حلو المارشمللو من مطبخي

السلام عليكم و رحمة الله و بركاته..
شلونكم غالياتي؟؟ عساكم طيبين؟
حبيت أحط لكم طريقة حلو المارشملو من كتاب عبير الراشد 50 طبق للذواقة الجزء الأول.. روعة شوي عليه بس دسم ..
أول شي أعطيكم المقادير و الطريقة من الكتاب نفسه
مقاديري:
كيس خدود بنات بو 300 غرام (يفضل الصغار اسهل و ابيض مو ملون)
كريمة سائلة علبه و ثلث
جبنه فيلادلفيا علبه كبيره (300 غ)
قيمر 250 مل 3 علب
كيس دريم ويب
سكر ناعم (ملعقتين طعام)
كوكيز مثل اللي بالصورة .. علبتين او على حسب الرغبه اذا تحبين اقل او اكثر
كيك سارالي باوند كيك كاكاو حسب الرغبه (سويت 11 قلاص كفتني علبه وحده)
فليك و أعواد البسكوت اللي بالصوره للتزيين (على كاكاو)
استخدمت استكانه حليب لتخفيف الخلطه
استعداد ابتدي..
اول شي نقطع نص كمية المارشمللو و ننقعها بعلبه كريمه سائله لمده ليله كامله او الصبح لو كنتي بتسوينها بالليل.. لو المارشمللو الصغار ما راح تحتاجين تقطعينه
نخلط النقيع بالخلاط مال العصير و اذا ما نفع زيدي عليه شويه حليب سائل ,, أنا آخر شي استعنت بخلاطه براون اليدويه العجيبه مالت هرس اكل اليهال.. صالحه لجميع الاغراض
عقب ما يختلط المارشمللو و يذوب تخلطين معاه باقي الكريمه و الفيلادلفيا و الدريم ويب و القيمر و الشكر.. بنفس الخلاط..
تكسرين البسكوت لقطع مو صغيره ولا كبيره و تخلطينه بربع مقدار الخلطه البيضا..
تصفين الكيك و البسكوت المخلوط طبقات على حسب الرغبه.. انا سويتها طبقتين كيك بينهم بسكوت,, و لو حبيتي مارشمللو .. انا ماحطيت.. و تصبين فوقه الخليط الابيض و تزينينه بالفليك و اصابع البسكوت و تحطينه بالثلاجه لما يبرد و يصك شوي..