خلاص انا يئست من الطبخ

السلام عليكم ورحمة الله وبركاته
انا خلاص يئست من الطبخ وع اكرهه
من زيني اصلن انا او وجهي يقالي ابطبخ
امس دخلت المطبخ يقالي بسوي بان كيك طبعا لا يروح بالكم بعيد بسويه بالمكرويف لاني اخاف من الفرن
المهم هي خلطه جاهزه يوم خلطت الخلطه وخلصت وفتحت الميكرويف والا الخلطه انحرقت
هذا كله من الزهق الساعه 6 الصبح طبعا لحالي اجرم ماحد صاحي غيري
ومن قوه الريحه قام ابوي من الهبله يحسب شي التمس والا انا وكشتي طالعه من المطبخ اقول لالا ماصار شي بس حرقت البان كيك ويعصب بوجهي ليش تمطرسين بالصبح واذا تبي تمطرسين بدون روايح
المهم عدت هالمره على خير وقلت له خلاص توبه مافيه مطاريس على الصبح
ايه هين مدام راسي يشم الهوا الا بمطرس
وادخل المطبخ مره ثانيه بس هالمره خواتي كانوا قايمات وكانوا فوق عادي بغرفتهم
وادخل انا ابسوي خبز بالثوم <<<< يمديكم على الافكار وطبعا بالمكرويف اللي احسه يدعي علي
واروح اجيب الخبز بالثوم هو جاهز بس يبيله تصليح عاد مكتوب بالعنقليزي ولا فهمت طريقه التحظير
وقلت يالله مايبيلها طريقه ادخله بالمكرويف
وبس فهمت انه نخليه من دقيقه الى دقيقتين
وحنا مكرويفنا حار يعني كانه فرن وادخل وحده ابجرب واسمع الثوم يقول تش تش تش
واروح اسوي نفسي فاهمه واقول الا خلصت الدقيقه الاولى بقلب الخبزه على الجهه لاثانيه واخليها
واسرح انا بالمطبخ ولا انتبهت الا لصوت المكرويف يقول طيط يعني خلص
واشوف الدخاخين تطلع دخاخين مب صاحيه والله
انهبلت وقلت ياربيه الحين ابوي بيلزخن اكيد
وهذا توني ما فتحت المكرويف المهم رحت فصلته وييوم فتحت الباب صراحه مادري وش صار بالدنيا قامت تدور بي غصت بغيمه من الدخان صرت ماشوف وين انا وصرت اكحكح انا اووجهي رحت ادور زر مروحه الشفط
ويوم لقيته وانا على اعصابي مثل الخبله اناقز بالمطبخ وارش مويه <<< مادري وش الفايده يقالي بنشف الدخان
وبعدين قلت لازم اتصرف والا ابوي صدز بيلزخن ورحت فتحت الشبابيك وسكرت باب المطبخ
ورحت فوق وخواتي يقولون وش سويتي ريحت الحريقه واصله فوق
وقلت اص اص ابروح اخفي جريمتي
وجبت الفواحه ورحت ادور بالبيت << يقالي بغطي الريحه
ودخلت المطبخ وصرت ادرو بالفواحه لين تقريبا اختفت وصكيت الباب
وهجيت لغرفتي وصكيت علي الباب
بس مافيه جريمه كامله نسيت ان غرفتي تحت المطبخ وجت الريحه مع المكيف
وابوي جاء فوق وشم الريحه وقال وشو بعد ذا بانكيك قالت وحده من خواتي لا هذي الدبشه حارقه خبز بالثوم
عاد ابوي ما درى وش يقول سكت وراح كانه خلاص سلم للامر الواقع
صدق اني دبشه وغبيه ماعرف السنع بس خلاص
خلاص احس اني يائسه من الطبخ وماودي اتعلمه<< بتتزوج بعد 3 شهور
وادعي ربي انه يحببه باكل المطاعم
وشفيها المطاعم نعمه
زين اني اعرف اقلي بطاطس وسمبوسك بس ماعرف ازين اللي بوسط السمبوسك
واعرف اسوي اندومي وشاهي يسده