مقلوبة الحاشي بالصور على طريقة العزاب

1. واللي يبي من فوق لتحت الله يحيه يتفضل :


2. مقادير يا قلب العناء :


3. ونحرك برفق

أيها الإخوة والأخوات الأعزاء .....
أسعد الله صباحكم ومسائكم بكل خير وسرور ....
واحد من الشباب قال لي أمس إني أحب ألف وأدور لين آصل للمفيد !!!!
ما عنده سالفة لا يهمكم ..... وأنا أصلاً ما همني كلامه بس أبيه يدري إني رجال سيده وأحب (( الدغري )) .
لذلك بأدخل معكم في الموضوع بدون مقدمات ولا شرح .
ياشين اللي ما يعرف يتعذر !!!
خلاص بأقول لكم الصدق ..... الموضوع هذا ما يبي مقدمات واللي يبي نصيحتي الموضوع هذا يُقرأ بالمقلوب يعني من تحت لفوق .....

واللي يبي من فوق لتحت الله يحيه يتفضل :

مقادير يا قلب العناء :

( خضار مشكلة مغسولة جيداً ومقطعة على شكل شرائح أوقطع كبيرة : بصل - فلفل رومي - قرع أمريكي - بطاطس - كوسا - جزر - طماطم - باذنجان - زهرة ) , ( رز مغسول ومنقوع لمدة 10 دقايق ) ,( لحيمات حاشي مقطعة قطع متوسطة ويشترط في الحاشي أن يكون من الوكالة يعني ما هوب تقليد مثل أكثر الحشو اللي في الملاحم اللي ماليةٍ الرياض وما جاورها ويستحسن أن يكون مسحوب بأذينته وهو يرضع من أمه وعلى طول للقصاب .... خ ) ,( زيت زيتون ) ,( كم قرين فلفل من الحار ويفضل الأحمر بعد - مكعبين ماجي - علبة معجون طماطم - بهارات - ملح - ليمون أسود - قرفة أو دارسين كما نسميها )
الطريقة :
نكشن البصل بزيت الزيتون ( ما عليش مستعجل ) وإلا ودي أسهب في الشرح والخطوات .... بس العوامة خربانة ..... والسعابيل لا يمكن التحكم بها ..... لذلك تحملوا الله لا يهينكم أي قصور في الشرح .
نحط عليه البسكوت !!!!! قصدي قطيعات اللحم (( آآآآآه والله ودك تاكلها وهي نية )) , وحرك يا محرك ......
بعدين الله يسلمكم نتأكد إن اللحيمات إنحمست وذابت مع البصل ثم نصب شوي موية حارة عليها ونغطي القدر ونتركه لمدة 4 دقايق على نار متوسطة ثم نشيل الغطاء ونحاول نكشط الرغوة اللي على الوجه وهي بقايا على اللحم والعظم ما تطلع بالغسل العادي يعني لازم ماء حار .... وين بنقلبها دعاية كلورس ..... ما علينا نرجع للموضوع.
نكب الله يسلمكم الطماطم على اللحيمات ونحركها نحركها نحركها ... بعد 3 وإلا خلاص ... نحركها لين تذوب مع المكونات وترى هذي مهمة للي يهمة ويدقق وينشب في الحلق على مسألة الطعم النهائي .... وبتقولون : ليش ؟؟؟؟
بأقول لكم : بس !!!!
كيفي .... مقلوبتي وأنا حر !!!!
أقول ترى والله إني لأشيل الطماطم كله من الطبخة !!!!
خلوا الأسئلة اللي مالها سنع ....
لا حول ولا قوة إلا بالله
يا خوي خلصنا ما سألك أحد ولا أحدٍ بسائلك بس عجل .
طيب بس لا عاد أحد يقاطعني
نحط البطاطس والجزر .... وحرك يا محرك ....
ثمٍ البهارات والليمون الأسود ومعجون الطماطم والدارسي......
يعني لازم أكمل ؟؟؟؟
شوفوها كلها في الصورة ....
سبحان الله عالم تقول ما بعد شافوا أحد يطبخ.
وبعدين نحرك بشويش ......
تراني قلت بشويش علشان ما تنمرس الخضار ..... لا تقولون ما علمتنا !!!!!
نحط القرع الأمريكي والفلفل الرومي والباذنجان ونضيف القليل من الماء المغلي عليها.

ونحرك برفق

وآخر شي نحط قطع الزهرة فوق الخظار بشويش مرة لأنها كنها بسوت تفتت بسرعة.
نخليها شوي ثم نكب عليها الرز بطريقة فنية وسريعة تضمن تغطية كل الخظار واللحم بالرز كاملاً ثم نضيف مقدار من الماء المغلي أقل من مستوى الرز بقليل ثملا ننسى الفلفل فوق ثم نغطيها ونقصر على الغاز آخر درجة ونتركها لمدة ساعة ونصف .... وترى إن جاء واحدٍ يبلغ شفه ويفتح الغطى ترى الطبخة بتخرب يعني لا تفتح إلا بعد ساعة ونصف.
واللي ما يشوف إنه بيضبط كبة الرز و( عملية التلييس ) يدور له بناي وإلا يناديني أنا ما عندي مانع أبد في المساعدة (( إيه هين )).
إلى هنا أنا ما عاد لي دخل ....
تمتعوا بالمشاهدة وسامحونا على القصور .
واللي يبي ينطح فاله الله يحييه .
أنا والله ما عاد أشوف وعلى لحم بطني من الصبح يعني وخروا عني :
يالله لك الحمد ولك الشكر .... الله لا يغيرها من نعمة ....
الجوع شين الله يكفينا شره !!!!
سبحان الله العظيم فعلاً إن (( إبن آدم مثل الإنسان )) , ولا فيه أضعف منه ويمكن لو تصدمه تريله وإلا قطار إنها تكسر عظامه ويمكن يموت بعد !!!!!
هلا والله هذي مقلوبة وسوت فينا كذا أجل لو هو غيرها وش بنسوي ؟؟؟
أقول يا الربع !!!!!!
سامحونا على القصور وعلى كثر الهرج والمرج .
و
لكم لسعة صدوركم وتحملكم عناء ومشقة قراءة الموضوع ... ناهيكم عن الروائح التي علقت بكم عندما مررتم بالمطبخ ...
منقول
بس بسراحه والله ماقصر طلعت المقلوبه روعه ومشهيه