طبق لذيذ وسريع ومغذي ثلاثه في واحد وممكن تشوفون شكله غريب عليكم شوي

مرحبا حبوبات ^_^ هذي اول مشاركة لي في المنتدى لا كن انا متابعه دائمه لقسم الطبخ ومعجبه بطبخكم الرائع
وحبيت اشارك معكم بعشائي قبل يومين واضطريت للتسجيل بعد ما رفضت اختي تسلفني معرفها وما كفاها الرفض الا تعايرني
وتقول الاكل اكل حوت والحال منحوت <<< وهي صادقه
المقادير
كوب طحين
3 بيضات
ملعقة شاهي خميره
صدر دجاجه مطبوخ ومقطع مكعبات صغيره ( حسب ما تحبين انتى مسلوق او مقلي انا افضلها مقليه لها طعم خاص يمكن عشان البهارات ^_^ )
فطر
فلفل ثلاث الوان ( اختياري ) انا ما حطيته لانه ما اعجبني المره الاول والناس اذواق اذا تحبينه حطيه
بصله
حليب قليل الدسم كوب او اقل بشوي ما قدرته مضبوط لاني اصب من العلبه مباشره ^_^ لكن في ها الحدود
ثلاث ملاعق طعام جبنه مبشوره
ثلاث ملاعق طعام بقدونس مفروم
ملعقة طعام خردل
ملح
فلفل
الطريقه
اقلي البصل بعد تقطيعه ( انا احب البصل مبشور ^_^ وانتى ومزاجك تبشرينه تقطعينه على راحتك ) 5 دقائق ثم اضيفي الفطر والفلفل والملح وغطي عليه وبعد 5 دقائق افتحي الغطاء وخليه الماء ينشف
ثم طفى النار وخليه على جنب
اخلطي البيض والبقدونس والخردل مع بعض
اخلطي الحليب والخميره مع بعض ثم اضيفي الطحين واخلطيها جيداً
ثم اضيفي خليط البيض والبقدونس والخردل عليها ثم اضيفي مكعبات الدجاج المستويه على الخليط ثم اضيفي خلطة الفطر وحركيهم مع بعض
تكونين من قبل مسخنه الفرن على 180 درجه
تحضرين قالب الكيك المستطيل وتصبين الخليط فيه وتدخلينه الفرن 30 دقيقه
وهذا بعد ماطلع من الفرن وحطيناه في الصحن
من قريب
وبالهنا والعافيه
سبحانك اللهم وبحمدك استغفرك واتوب اليك