا ماعندي صينية حلى صغيرة على قدي انا و زوجي فغلفت قدر فخار بالنايلون
وقصيت البسكوت على قد ارتفاع الاناء وسقيت البسكوت بالنسكافة بالملعقة
خلطت الجبن والقشطة وشوية نسكافة لوحدهم وخلطت الدريم ويب لوحدة بعدين جمعتهم
مع بعض بالملعقة وقلبتهم
صبيتهم على الاناء اللي راصه فيه البسكوت ورجعت رصيت بسكوت من فوق
غطيتها بالنايلون ودخلتها الثلاجة مدة تتجاوز الساعتين،خرجتها وشلت النايلون من الوجه
وقلبتها على طبق التقديم وشلت باقي النايلون بشويش
اخذت ورقة من اوراق الطابعة ورسمت عليها دائرة وداخلها خطوط فرغتها
حطيتها على الحلى ولصقت بسرعة
رشيت عليها بودرة الكاكاو وسحبت الورقة على مهل وزينتها بشكلاته هرشي الساءلة والحبوب
(((ملاحظات)))
بالنسبة للمكرونة
تقدري تستخدمي ثلاث اواع من الفلفل الرومي ، انا مرة استخدمت الاخضر والاصفر والاحمر
وطلعت طعمة .
اذا ماعندك مرقة دجاج طازة تقدري تذوبي مكعب ماجي في ماء وتستخدميه
سبق لي وعملت هذه المكرونة بدون دجاج وطلعت برضه طعمة.
الاكله ماتاخد معاكي وقت وسهلة ونتيجتها ابداع.
بالنسبة للترميسو
اصل الحلى فيه بيض بس لان الوصفة الاصليه البيض ماينطبخ علشان كذا بعدت عنها .
كل الوصفات تقول غطسي البسكوت في النسكافة وانا لقيت اني لما اغطسه واستخدمه في الحلى
يطلع مره ذايب وانا ماحبيته علشان كذا انا استخدم الملعقة وارش على كل قطعة بسكوت.
جبن فيلادلفيا اطعم من كيري علشان كذا انا استخدمها حتى في التشيز كيك نزلت مره وصفة تشيز كيك بالكيري بس لما جربت الفيلادلفيا لقيت انها اطيب.
اصلا لو حبيتي تستخدمي الجبن الاصلي لهذا الحلى استخدمي جبن ماسكربوني وتلاقيه في الدانوب .
وسلام