سبكتي بالخضروات اليوم المفتوح وعمايلوو ههه

السلام عليكم ورحمه الله وبركاته
يسعد لي صباحكم ومسائكم في جميع اوقاته..
في البدايه انا صراحه ماكنت بسوي سبكتي كنت ابي اسوي معكرونه عآديه
ولكن مالقيت قلت يلا اسويها...
وشفت نفسي فاضيه قلت ليه ما اصور مره وحده واحطها للبنات يمكن يتعلمون السنع ههه
>>> يازينك وانتي ساكته
طبعاً كلمه لبنات قرووبي
ترا كيفي هالطبخه سويتها أمس يعني بيوومي المفتوح الجمعه ولا فيه لي اي عقاب
شفتو اليوم المفتووح وعمايلوه *_^
المهم
بسم الله نبدا
صح قبل لا أبد تقدرون تسمونها سبكتي بالخضروات يعني بدون ايدام
ترا الخضروات مره لذيذه تستغنين عن الايدام حتى
المكونآت :
سبكتي

بصل

طماط +جزر+بطاطس+فلفل بارد

معجنون طماط+ بهارات+ملح+ليمون اسود+ملح+ماجي
طبعاً انا مجنوونه شي حامض عشان كذا حطيت ليمون اسود بالاضافه الملح كان شويه
لان بحط ماجي عشان يعطي الاكل نكهه..

خضروات مشكله

الطريقة
نسلق السبكتي ونضيف لهاا الخضروات المشكله عشان تنضج

نحمس البصل لما يكون أحمر
طبعاً تلاحظون كميه الزيت كثيره زدتها بعد اكثر
لاني اضفت الجزر والبطاطس والفلفل الاخضر يقلون بالزيت لماا يصير لونهم احمر
وبعدها اضفت علييه الطمام وخليته لما يذوب واضفت بعد فاصوليا حمرا يمي طعمها جونآآن معاه
وهذا شكلهم مع بعض

بعدهاا
لما حسيت كل شي مره استوى
حطيت البهارات والملح والماجي والليمون الاسود وكل المقادير اللي ذكرتها قبل
وانتظرت شويه وحطيت الصلصاء
صراحه انا مبالغه المفروض ماحط صلصاء كثير كذا
ولكن انا احب المعكرونه كذا تكون حمرا وطعمها مرره حامض
يعني اللي يحبون يسون مثلي انا كميه السبكتي مره شويه لشخصين
مع ذلك حطيت علبه ونص
مع انه المفروض نص علبه تكفي
وهذا شكل الحمسه مع الصلصاء شفتو كيف حمرا

طيب نجي لسبكتي نضجت
وهذا شكلها

بعدها خلاص حطيت السبكتي ع الحمسه
وخلطتهم مع بعض لما كل المكونات تجانست مع بعضها وبعدها قصرت ع النار
وخليته يستوي شوي على بال ما اغسل الصحون وارتب حوستي..
ام
واخيرآآ
حبايبي
هذي شكل الطبخه اخر شي
وهذا من قريب
وطلبعاً مثل ماتشوفون في الصوره الاولى
حاطه سلطه+شطه +ليموون..
والاهم من كذا كوب الشاهي
>>>صايره مجنونه شي بدال ماتحط عصير ولا ببسي حاطه شاهي لول
اهلي يقولون مجنوونه انتي
وطبعاً السلطه اللي صارت اساسيه والحمدالله صرت اتقبلها عكس اوول
وبالهناء والعافيه ع الجميع
واعذروني لو فيه اغلاط
او الصوره كبيره
مع ان صغرتها بس طلعت شوي كبيره
لاتنسونآ من دعواتكم
أختكم
طيبةحيل