ريزوتو يم يمي

1. ريزوتو

ريزوتو

يوم الجمعة كنت مشتهيه آكل ريزوتو .... الريزوتو هو طبق ايطالي منتشر بالمطاعم الايطالية وهو عباره عن رز خاص ( رز ايطالي) بصلصة الكريمة والجبن وممكن نستخدم بدل الرز الايطالي المكرونه اللي على شكل رز واللي متوفره بكثره .
المقادير:
1 كيس مكرونه المطاحن شكل رز ( وزن الكيس نص كيلو)
نص دجاجه مخليه من العظم ومقطعه قطع صغيره
1 بصلة صغيرة مقطعه قطع صغيره
1 علبة مشروم شرائح ويفضل تقطيعه الى قطع اصغر
4 حبات طماطم مجففه منقوعه بزيت زيتون – ان وجدت لانها تعطي نكهه لذيذه للطبق
2 فص ثوم مهروس
2 علبة كريمه – تقريبا 2 كوب مليان
نص كوب جبنة باميزان + ربع كوب جبنة تشدر مبشورة
خليط اعشاب ايطالية ( ريحان – زعتر – اوريجانو – نعناع)
فلفل اسود وملح
زيت زيتون
الطريقه:
نسلق المكرونه بالماء مدة لا تزيد عن 10 دقائق
في هذا الوقت نحط شوية زيت زيتون على النار ونضيف عليه البصل والثوم والدجاج ونبدا نقلب ونضيف الفلفل الاسود والملح و ملعقتين اعشاب عطرية .... نقلب حتى يبدا يستوي الدجاج
نضيف عليه المشروم ونقلب وبعدها نضيف عليه المكرونه اللي صفيناها من الماء
اثناء التقليب اذا احتاج نضيف زيت زيتون .. نضيف بالتدريج
بعدها نصب الكريمه والجبن والطماطم المجففه ونقلب المقدار شوي شوي على النار مدة 7 دقايق
تسكب في الطبق وتزين بجبنة مبشورة وشوية اعشاب على الوجه وتقدم حالا وهي قوامها طري وثقيل
اذا تأخر وقت التقديم وصار الطبق شبه جامد نقوم بوضع الطبق على النار ونصب عليه مقدار نص كوب حليب سائل ونقلبها حتى تلين مره ثانيه
للتنويع : ممكن نضيف للطبق سبانخ او فلفل رومي ملون او لحمه او أي شي تحبين حسب الذوق
لا يطوفكم فعلا لذيذ بس دسم
بالعافيه