طبخة الزقني إذا ما حفيت أخواتك وجاراتك علشان يعرفون الطريقة ما أكون لمو

عندي لكم طبخة رهيبة أتحدى الكل إذا ما عجبتهم
إذا ما حفيت أخواتك وجاراتك علشان يعرفون الطريقة ما أكون لمو
سويتها لأخوي في العيد وكان بيأكل أصابعه وراها بس ستر ربي
ما جاء على بالي أصورها وإلا كنت نزلت الصور وخليتكم تصلحونها الحين في منتصف الليل
أصل هذي الطبخة حبشية ............. لا تستغربون بس
طعمها خيال
المهم ندخل في صلب الموضوع
المكونات
لحم بقر ( وهو الأفضل) أو غنم اللي يجي
بصل
طماطم
فلفل أحمر ناشف
كمون
ملح
صلصة
زيت
الطريقة
قطعي بصل كثير كثير وكل ما كان البصل كثير كل ما صارت الطبخة أطيب
وبعدين حطي زيت في الطاوة وحطي البصل عليه وخليه يتحمر ويصير لونه بني فاتح
بعدين حطي عليه الصلصة وخليها شوي مع الزيت علشان لا تطلع الطبخة حامضة
بعدين حطي اللحم بعد ما قطعتيه صغار صغار
حركيه مع البصل والصلصة
في الخلاط حطي طماطم مع الفلفل الأحمر الناشف وكثري الفلفل لأن الطبخة لازم تكون حارة
المهم بعد ما تخلطيهم صبيهم على اللحم وخليه يستوي على نار هادئة وغطي الطاوة بالغطاء الخاص فيها
ولا تنسين تحطين الملح والكمون
في هذا الوقت جهزي اللحوح
مكونات اللحوح
طحين ذره
طحين دقيق
اللحوح طريقته سهههلة
بس حطي لكل مقدار دقيق أبيض مقدارين طحين ذرة
يعني كوب دقيق وكوبين ذرة وملح وملعقة خميرة فورية
طبعا ممكن تزيدين المقادير حسب الرغبة
كل هذولي حطيهم في الخلاط واخلطيهم مع ماء دافئ لما يكون الخليط رقيق مثل خليط البان كيك
أو مثل خليط القطائف وصبي الخليط في براد
وجيبي الطاوة الخاصة بالمراصيع تعرفونها أكيد
خليها على البوتجاز واشعلي النار تحتها لما تصير ساخنة مره
صبي الخليط بعد ما يخمر طبعا وخلي النار عالية لا تقصرين عليها أبدا
بعد كذا لما ينشف اللحوح ارفعيه بالملاس وحطيه على جنب وخليه يبرد شوي
المهم لما ينضج اللحم ويستوي طفي النار
طريقة التقديم
حطي في صحن التقديم اللحوح وصبي عليه الزقني ويأكل بالملعقة
جربوها والله بتدمنوا عليها إدمان
بس لا تأكلون الملاعق من حلا الطبخة وتنسون
أبغى أشوف ردود تشرح الخاطر
وإلا ما في طبخات جديدة