وربي اعاني

الطلاق شي مو سهل ولا اتكونين ولا اتضيعين عشرتش على هالسوالف كل الرجال يبينون قدام نسوانهم انهم مو رومنسيين ولكن من وراهم يمدحون ويقولون مرتنا رومانسية بس تعب الشغل وكبرياء الرجل اتخليه ما يبين رومنسيته لمرته ولا اضيعين حياتش على شي تافه اتعقلي وادكري ايجابياته ولا تدكرين سلبياته وبتحبينه على ما هو

تعوذي من الشيطان الطلاق مو هين ان شاء الله بتنحل هالمشكله أهم شي الصبر والدعاء والله يكو ن في عونك يارب

ترى الرجال مايقدر ايشوف منظر زوجته وهي متكشخه ومتعدله ومتعطره وبملابس مثيره، وليش ماتغيرين قصه شعرج وتتلبسين له ولكن سويها مفاجأه وكلميه بكلمات رقيقه وبدلع .. ما أظنه بيستحمل وانتي غيري من ستايلج شوي... وكله عشان خاطر زوجك

اعملي كل اللي قالو لك عليه وحاولي انك تغيري طريقة حياتك ديكور بيتك ومشاء الله هنا المنتدى مافي شي الا ومكتوب اما اذا عملت كل دا ومو راضي يتحرك انصحك انك انت كمان تطنشيه وتهميله واذا سألك قولي له انت اهملتني قبل واللي يقدم السبت يلاقي الأحد.ممكن بعدها يحس انو اخطأ في حقك ويرجعلك احسن مما كان يا رب
بس المهم يكون عندك اليقين القوي انه حيتغير بس الصبر والصبر والصبر مع الدعاء

اسمعي اختي ما راح ازيد عن اللي قالوه الاخوات لكن انبهج انه الرجل يمر دائما بمراحل المد والجزر شوفي البحر ساعات يوصل المد الى اقصى حد بعدها يرجع حالة جزر الى اقصى حاله وهكذا دوره الحياه والرجل عنده هالحاله عكس الجنس الناعم لذلك تاكدي انه الرجل مهما تشغله المشاغل الاعمال مايقدر يقاوم الأنثى فكوني دائما انثى بعينه باجمل شكل ولاتملي ودائما غيري بحياتج ولو كانت الاشياء البسيطه المهم تغير ومثل ما قالت الاخت انه الرجل احيانا يمنعه الكبرياء والرجوله انه يعبر عن هالامور للاعتقاد السائد انه في هالسن تعتبر هالحركات الرومنسيه قله عقل وانه كبير على هالامور وانه ينتقص من قدره يااختي هذي موروثات من الازل .. لكن انتي دايم حسسيه انه صغير وشباب .. والا شيخلي الشيبان يستخفون على البنات الصغيرات بالعمر وتلاقين الواحد منهم بلغ من العمر عتيا والا طاخله وحده من سن بناته حتى يحس انه للان مرغوب وانه شباب فليه ماتحسسينه بهالشي حتى بعدين مايروح يدوره عند غيرج ..... على فكره لاتستسلمين لفكرة انه والله كبرنا على هالحركات وانا مو صغار وصكينا ال30 وش هالكلام شوفي الاجانب شياب وما يخلون شي من الحركات الا ويسوونها احسن من الشباب الى عندنا ابقولج شي طريف مره كنا مسافرين وجالسن فمطعم الا وجنبنا جالس اجنبي وزوجته شياب تقولين عمرهم 50 او 60 الا وماسكين ايدين بعض ويسولفون ويضحكون تقولين مراهقين وسعيدين ببعض بشكل لا تتخيلينه لا وكاشخين على الاخر .. والاحلى انه الزوج مسوي لزوجته مفاجاة بعيد ميلادها وجايب كيكه ومحتفلين احلى احتفال هل تعتقدين انه لو وصل عمرج هالعمر بيسوي زوجج كذا .. ملاحظه انا ما اقصد احتفال بعيد الميلاد ولكن على الاقل الجلوس بهالجلسه الرومنسيه بالمطعم ......تخيلي شكلج ....ههه ماظني رجاجيلنا يسوون سواته لوصلنا لهل عمر ..اعذريني اختي على الاطاله .وبالتوفيق.

انا مع الاخت الالماس في موضوع ان الرجل يمر بمرحله مد وجزر وكلنا نعاني منها ولكن كل مافهمتي ان هذي فتره وتعدي كل ما هان الموضوع عندك وانصحك انك ماتضغطين عليه خليه ياخذراحته وفي نفس الوقت اهتمي في نفسك وقولي لنفسك المهم انا اكون راضيه عن شكلي سواء التفت لي ولا لا وركزي في امور اخرى مثل اولادك او حتى هواياتك وصدقيني بتلقينه يحاول يشاركك
والله يسعدك ويوفقك انت وزوجك

شكرا حبيباتي على المواساة اللطيفة لكن صدقوني انكم مو مستوعبين المشكلة اكبر من كذا غيرت كثير وشقلبت البيت فوق تحت بس لاحياة لمن تنادي الى درجة اني اقعد ساعات على المراية اعدل في شكلي واقول ان شاء اللة اليوم ابلفت انتباهه واذا جاء من السهرة تصدقون اني اكون لابسة جديد وما يدري اقول لة هاه وش رايك عجبك القميص الجديد يقول تصدقين احسبة عندك من اول تحطيم ودائما يذكر مساؤي ولايمدحني ابد حتى قدام عيالي00000
وش رايكم0000

نموله وصلت .. تررن ترن
سمعي أختي مني بقولج قاعدة حطيها في بالج
(( الرجال العربي مافيه اي رومانسيه / و خصوصا الرجال الخليجي جامد و جاف ))
بس انتي اللي لازم تكونين شاطرة و تعلمينه على الرومانسيه و لالالالالازم تكونين صبورة
انا مخطوبة والله والله بدايه ما انخطبت انصدمت من خطيبي .. جاف و جامد و ما يهتم بالحركات
الرومانسيه و حتى الكلام الحلوو نادرا ما يطلع منه ..
عاد انا ما احب جذية و انا رومانسيه لابعد الحدود و احب اسوي حركات و اجواء
قمت البس و اكشخ له و ادلعه لابعد الحدود و اناديه بأحلى الكلمات و حتى في الغذى
و العشى اعطيه بيدي .. و احط له شموع و موسيقى كلاسيك .. و الهدايا يا عيني عالهدايا
وايد اهديه هدايا و معاها بطاقات فيها كلام حلوو !!!!
و هو يستانس وايد بس مافي اي مبادرة منه لا في كلمات ولا هدايا ولا حركات .. ولا حتى ينتبه الى ملابسي
بعدين شوي شوي سويت نفسي زعلانه منه قلت له بهدوء و رقه .. اتمنى تكون رومانسي
و ادلعني و تسوي لي مثل ما اسوي لك .. ولا تتعذر بأشغال و مافي وقت و غيره ..
و حتى مرة قلت له : شرايك حبيبي أنت تكتب لي في ورقه ايجابياتي و سلبياتي
و أنا اكتب عنك ايجابياتك و سلبياتك .. قال لي اوكي
عاد أنا كتبت له أنت كريم و حبوب و ملتزم و وسيم و ................الخ
بس أنت وايد جاف ولا فيك شيء من الرومانسيه << كتبتها بالخط الاحمر العريض
و كتبت له انا خاطري تهتم فيني و تمدحني و ....الخ عشان حياتنا يصير طعمها احلى
اذا انت ما دلعتني و اهتميت فيني منو عيل يسوي لي كل هالاشياء ؟!
عاد هو تأثر وايد و تعالي شوفيه الحين
دلع و رومانسيه و هدايا و كلالالالالام مدري من وين عرفه ههه
و صار يعزمني على مطاعم و سينما و طلعات
و بعدين سويت له شهادة .. أفضل زوج في العالم << تلاقينها في منتدى الزواج بعنوان
"تبين حركه بسيطه تخلي زوجك يموت من الفرح " و عاد مات من الفرح و زاد
في الاهتمام .. و الحب و الدلع
و الله اني كنت صابره عليه وايد و اكتم غضبي و قهري و لا اتهاوش معاه بالعكس
انتي كلما تسوين له شيء رومانسي غصب يتفشل و بردها لج
ولا تفكرين في الطلاق نهائيا و اعرفي كل الرجال جذية بس يبي لهم تدريب ههه
و الله يسعدج و انتظر منج اخبار حلوة

الله يكون فى عونك
بس ياختى الرجل مايبقى على حاله
بصراحه الرجل لما يتجاوز ال30 سنه يحس
نفسة كبر وماتصلح له هالحركات 000
خاصة فى مجتمعنا السعودية
نصيحه لك انشغلى باولادك وتربيتهم وهو مع الايام
بيحس انه فقد اهتمامك بة وبيرجع مثل ماكان ان شاء الله
وهذا رائي