المنسف الفلسطيني من مطبخي بالخطوات المصوره

السلام عليكم ورحمة الله وبركاته
أسعد الله أوقاتكن جميعاً
اليوم حابه أقدم لكم طريقة المنسف الفلسطيني على الطريقة الصحيحه
وان شاءالله ينال على اعجابكم
بسم الله نبدأ
بنحتاج ل
لحمة خروف
4-5 أكواب أرز
خبز عادي أو خبز الصاجه
لبن جميد
3 ملاعق كبيره سمنه
ملعقتين كبيره زيت ذره
رأس بصل متوسط
كركم
بقدونس او كزبره ناشفه
ملح
لوز للتزيين
ممكن تستعملوا هالخبز أو مثل ما قلت خبز الصاجه
بس لأنه الجو عنا ثلج ما قدرت روح الدكان اشتريه وارجع
لذلك كان متوفر عندي الخبز العادي وصدقا انا بحب استخدمه
لانه بتشعروا بطعمه بعكس الصاجه
الطريقة:
بنغسل اللحمه وبنركبها على النار
بنقلبها ليصير لونها مائل للبني
من بعدها بنضيف الماء وبنتركها على النار
بنترك اللحمه تغلي كم من غلوه ومن بعدها نقوم بإزالة رغوة اللحم
وبنقوم بتقطيع رأس البصل على اللحمه
وبنتركها لتستوي
من بعد ما تستوي اللحمه بنضيف اللبن
وبنتركه يغلي كم من غلوه ومن بعدها بنطفي تحته
بقدر تاني بنكون غاليين ماء بنضيف عليه كركم وملح
ولكن لا تكتروا كتير كركم لانه بعدين بيطلع لون الأرز اصفر كتير
بنغسل الأرز وبنضيفه فوق الماء
وبنترك الأرز يستوي وانتبهوا لا تتركوا الأرز يستوي كتير
لازم تكون حبة الأرز واقفه مش مخبصه
من بعدها بنقوم بتصفيته
على الجانب التاني بنجيب مقلايه وبنضيف فيها الزيت وبنقوم بتسخينه
ولما يسخن الزيت بنضيف السمنه فوقه
وبنسخنهم سوا لتذوب السمنه وبنطفي تحتهم
من بعد ما صفينا الأرز كويس من الماء بنضيف فوقه الزيت والسمنه
راح تسالوا ليه السمنه والزيت وانا بقلكم انه السمنه مشان تقوم بتفتيح حبات الأرز
وتكون هشه وطريه أكتر وعدا عن الرائحه يا سلام وأما الزيت بيعطي الأرز لمعه
من بعدها بنجيب صينيه عميقه نوعاً ما وبنقوم بتفتيت الخبز فيها
وبنقوم بتشريب الخبز بقليل من اللبن
من بعدها بنضيف الأرز فوق الخبز
وبنقوم بتشريب الأرز مرة اخرى لبن
وبعدها بنضيف اللحمه ونزين الطبق باللوز والكزبره الناشفه
وصحتين وعافيه على قلوبكم